ବିଜୁଳି କାଟ ରାଜନୀତି: ଅନ୍ୟ ରାଜ୍ୟକୁ କେଉଁ ଆଧାରରେ ଶସ୍ତାରେ ବିଜୁଳି ବିକ୍ରି ହେଉଛି ପ୍ରଶ୍ନ କଲା ବିଜେପି

ଭୁବନେଶ୍ୱର: ଭାରତୀୟ ଜନତା ପାର୍ଟି (ବିଜେପି) ଏବଂ କଂଗ୍ରେସ ବିଦ୍ୟୁତ ସେବାକୁ ନେଇ ସରକାର ଉପରେ ବର୍ଷିଛନ୍ତି। ଟାଟା ପାଓ୍ୱାରର ବିଦ୍ୟୁତ୍ ଯୋଗାଣ ସେବାକୁ ନେଇ ସମାଲୋଚନା କରିଛନ୍ତି ବିରୋଧୀ। ବିଜୁଳି କାଟକୁ ନେଇ ନେତାମାନେ ଉଦବେଗ ପ୍ରକାଶ କରିଛନ୍ତି ଯେତେବେଳେ ବିଜୁଳିର ସବୁଠାରୁ ଅଧିକ ଆବଶ୍ୟକତା ରହିଛି କିନ୍ତୁ ଶକ୍ତି ମନ୍ତ୍ରୀ କହୁଛନ୍ତି ବିଜୁଳି କାଟ ହେଉନି ବରଂ ବିଜୁଳି ଟ୍ରିପ ହେଉଛି।

କଂଗ୍ରେସର ବରିଷ୍ଠ ନେତା ବିଜୟ ପଟ୍ଟନାୟକ ବିଜେଡି ନେତୃତ୍ୱାଧୀନ ସରକାର ଏବଂ ଟାଟା ପାଓ୍ୱାରକୁ କଟାକ୍ଷ କରି କହିଛନ୍ତି, ବାସ୍ତବତା ହେଉଛି ଲୋକମାନେ ବିଦ୍ୟୁତ୍ ସେବା ପାଉନାହାନ୍ତି ଯେତେବେଳେ ସେମାନେ ଏହାର ସର୍ବାଧିକ ଆବଶ୍ୟକ କରୁଛନ୍ତି। ବର୍ଷା ନହେଲେ ବି ବିଜୁଳି କାଟ୍ ହେଉଛି। କେତେବେଳେ ବିଜୁଳି କଟିବ ଓ କେତେବେଳେ ପୁନରୁଦ୍ଧାର ହେବ ତାହା ଆକଳନ କରିବା ଅସମ୍ଭବ। ଟାଟା ପାଓ୍ୱାର ଉପରେ ସରକାରଙ୍କର କୌଣସି ନିୟନ୍ତ୍ରଣ ନଥିବା ପରି ମନେ ହେଉଛି। ଜିଲ୍ଲାପାଳମାନେ ଅସହାୟ ହୋଇପଡିଛନ୍ତି, ଏବଂ ଟାଟା ପାଓ୍ୱାରର ଅଧିକାରୀମାନେ ଫୋନ୍ କଲର ଉତ୍ତର ଦେଉ ନଥିବାରୁ ଲୋକେ ଚିନ୍ତାରେ ପଡିଛନ୍ତି ଯେ, ସହାୟତା ପାଇଁ କାହା ସହ ଯୋଗାଯୋଗ କରିବେ।

ସେହିଭଳି ବିଜେପି ମୁଖପାତ୍ର ସତ୍ୟବ୍ରତ ପଣ୍ଡା କହିଛନ୍ତି ଯେ ମୁଖ୍ୟ ଶାସନ ସଚିବ ବିଦ୍ୟୁତ୍ ସମସ୍ୟାକୁ ନେଇ ନିଦ ହଜାଇ ଦେଉଛନ୍ତି। ଭିତ୍ତିଭୂମିକୁ ସୁଦୃଢ଼ କରିବା ପାଇଁ ବିଜେଡି ଗତ ୫ ବର୍ଷ ମଧ୍ୟରେ ୨୦ ହଜାର କୋଟି ଟଙ୍କା ଖର୍ଚ୍ଚ କରିଛି ବୋଲି ଦାବି କରୁଥିବା ବେଳେ ସେମାନେ ଏହି ଅର୍ଥକୁ ଅପବ୍ୟୟ କରିଛନ୍ତି। ଏ ସମ୍ପର୍କରେ ବିଭାଗୀୟ ମନ୍ତ୍ରୀ ସ୍ପଷ୍ଟୀକରଣ ଦେବା ଆବଶ୍ୟକ।

ଟ୍ରାନ୍ସଫରମର, ଗ୍ରୀଡ, ତାର ଭଳି ଆବାଶ୍ୟକୀୟ ଭିତିଭୁମିର ବିକାଶ ପାଇଁ ଗତ ୧୦ ବର୍ଷ ଭିତରେ ଖର୍ଚ୍ଚ ହୋଇଥିବା ୨୦ ହଜାର କୋଟି ଟଙ୍କା ଗଲା କୁଆଡେ ? ଅନ୍ୟ ପଟେ ଭିତିଭୁମି ପାଇଁ ୨୦ହଜାର କୋଟି ଟଙ୍କା ଦିଆଯାଇଥିବାର କଥା କୁହାଯାଇଥିବାବେଳେ ଅଧିଗ୍ରହଣ ସମୟରେ ବିତରକ ଟାଟା ପାଓ୍ୱାର ଏହାକୁ ମାତ୍ର ୧୫୦୦ କୋଟି ଟଙ୍କା ଦର୍ଶାଇଥିଲା, ଯାହାକି ଏକ ବଡ ଆର୍ଥୀକ ଚଂଚକତାକୁ ସ୍ପଷ୍ଟ କରିଛି ଏବଂ ଏହାର ତଦନ୍ତ ହେବା ନିହାତି ଆବଶ୍ୟକ ବୋଲି ବିଜେପି ଦାବି କରିଛି।

