ଓ୍ବାଶିଂଟନ: ଆମେରିକାର ରାଷ୍ଟ୍ରପତି ଜୋ ବାଇଡେନ ତାଙ୍କ ୟୁକ୍ରେନ ପ୍ରତିପକ୍ଷ ଭୋଲଦମିର ଜେଲେନସ୍କିଙ୍କୁ ଆଶ୍ୱାସନା ଦେଇଛନ୍ତି ଯେ ଯେତେ ଦିନ ଯାଏଁ “ଋଷର ଆକ୍ରୋଶ” ୟୁକ୍ରେନ ବିରୋଧରେ ରହିଥିବ ସେତେ ଦିନ ଯାଏ ୟୁକ୍ରେନ ସହ ଛିଡା ହୋଇ ରହିବ ଆମେରିକା। 10 ମାସ ହେବ ଋଷ ୟୁକ୍ରେନ ଯୁଦ୍ଧ ଚାଲିଛି। ଆଉ ପ୍ରଥମ ଥର ପାଇଁ ବିଦେଶ ଗସ୍ତରେ ଯାଇଛନ୍ତି ଜେଲେନସ୍କି। କୂଟୀନୀତିକ ଦୃଷ୍ଟିରୁ ବାଇଡେନ ଏବଂ ଜେଲେନସ୍କିଙ୍କ ବୈଠକ ବେଶ ଗୁରୁତ୍ୱପୂର୍ଣ୍ଣ ଥିଲା। ଏହି ସମୟରେ ଆମେରିକା ୟୁକ୍ରେନକୁ ଯେଉଁ ଆଶ୍ବାସନା ଦେଇଛି ତାହା କିଛି କମ୍ ନୁହେଁ। ଏହା ଏପରି ଯେପରି ବିପଦ ବେଳେ ସାନ ଭାଇ କାନ୍ଧରେ ବଡ଼ ଭାଇ ହାତ ରଖି ଆଶ୍ବାସନା ଦେବା ସହିତ ସମାନ।
ବୁଧବାର ହ୍ୱାଇଟ୍ ହାଉସ ଗସ୍ତ ସମୟରେ ବାଇଡେନ ଜେଲେନସ୍କିଙ୍କୁ କହିଛନ୍ତି ଯେ ଆପଣ କେବେ ଏକୁଟିଆ ନୁହନ୍ତି। ମିଳିତ ସାମ୍ବାଦିକ ସମ୍ମିଳନୀରେ ବାଇଡେନ ଜେଲେନସ୍କିଙ୍କୁ କହିଛନ୍ତି ଯେ, ତୁମର ନେତୃତ୍ୱ ଏହି ଭୟଙ୍କର ସଙ୍କଟ ଦେଇ ୟୁକ୍ରେନବାସୀଙ୍କୁ ପ୍ରେରଣା ଦେଇଛି। ସାରା ବିଶ୍ୱର ନଜର ଏହି ଦୁଇ ନେତାଙ୍କ ବୈଠକ ଉପରେ ନଜର ରଖିଥିଲା। ପାଖାପାଖି ଦୁଇ ଘଣ୍ଟା ଦୁଇ ନେତା ହ୍ୱାଇଟ୍ ହାଉସ ଭଳି ସ୍ଥାନରେ ରୁଦ୍ଧ ଦ୍ବାର ବୈଠକ କରିଥିଲେ ବୋଲି ସୂଚନା ରହିଛି।