ନୂଆଦିଲ୍ଲୀ: ଖୁବ୍ ଶୀଘ୍ର ଭାରତକୁ ମିଳିପାରେ ଆଉ ଏକ କରୋନା ଟିକା। ପ୍ରସ୍ତୁତି ଜୋରସୋରରେ ଚାଳିଛି। ଚୂଡାନ୍ତ ଫଳ ଆସିବା ପରେ ଏହା ସାଧାରଣ ନାଗରିକଙ୍କ ଲାଗି ଉପଲବ୍ଧ ହେବ ବୋଲି ହାଇଦ୍ରାବାଦ ସ୍ଥିତ ଫାର୍ମାସ୍ୟୁଟିକାଲ୍ କମ୍ପାନୀ ବାୟୋଲୋଜିକାଲ ଇ ସୂଚନା ଦେଇଛି।
ଏହି କମ୍ପାନୀ ଏକ ନୂଆ କରୋନା ବିରୋଧୀ ଟିକା ବାହାର କରିଛି। ଏହି ‘କରବେଭ୍ୟାକ୍ସ’ ଟିକା ସେପ୍ଟେମ୍ବର ଶେଷ ସୁଦ୍ଧା ଭାରତରେ ଲଞ୍ଚ କରିବ ବୋଲି ଆଶା କରାଯାଉଛି ବୋଲି ସୋମବାର କମ୍ପାନି ସୂତ୍ରରୁ ପ୍ରକାଶ।
ବାୟୋଲୋଜିକାଲ୍-ଇ ଦ୍ବାରା ବିକଶିତ ହେଉଥିବା ଏହି ଟିକା ହେଉଛି ଏକ ଆରବିଡି ପ୍ରୋଟିନ୍ ସବ୍-ୟୁନିଟ୍ ଟିକା ଏବଂ ପ୍ରଥମ ପର୍ଯ୍ୟାୟ ଏବଂ ଦ୍ବିତୀୟ କ୍ଲିନିକାଲ୍ ପରୀକ୍ଷଣରେ ଆଶା ମୁତାବକ ଫଳାଫଳ ଦେଖାଯାଇଥିଲା। ଏହାପରେ ନିକଟରେ ତୃତୀୟ ପର୍ଯ୍ୟାୟ କ୍ଲିନିକାଲ୍ ଟେଷ୍ଟ କରାଯାଇଥିଲା। ବର୍ତ୍ତମାନ ଭାରତରେ କୋଭିଶିଲ୍ଡ, କୋଭାକ୍ସିନ ଏବଂ ସ୍ପୁଟନିକ ଭି ଟିକା ଡୋଜ ଦିଆଯାଉଛି।