ଭୁବନେଶ୍ୱର: ଜନତା ଦଳ ୟୁନାଇଟେଡ୍ (ଜେଡିୟୁ) ଟୁଇଟ କରି ଦାବି କରିଛି ଯେ ନୀତୀଶ କୁମାର ବିରୋଧୀ ଦଳର ନେତା ହୋଇଛନ୍ତି ଏବଂ ବିନା କୌଣସି ବ୍ୟକ୍ତିଗତ ଅଭିଳାଷରେ ବିରୋଧୀ ଦଳଗୁଡ଼ିକୁ ଏକାଠି କରୁଛନ୍ତି। ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ନୀତୀଶ ଭେଟିବା ପରେ ବିରୋଧୀ ବିଜେପିକୁ ଏହା ଇନ୍ଧନ ଯୋଗାଇଛି।
ଦୁଇ ନେତା ରୁଦ୍ଦଦ୍ୱାର ବୈଠକ କରିବା ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି ଯେ, ମେଣ୍ଟ ନେଇ କୌଣସି ଆଲୋଚନା ହୋଇନାହିଁ। ତେବେ ନବୀନ ପଟ୍ଟନାୟକଙ୍କ ବୟାନର ବିପରୀତ ଜେଡିୟୁ ଟୁଇଟ୍ କରି କହିଛି ଯେ ମୁଖ୍ୟମନ୍ତ୍ରୀ ନୀତୀଶ କୁମାର ବ୍ୟକ୍ତିଗତ ଅଭିଳାଷ ନ ରଖି ବିରୋଧୀ ଦଳଗୁଡ଼ିକୁ ଏକଜୁଟ୍ କରିଛନ୍ତି।
ଉଭୟ ଦଳର ପରସ୍ପର ବିରୋଧୀ ମନ୍ତବ୍ୟକୁ ନେଇ ବିଜେପି କଡା ସମାଲୋଚନା କରିଛି। ରାଜ୍ୟ ବିଜେପିର ସାଧାରଣ ସମ୍ପାଦକ ପୃଥ୍ବୀରାଜ ହରିଚନ୍ଦନ ବୁଧବାର ଅଭିଯୋଗ କରିଛନ୍ତି ଯେ ଉଭୟ ମୁଖ୍ୟମନ୍ତ୍ରୀ କିଛି ଲୁଚାଉଛନ୍ତି। କୌଣସି ରାଜନୈତିକ ଆଲୋଚନା ହୋଇନଥିବା କଥା ସମ୍ପୂର୍ଣ୍ଣ ମିଛ ବୋଲି ସେ ଦାବି କରିବା ସହ ଲୋକଙ୍କୁ ବିଭ୍ରାନ୍ତ କରୁଥିବା ଅଭିଯୋଗ କରିଛନ୍ତି।
ସେ କହିଛନ୍ତି,ବିଜେଡି ଯଦି ତୃତୀୟ ସାମ୍ମୁଖ୍ୟକୁ ଯିବାକୁ ଚାହୁଁଛି, ତେବେ ଏହା ସ୍ୱାଗତଯୋଗ୍ୟ ପଦକ୍ଷେପ। ଯଦି ସେମାନେ ନରେନ୍ଦ୍ର ମୋଦୀ ସରକାରଙ୍କ ବିରୋଧରେ ଯିବାକୁ ଚାହୁଁଛନ୍ତି, ତେବେ ସେମାନେ ଖୋଲାଖୋଲି ଭାବେ ଏକଥା କହିବାର ସାହସ ରଖନ୍ତୁ। ବିଜେଡି କେବଳ ମିଛ କହି ଲୋକଙ୍କୁ ବିଭ୍ରାନ୍ତ କରିବାର ଅଭ୍ୟାସକୁ ଦୋହରାଇଛି ବୋଲି ହରିଚନ୍ଦନ କହିଛନ୍ତି।
ବିଜେଡି ଉପସଭାପତି ପ୍ରସନ୍ନ ଆଚାର୍ଯ୍ୟ ବିଜେପିର ଅଭିଯୋଗର ଜବାବ ଦେଇ କହିଛନ୍ତି ଯେ, ବିଜେଡି ୨୦୦୯ ମସିହାରୁ ସମଦୂରତା ନୀତି ଅବଲମ୍ବନ କରିଆସୁଛି। ସେ ବୁଝାଇଥିଲେ ଯେ, ଯେତେବେଳେ ବି କୌଣସି ମୁଖ୍ୟମନ୍ତ୍ରୀ କିମ୍ବା ନେତା ଓଡ଼ିଶା ଗସ୍ତରେ ଆସନ୍ତି, ମୁଖ୍ୟମନ୍ତ୍ରୀ ସେମାନଙ୍କୁ ସ୍ୱାଗତ ଓ ଅଭିନନ୍ଦନ ଜଣାଇଥାନ୍ତି।
ପ୍ରସନ୍ନ ଆଚାର୍ଯ୍ୟ କହିଛନ୍ତି ଯେ ଜେଡିୟୁ ଓ ବିଜେଡି ଅଲଗା ଅଲଗା ଦଳ ଏବଂ କେବଳ ଜେଡିୟୁ ହିଁ ଏହାର ଟୁଇଟ୍ ବିଷୟରେ କହିପାରିବ। ସେ ଆହୁରି ମଧ୍ୟ ଦୋହରାଇଥିଲେ ଯେ ନବୀନ ପଟ୍ଟନାୟକ ସ୍ପଷ୍ଟ ଭାବେ କହିଥିଲେ ଯେ ଏହି ସାକ୍ଷାତ କେବଳ ଏକ ସୌଜନ୍ୟମୂଳକ ସାକ୍ଷାତ ଥିଲା।
ଦୁଇ ମୁଖ୍ୟମନ୍ତ୍ରୀଙ୍କ ଏହି ସାକ୍ଷାତ ୨୦୨୪ ଲୋକସଭା ନିର୍ବାଚନ ପୂର୍ବରୁ ସମ୍ଭାବ୍ୟ ରାଜନୈତିକ ପୁନର୍ବିନ୍ୟାସକୁ ନେଇ କଳ୍ପନାଜଳ୍ପନା ସୃଷ୍ଟି କରିଛି। ତେବେ ଉଭୟ ନବୀନ ପଟ୍ଟନାୟକ ଓ ନୀତୀଶ କୁମାର ମେଣ୍ଟ କିମ୍ବା ସଙ୍ଘୀୟ ସାମ୍ମୁଖ୍ୟର କୌଣସି କଥାକୁ ଖଣ୍ଡନ କରିଛନ୍ତି।