ସେହିପରି ୨୦୧୬ ମସିହାରେ ଆରମ୍ଭ ହୋଇ ୫ ବର୍ଷ ଭିତରେ ଶେଷ ହେବାକୁ ଥିବା ଭୁତଳ ବିଜୁଳି ତାର ବସାଇବା କାର୍ଯ୍ୟ ୭ ବର୍ଷ ପରେ କାର୍ଯ୍ୟକ୍ଷମ ହୋଇପାରିଲା ନାହିଁ । ଏଥି ପାଇଁ କେବଳ ରାଜଧାନୀ ଭୁବନେଶ୍ୱରରେ ୨୦୦୦ କୋଟି ଟଙ୍କା ଖର୍ଚ୍ଚ ହୋଇସାରିଥିବାବେଳେ ବର୍ତମାନ ସୁଦ୍ଧା କାର୍ଯ୍ୟକ୍ଷମ ହୋଇନପାରିବା ରାଜ୍ୟ ସରକାରଙ୍କ ବିଫଳତା ନୁହେଁ କି ? ସମସ୍ତ ସର୍ତ ଓ ଚୁକ୍ତିକୁ ଖିଲାପ କରି ବେଦାନ୍ତ କଂପାନୀ ବାର୍ଷିକ ୧୨୫୦ କୋଟି ଟଙ୍କାର ବିଜୁଳି ଲୁଟ୍ କରୁଥିବା ଓଇଆରସି କହିବା ପରେ ରାଜ୍ୟ ସରକାରଙ୍କ ଆଉ ଏକ କେଳେଙ୍କାରୀ ସାମ୍ନାକୁ ଆସିଛି । ଓଡିଶାରେ ଉତ୍ପାଦିତ ହେଉଥିବା ବିଜୁଳିକୁ ବାହାର ରାଜ୍ୟରେ କମ୍ ଦରରେ ବିକ୍ରି କରି ଅନ୍ୟ ରାଜ୍ୟମାନଙ୍କଠାରୁ ଆମ ରାଜ୍ୟ ପାଇଁ ଅଧିକ ଦରରେ କିଣାଯିବା ପଛର ରହସ୍ୟ କଣ ବୋଲି ବିଜେପି ନେତା ସତ୍ୟବ୍ରତ ପଣ୍ଡା ପ୍ରଶ୍ନ କରିଛନ୍ତି ।

ଘଣ୍ଟା ପ୍ରତି ୩୦୦ କିଲୋମିଟର ବେଗରେ ପବନ ବୋହିଲେ ମଧ୍ୟ ବିଜୁଳି ଖୁଣ୍ଟ ପ୍ରବାବିତ ହେବ ନାହିଁ ବୋଲି ୨୦୨୧-୨୨ ବାର୍ଷିକ ରିପୋର୍ଟରେ ଶକ୍ତି ବିଭାଗ ତରଫରୁ ଘୋଷଣା କରାଯାଇଥିଲା । କିନ୍ତୁ ସାମାନ୍ୟ ପବନ ଓ ଝଡବର୍ଷାରେ ବିଜୁଳି ଖୁଣ୍ଟ ମାଟିରେ ମିଶିଯାଉଛି ବୋଲି ବିରୋଧୀ ନେତା କହିଛନ୍ତି।

ବିଜେପି ଓ କଂଗ୍ରେସର ସମାଲୋଚନାର ଜବାବ ଦେଇ ବିଜେଡି ସାଂସଦ ଅମର ପଟ୍ଟନାୟକ ସ୍ୱୀକାର କରିଛନ୍ତି ଯେ ବିତରଣ କମ୍ପାନୀଗୁଡ଼ିକ ହୁଏତ ବିପର୍ଯ୍ୟୟ ପୁନରୁଦ୍ଧାର ଯୋଜନାକୁ ପର୍ଯ୍ୟାପ୍ତ ପରିମାଣରେ ପ୍ରତିଷ୍ଠା ଓ ପରୀକ୍ଷା କରିନଥିବେ। ସେ ଏକ ମୂଲ୍ୟବାନ ଶିକ୍ଷା ଲାଭ କରିବାର ଆବଶ୍ୟକତା ଉପରେ ଗୁରୁତ୍ୱାରୋପ କରିଛନ୍ତି ଏବଂ ବିତରକ କମ୍ପାନୀ ପାଇଁ ନାଗରିକମାନଙ୍କୁ ଆଶ୍ୱାସନା ଦେଇଛନ୍ତି ଯେ କୌଣସି ବଡ଼ ବିପର୍ଯ୍ୟୟ ପରିସ୍ଥିତିରେ ଏକ ନିର୍ଦ୍ଦିଷ୍ଟ ସମୟ ସୀମା ମଧ୍ୟରେ ବିଦ୍ୟୁତ୍ ଯୋଗାଣ ସ୍ୱାଭାବିକ କରାଯିବ।