କେଉଁ ମାମଲାରେ ରାହୁଲ ଗାନ୍ଧୀ ଜାମିନରେ ଅଛନ୍ତି, ଦେଶବାସୀଙ୍କୁ କହିବା ଦରକାର: ପୂର୍ବତନ କେନ୍ଦ୍ରମନ୍ତ୍ରୀ
ନୂଆଦିଲ୍ଲୀ: ଶୁକ୍ରବାର କଂଗ୍ରେସ ସଂସଦରେ ମୁଦ୍ରାସ୍ଫୀତି, ବେକାରୀ ଏବଂ ଜିଏସଟି ବିରୋଧରେ ବିରୋଧ କରିଥିଲା। ଏହି ସମୟରେ କଂଗ୍ରେସ ସାଂସଦମାନଙ୍କୁ କଳା ପୋଷାକରେ ଦେଖିବାକୁ ମିଳିଥିଲା। ବିରୋଧ କରୁଥିବା ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀଙ୍କ ସମେତ ବହୁ କଂଗ୍ରେସ ସାଂସଦଙ୍କୁ ପୋଲିସ ଅଟକ ରଖିଥିଲା। ୬ ଘଣ୍ଟା ପରେ ପୋଲିସ ତାଙ୍କୁ ଛାଡି ଦେଇଥିଲା। କଂଗ୍ରେସ ଦଳ କହିଛି ଯେ ସରକାରଙ୍କ ବିରୋଧରେ ସେମାନଙ୍କର ବିରୋଧ ଜାରି ରହିବ। ପ୍ରଦର୍ଶନ ପୂର୍ବରୁ ରାହୁଲ ଗାନ୍ଧୀ ଏକ ସାମ୍ବାଦିକ ସମ୍ମିଳନୀ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଜର୍ମାନର ଏକଛତ୍ରବାଦ ଶାସକ ହିଟଲରଙ୍କ ସହ ତୁଳନା କରିଥିଲେ। ସେ କହିଛନ୍ତି ଯେ ସେ ମଧ୍ୟ ନିର୍ବାଚନରେ ଜିତୁଥିଲେ।
କଂଗ୍ରେସ ନେତା ରାହୁଲ ଗାନ୍ଧୀ ଆଜି ଗଣମାଧ୍ୟମକୁ ସମ୍ବୋଧିତ କରି ମୁଦ୍ରାସ୍ଫୀତି ନେଇ କେନ୍ଦ୍ର ସରକାରଙ୍କ ଉପରେ ବର୍ଷିଥିଲେ। ଦେଶରେ ଗଣତନ୍ତ୍ରର ମୃତ୍ୟୁ ଘଟିଛି ଏବଂ ଏକଛତ୍ରବାଦ ଶାସନ ଚାଲିଛି ବୋଲି ରାହୁଲ କହିଛନ୍ତି। ଏହାର ଜବାବ ଦେଇଛନ୍ତି ବିଜେପି ନେତା ତଥା ପୂର୍ବତନ କେନ୍ଦ୍ରମନ୍ତ୍ରୀ ରବି ଶଙ୍କର ପ୍ରସାଦ ।
ରବି ଶଙ୍କର ପ୍ରସାଦ କହିଛନ୍ତି, ଯେତେବେଳେ ମୁଦ୍ରାସ୍ଫୀତି ଏବଂ ବେକାରୀ ବିଷୟରେ ଆଲୋଚନା ହୁଏ, ସେତେବେଳେ କଂଗ୍ରେସ ନେତା ଆଲୋଚନାକୁ ଆସନ୍ତି ନାହିଁ । ସେମାନେ ସଦନ ବାହାରକୁ ପଳାଇ ଯାଆନ୍ତି। ଦୁଇ ଦିନ ପୂର୍ବେ ଗୃହରେ ଆଲୋଚନାରେ କଂଗ୍ରେସ ନେତା ଭାଗ ନେଇ ନଥିଲେ। ଏହା ଏକ ମିଛ ଅଭିଯୋଗ ଯେ ସେମାନଙ୍କୁ କହିବାକୁ ଅନୁମତି ଦିଆଯାଉନି।
ମୁଦ୍ରାସ୍ଫୀତି କେବଳ ଏକ ବାହାନା। କଂଗ୍ରେସ ଇଡିକୁ ଧମକ ଦେବା ସହ ନିଜ ପରିବାରକୁ ବଞ୍ଚାଇବାକୁ ଯୋଜନା କରୁଛି। କୋଭିଡ ପରେ ଅନେକ ବଡ ଦେଶର ଆର୍ଥିକ ସ୍ଥିତି ଅପେକ୍ଷା ଭାରତର ଅର୍ଥନୀତିକ ବ୍ୟବସ୍ଥା ଭଲ ରହିଛି । ଦୁର୍ନୀତି ବିରୋଧରେ ମୋଦି ସରକାର ଅନେକ କାମ କରିଛନ୍ତି।
କଂଗ୍ରେସ ସରକାର ସମୟରେ ଦୁର୍ନୀତି ଭରି ହୋଇ ରହିଥିଲା। ମୋଦୀ ସରକାରରେ ମଧ୍ୟସ୍ଥିମାନଙ୍କ ପାଇଁ ସମସ୍ତ ବାଟ ବନ୍ଦ କରି ଦେଇଛନ୍ତି। ତେବେ ରବି ଶଙ୍କର ପ୍ରସାଦ ରାହୁଲ ଗାନ୍ଧୀଙ୍କୁ ପଚାରିଛନ୍ତି ଯେ ସେ କାହିଁକି ଜାମିନରେ ଅଛନ୍ତି? କେଉଁ ମାମଲାରେ ଜାମିନରେ ଅଛନ୍ତି? ନ୍ୟାସନାଲ ହେରାଲ୍ଡ ବିଷୟରେ ଦେଶକୁ ରାହୁଲ ଗାନ୍ଧୀ କହିବା ଆବଶ୍ୟକ ବୋଲି ସେ କହିଛନ୍ତି।
