ନବ ଦାସଙ୍କ ମୃତ୍ୟୁକୁ ତିନି ମାସ: ହତ୍ୟାର କାରଣ ବାବଦରେ କ୍ରାଇମବ୍ରାଞ୍ଚ ନିରବ, ପ୍ରଶ୍ନ ଉଠାଇଲା ବିଜେପି

ଭୁବନେଶ୍ୱର: କ୍ୟାବିନେଟ୍ ମନ୍ତ୍ରୀ ନବ ଦାସଙ୍କ ହତ୍ୟାକାଣ୍ଡର ତିନି ମାସ ପୂରଣ ହୋଇଛି। ଗୋଟିଏ ପଟେ ଝାରସୁଗୁଡାବାସୀ ନିଜର ପ୍ରତିନିଧି ବାଛିବା ପାଇଁ ପ୍ରସ୍ତୁତି ଆରମ୍ଭ କରିଦେଇଥିବା ବେଳେ ଏବେ ବି ରହସ୍ୟ ଘେରରେ ରହିଛି ନବ ଦାସଙ୍କ ହତ୍ୟା ପଛର କାରଣ। ଯାହାର ତଦନ୍ତ କରୁଛି କ୍ରାଇମବ୍ରାଞ୍ଚ। ସମୟ ଗଡିଚାଲୁଥିଲେ ମଧ୍ୟ ଏହି ହେଭିଓ୍ୱେଟ୍ ବିଜୁ ଜନତା ଦଳ ନେତାଙ୍କୁ କାହିଁକି ନିର୍ମମ ଭାବେ ହତ୍ୟା କରାଗଲା, ସେନେଇ କ୍ରାଇମବ୍ରାଞ୍ଚ ମୁହଁ ଖୋଲୁନାହିଁ, ଯାହା ସମଗ୍ର ରାଜ୍ୟକୁ ଅନ୍ଧାରରେ ରଖିଛି। ଏହି ହାଇପ୍ରୋଫାଇଲ୍ ମାମଲାରେ ମୁଖ୍ୟ ଅଭିଯୁକ୍ତ ଗୋପାଳ ଦାସ ମାନସିକ ଭାରସାମ୍ୟ ହରାଇଛି ବୋଲି ରାଜ୍ଯ ସରକାର ପ୍ରମାଣିତ କରିବାକୁ ଚେଷ୍ଟା କରୁଛନ୍ତି  ବୋଲି ପ୍ରମାଣ କରିବାକୁ ଉଦ୍ୟମ କରୁଥିବା ବିଜେପି ଅଭିଯୋଗ କରିଛି।

ବିଜେପି ମୁଖପାତ୍ର  ମନୋଜ ମହାପାତ୍ର, କ୍ରାଇମବ୍ରାଞ୍ଚର ତଦନ୍ତର ଅଗ୍ରଗତି ଉପରେ ପ୍ରଶ୍ନ ଉଠାଇ ଗୋପାଳ ଦାସଙ୍କ ଉପରେ ଆଉ ଏକ ମାନସିକ ସ୍ଥିତି ପରୀକ୍ଷା କରିବା ପାଇଁ ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ମେଣ୍ଟାଲ ହେଲ୍ଥ ଆଣ୍ଡ ନ୍ୟୁରୋ ସାଇନ୍ସ (ନିମହାନ୍ସ) କୁ ଚିଠି ଲେଖିଥିବା କହିଛନ୍ତି, ଯିଏକି ଚୌଦ୍ୱାର ଜେଲରେ ଏବେ ବିଚାର ବିଭାଗୀୟ ହାଜତରେ ଅଛନ୍ତି। ଏହି ଚିଠି ପଠାଇବା ପାଇଁ କ୍ରାଇମବ୍ରା଼ଞ୍ଚକୁ କିଏ ନିର୍ଦ୍ଦେଶ ଦେଇଛି ତାହା ଜାଣିବା ପାଇଁ ମନୋଜ ମହାପାତ୍ର ପ୍ରଶ୍ନ କରିଛନ୍ତି ।

