ଭୁବନେଶ୍ୱର: ଡିସେମ୍ବର ୫ ତାରିଖରେ ପଦ୍ମପୁର ବିଧାନସଭା ଉପନିର୍ବାଚନ ପାଇଁ ଭୋଟ୍ ପଡ଼ିବ। ଏହା ପୂର୍ବରୁ ରାଜ୍ୟର ଶାସକ ଦଳ ବିଜେଡି ଏବଂ ବିଜେପି ଚାଷୀ ପ୍ରସଙ୍ଗ ଉଠାଇ ପରସ୍ପରକୁ ଆକ୍ଷେପ ପ୍ରତିଆକ୍ଷେପ କରିଆସୁଛନ୍ତି। ଚାଷୀ ସମସ୍ୟାକୁ ନେଇ ବିଧାନସଭା ଅଚଳ ହେବା ପରେ ଉଭୟ ଦଳର ବିଧାୟକମାନେ ରାଜଭବନକୁ ଯାଇ ରାଜ୍ୟପାଳଙ୍କୁ ଭେଟି ଦାବି ଜଣାଇଥିଲେ।
ଧାନର ସର୍ବନିମ୍ନ ସହାୟକ ମୂଲ୍ୟ ବୃଦ୍ଧି ଦାବିରେ ବିଜେଡି ବିଧାୟକମାନେ ପ୍ରଥମେ ବିଧାନସଭା ପରିସରରେ ଥିବା ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତି ନିକଟରେ ଧାରଣା ଦେଇଥିଲେ। ବିଜେଡି ବିଧାୟକ ଶଶିଭୂଷଣ ବେହେରା କହିଛନ୍ତି, ଧାନର ସହାୟକ ମୂଲ୍ୟ କ୍ୱିଣ୍ଟାଲ ପିଛା ୨୯୩୦ ଟଙ୍କାକୁ ବୃଦ୍ଧି ପାଇଁ ପୂର୍ବରୁ ବିଧାନସଭାରେ ସର୍ବସମ୍ମତିକ୍ରମେ ନିଷ୍ପତ୍ତି ନିଆଯାଇଥିଲେ ମଧ୍ୟ କେନ୍ଦ୍ର ଏଯାଏଁ ଏହି ଦାବି ପୂରଣ କରିନାହିଁ। ତୁରନ୍ତ ଏମ୍ଏସପି ବୃଦ୍ଧି ପାଇଁ ଦାବି କରିବା ବ୍ୟତୀତ ଚାଷୀଙ୍କ ଫସଲ ବୀମା ଦାବିର ଶୀଘ୍ର ପୈଠ ଏବଂ ଭାରତୀୟ ଖାଦ୍ୟ ନିଗମ (ଏଫସିଆଇ) ଦ୍ୱାରା ରାଜ୍ୟରୁ ଚାଉଳର ସଠିକ୍ ଉଠାଣ ପାଇଁ ପଦକ୍ଷେପ ନେବାକୁ ବିଜେଡି ଚାହୁଁଛି। ସେ କହିଛନ୍ତି ଯେ ଏହା ସହିତ ଓଡ଼ିଶା ଚାଷୀଙ୍କ ପାଇଁ ଆବଶ୍ୟକ ପରିମାଣର ସାର ଯୋଗାଇ ଦେବା ପାଇଁ କେନ୍ଦ୍ର ସରକାର ପଦକ୍ଷେପ ନେବା ଆବଶ୍ୟକ ବୋଲି ସେ କହିଛନ୍ତି।
ବିଜେପି ନେତୃତ୍ୱାଧୀନ କେନ୍ଦ୍ର ସରକାର ଓଡ଼ିଶାର ଚାଷୀଙ୍କୁ ଅବହେଳା କରୁଥିବା ଅଭିଯୋଗ କରି ବିଜେପି ଚାଷୀଙ୍କ ଦୁଃଖ ପାଇଁ କୁମ୍ଭୀର କାନ୍ଦଣା କାନ୍ଦୁଛି। ଏବେ କେନ୍ଦ୍ର ସରକାର ଜାଗ୍ରତ ହୋଇ ଓଡ଼ିଶାର ଚାଷୀଙ୍କୁ ନ୍ୟାୟ ଦିଅନ୍ତୁ ବୋଲି ସେମାନେ କହିଛନ୍ତି।
ସେହିପରି ବିଜେପି ବିଧାୟକମାନେ ମଧ୍ୟ ବିଧାନସଭା ପରିସରରେ ବିକ୍ଷୋଭ ପ୍ରଦର୍ଶନ କରିବା ପରେ ରାଜଭବନକୁ ବ୍ୟାନର ଓ ପୋଷ୍ଟର ଧରି ଏକ ରାଲି ବାହାର କରିଥିଲେ। ବିରୋଧୀ ଦଳ ମୁଖ୍ୟ ସଚେତକ ମୋହନ ମାଝୀ କହିଛନ୍ତି, ଓଡ଼ିଶାରେ ମରୁଡ଼ି ଯୋଗୁଁ ଫସଲ ନଷ୍ଟ ହୋଇଥିବା ସମସ୍ତ ଚାଷୀଙ୍କୁ ଇନ୍ପୁଟ୍ ସବସଡି ପ୍ରଦାନ କରିବାକୁ ଦଳ ଦାବି କରୁଛି। ଆଉ କାଳ ବିଳମ୍ବ ନକରି ରାଜ୍ୟ ସରକାର ଚାଷୀଙ୍କୁ ଇନପୁଟ୍ ସବସିଡି ପ୍ରଦାନ କରନ୍ତୁ ବୋଲି ସେ କହିଛନ୍ତି।
କଂଗ୍ରେସ ବିଧାୟକ ଦଳର ନେତା ନରସିଂହ ମିଶ୍ର କହିଛନ୍ତି, ବିଧାନସଭାରେ ୪ଟି ରାଜନୈତିକ ଦଳ ରହିଛି। ଚାଷୀଙ୍କୁ ନେଇ ସମସ୍ତେ ଦରଦି ବୋଲି ଦେଖାଉଛନ୍ତି। ଚାଷୀଙ୍କ ସମସ୍ୟାର ସମାଧାନ ପାଇଁ ପରସ୍ପରକୁ ଦୋଷ ଦେବା ଅପେକ୍ଷା ସର୍ବଦଳୀୟ ବୈଠକ ଡକାଯାଉ ବୋଲି ଦାବି କରିଛନ୍ତି।ଚାଷୀଙ୍କ ବିକାଶ ନେଇ ଆଇନ ତିଆରି କରାଯାଉ। ଏଥିରେ ଆଇନ ଅମାନ୍ୟ କଲେ ସଶ୍ରମ କାରାଦଣ୍ଡ ସହ ଫାଇନ ବ୍ୟବସ୍ଥା ରହୁ ବୋଲି ନରସିଂହ ମିଶ୍ର କହିଛନ୍ତି। ଚାଷୀ ପ୍ରସଙ୍ଗରେ ମୁଖ୍ୟମନ୍ତ୍ରୀ ଚୁପ ନରହି ସବୁ ଦଳକୁ ଡାକି ଆଲୋଚନା କରନ୍ତୁ ବୋଲି ନରସିଂହ ମିଶ୍ର କହିଛନ୍ତି।
Comments are closed.