ଭୁବନେଶ୍ୱର: ଓଡ଼ିଶାରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ନେତୃତ୍ୱାଧୀନ ଭାରତୀୟ ଜନତା ପାର୍ଟି ସରକାର ସଫଳତାର ସହ ନିଜ ଶାସନ କାଳର ଦୁଇ ବର୍ଷ ପୂରଣ କରିଛି। ଏହି ବିଶେଷ ତଥା ଐତିହାସିକ ଅବସରରେ ମୁଖ୍ୟମନ୍ତ୍ରୀ ରାଜ୍ୟବାସୀଙ୍କୁ ଆନ୍ତରିକ ଧନ୍ୟବାଦ ଏବଂ ଗଭୀର କୃତଜ୍ଞତା ଜଣାଇଛନ୍ତି। ଲୋକଙ୍କ ଅତୁଟ ବିଶ୍ୱାସ ଅଦମ୍ୟ ଭଲପାଇବା ଓ ନିରନ୍ତର ସମର୍ଥନ ଯୋଗୁଁ ସରକାରଙ୍କ ଏହି ଯାତ୍ରା ସଫଳ ହୋଇପାରିଛି ବୋଲି ସେ ଏକ ବାର୍ତ୍ତାରେ ପ୍ରକାଶ କରିଛନ୍ତି।
ଗତ ଦୁଇ ବର୍ଷ ଭିତରେ ରାଜ୍ୟ ସରକାର ବିକାଶମୂଳକ କାର୍ଯ୍ୟକୁ ଅଧିକ ତ୍ୱରାନ୍ୱିତ କରିବା ସହ ଅନେକ ଯୁଗାନ୍ତକାରୀ ପଦକ୍ଷେପ ନେଇଛନ୍ତି। ନିର୍ବାଚନ ସମୟରେ ଦଳ ପକ୍ଷରୁ ସଂକଳ୍ପ ପତ୍ରରେ ଦିଆଯାଇଥିବା ପ୍ରତିଶ୍ରୁତିଗୁଡ଼ିକୁ ପୂରଣ କରିବା ଦିଗରେ ସରକାର ନିରନ୍ତର ପ୍ରୟାସ ଜାରି ରଖିଛନ୍ତି। ବିଶେଷ କରି ମହିଳାମାନଙ୍କୁ ଆର୍ଥିକ ସ୍ତରରେ ସ୍ୱାବଲମ୍ବୀ କରିବା ଯୁବକମାନଙ୍କ ପାଇଁ ନୂତନ ନିଯୁକ୍ତି ସୁଯୋଗ ସୃଷ୍ଟି କରିବା ଏବଂ କୃଷକଙ୍କ ଆୟ ବୃଦ୍ଧି ଉପରେ ସର୍ବାଧିକ ଗୁରୁତ୍ୱ ଦିଆଯାଇଛି। ସୁଭଦ୍ରା ଯୋଜନା ଭଳି ପ୍ରମୁଖ କାର୍ଯ୍ୟକ୍ରମ ଏହାର ଜ୍ୱଳନ୍ତ ଉଦାହରଣ ଅଟେ।
ମୁଖ୍ୟମନ୍ତ୍ରୀ କହିଛନ୍ତି ଯେ ଓଡ଼ିଶାରେ ଏବେ ଏକ ସ୍ୱଚ୍ଛ ଦୁର୍ନୀତିମୁକ୍ତ ଏବଂ ସମ୍ପୂର୍ଣ୍ଣ ଲୋକାଭିମୁଖୀ ଶାସନ ବ୍ୟବସ୍ଥା ଚାଲିଛି। ସରକାରଙ୍କ ବିଭିନ୍ନ ଲୋକକଲ୍ୟାଣକାରୀ ଯୋଜନା ଏବେ କୌଣସି ବାଧାବିଘ୍ନ ବିନା ସିଧାସଳଖ ତୃଣମୂଳ ସ୍ତରରେ ପହଞ୍ଚି ପାରୁଛି। ପ୍ରକୃତ ତଥା ଯୋଗ୍ୟ ହିତାଧିକାରୀମାନେ ଏବେ ଅଫିସ ବାରଣ୍ଡାରେ ନଘୂରି ସହଜରେ ଏହାର ସୁଫଳ ପାଉଛନ୍ତି। ଏହାକୁ ସରକାର ନିଜର ଏକ ବଡ଼ ସଫଳତା ବୋଲି ବିବେଚନା କରୁଛନ୍ତି।
ଆଗାମୀ ଦିନରେ ଏକ ବିକଶିତ ଏବଂ ସମୃଦ୍ଧ ଓଡ଼ିଶା ଗଠନ କରିବା ତାଙ୍କ ସରକାରଙ୍କ ମୁଖ୍ୟ ଲକ୍ଷ୍ୟ ବୋଲି ଶ୍ରୀ ମାଝୀ ସ୍ପଷ୍ଟ କରିଛନ୍ତି। ମହାପ୍ରଭୁ ଶ୍ରୀ ଜଗନ୍ନାଥଙ୍କ ଆଶୀର୍ବାଦରୁ ରାଜ୍ୟ ଦ୍ରୁତ ଗତିରେ ବିକାଶ ପଥରେ ଆଗେଇ ଚାଲିଛି। ଆଗାମୀ ବର୍ଷଗୁଡ଼ିକରେ ଏହି ବିକାଶ ଯାତ୍ରାକୁ ଆହୁରି ସୁଦୃଢ଼ କରିବା ପାଇଁ ସେ ପୁଣିଥରେ ସାଧାରଣ ଜନତାଙ୍କ ପୂର୍ଣ୍ଣ ସହଯୋଗ କାମନା କରିଛନ୍ତି।