ଗୋପାଳ ଦାସ ବର୍ତମାନ ନ୍ୟାୟିକ ହେପାଜତରେ ଏବଂ ଜେଲରେ ରହିଛି । ଅତୀତରେ ଗୋପାଳକୁ ପାଗଳ ବୋଲି ପ୍ରମାଣ କରିବାରେ ବିଫଳ ହୋଇଥିବା କ୍ରାଇମବ୍ରାଂଚ ବର୍ତମାନ ସମସ୍ତ ଆଇନକାନୁନ ଓ ନୀତିନିୟମକୁ ଜଳାଞ୍ଜଳୀ ଦେଇ ଗୋପାଳର ମାନସିକ ପରୀକ୍ଷା ପାଇଁ ମାନ୍ୟବର କୋର୍ଟଙ୍କ ବିନାନୁମତିିରେ ସିଧାସଳଖ ବାଙ୍ଗାଲୋର ସ୍ଥିତ ନିମ୍‌ହାନ୍ସକୁ ଚିଠି ଲେଖିଛନ୍ତି । ଏହା ଦ୍ୱାରା କ୍ରାଇମବ୍ରାଂଚ କିମ୍ବା ରାଜ୍ୟ ସରକାରଙ୍କ ମାନ୍ୟବର ନ୍ୟାୟାଳୟଙ୍କ ପ୍ରତି ଆଦୈା ସମ୍ମାନ ନଥିବାର ସ୍ପଷ୍ଟ ହେଉଛି ଏବଂ ଯେଣତେଣ ଭାବେ ଗୋପାଳ ଦାସକୁ ପାଗଳର ଆଖ୍ୟା ଦେବା କାର୍ଯ୍ୟରେ ରାଜ୍ୟ ସରକାର ଲାଗିପଡିଛନ୍ତି ବୋଲି ମନୋଜ ମହାପାତ୍ର କହିଛନ୍ତି ।

ହତ୍ୟାକାଣ୍ଡର କାରଣ ଓ ତଦନ୍ତ ପ୍ରସଙ୍ଗରେ ଭଗବାନଙ୍କ ଉପରେ ପୋଲିସ ଡିଜି ଭରସା କରୁଥିବାବେଳେ ବର୍ତମାନ ନବ ବାବୁଙ୍କ ପରିବାର ମଧ୍ୟ ଭଗବାନ ଭରସାରେ ରହିବା ରାଜ୍ୟର ବିପର୍ଯ୍ୟସ୍ତ ଆଇନଶୃଙ୍ଖଳା ଉପରେ ବିରାଟ ପ୍ରଶ୍ନବାଚୀ ସୃଷ୍ଟି କରିିଛି । ରାଜ୍ୟର ଆଇନ ବ୍ୟବସ୍ଥା ଉପରେ ଓଡିଶାବାସୀଙ୍କ ଆଉ ଭରସା ନାହିଁ ବୋଲି ରାଜ୍ୟ ମୁଖପାତ୍ର ମନୋଜ ମନୋଜ ମହାପାତ୍ର କହିଛନ୍ତି ।

ବିଜେପିର ଅଭିଯୋଗର ଜବାବରେ କ୍ରାଇମବ୍ରାଞ୍ଚ ବିଭିନ୍ନ ଦିଗରୁ ତଦନ୍ତ କରୁଥିବାରୁ ଏହାକୁ ନେଇ ରାଜନୀତି ନକରିବାକୁ ବିଜେଡି ଅନୁରୋଧ କରିଛି। ବିଜେଡି ବିଧାୟକ ଶଶିଭୂଷଣ ବେହେରା କହିଛନ୍ତି ଯେ ନବ ଦାସଙ୍କ ଝିଅ ଝାରସୁଗୁଡା ଉପନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ, ଏହି ହତ୍ୟାକାଣ୍ଡର ତଦନ୍ତ ପାଇଁ ସରକାର ସମସ୍ତ ପ୍ରକାର ପଦକ୍ଷେପ ନେଉଛନ୍ତି।

ଜାନୁଆରୀ ୨୯ ତାରିଖରେ ନବ ଦାସଙ୍କୁ ଝାରସୁଗୁଡ଼ା ଜିଲ୍ଲା ବ୍ରଜରାଜନଗର ସ୍ଥିତ ଗାନ୍ଧୀ ଛକ ନିକଟରେ ଗୋପାଳ ଦାସ ଗୁଳି କରିଥିଲେ ଏବଂ ଏହାର କିଛି ଘଣ୍ଟା ପରେ ନବ ଦାସଙ୍କ ମୃତ୍ୟୁ ହୋଇଥିଲା।