ନୂଆଦିଲ୍ଲୀ: ଇଡିରେ ହାଜର ହେଲେନି ତୃଣମୁଳ କଂଗ୍ରେସ ନେତ୍ରୀ ମହୁଆ ମୈତ୍ର । ଇଡିର ସମନକୁ ଅଣଦେଖା କରି ମହୁଆ କହିଛନ୍ତି ଯେ, ସେ ଆଜି କୃଷ୍ଣନଗର ଲୋକସଭା ଆସନରେ ପ୍ରଚାର କରିବାରେ ବ୍ୟସ୍ତ ଅଛନ୍ତି । ତେଣୁ ସେ ଆଜି ଇଡି କାର୍ଯ୍ୟାଳୟରେ ହାଜର ହୋଇପାରିବେ ନାହିଁ । ଦିଲ୍ଲୀର ଇଡି କାର୍ଯ୍ୟାଳୟରେ ପଚରାଉଚରା ପାଇଁ ମହୁଆ ମୈତ୍ରଙ୍କୁ ହାଜର ହେବାକୁ କୁହାଯାଇଥିଲା।
ବୈଦେଶିକ ବିନିମୟ ପରିଚାଳନା ଅଧିନିୟମ (ଫେମା) ଉଲ୍ଲଂଘନ ମାମଲାରେ ଏନଫୋର୍ସମେଣ୍ଟ ନିର୍ଦ୍ଦେଶାଳୟ (ଇଡି) ମହୁଆ ମୈତ୍ରଙ୍କୁ ଇଡି କାର୍ଯ୍ୟାଳୟରେ ହାଜର ହେବାକୁ ନୋଟିସ ପଠାଇଥିଲା । ଏହାସହ ଦୁବାଇର ବ୍ୟବସାୟୀ ଦର୍ଶନ ହିରାନନ୍ଦାନୀଙ୍କୁ ମଧ୍ୟ ଇଡି ସମନ ଜାରି କରିଥିଲା ।
ଟିଏମସିର ୪୯ ବର୍ଷୀୟ ନେତ୍ରୀ ମହୁଆ ମୈତ୍ରୀଙ୍କୁ ଏହା ପୂର୍ବରୁ ମଧ୍ୟ କେନ୍ଦ୍ରୀୟ ଏଜେନ୍ସି ୨ଥର ସମନ ପଠାଇଛି । କିନ୍ତୁ ସେ ସରକାରୀ କାର୍ଯ୍ୟକୁ କାରଣ ଦର୍ଶାଇ ନୋଟିସ ସ୍ଥଗିତ ରଖିବାକୁ ଦାବି କରିଥିଲେ । ସଂସଦରେ ‘ଅନୈତିକ ଆଚରଣ’ ପାଇଁ ଡିସେମ୍ବରରେ ମୈତ୍ରଙ୍କୁ ଲୋକସଭାରୁ ବହିଷ୍କାର କରାଯାଇଥିଲା। ତଥାପି ତାଙ୍କ ଦଳ ତାଙ୍କୁ ଆଗାମୀ ଲୋକସଭା ନିର୍ବାଚନରେ ପଶ୍ଚିମବଙ୍ଗର କୃଷ୍ଣନଗର ଆସନରୁ ପ୍ରାର୍ଥୀ କରିଛି।
ସୂଚନାଯୋଗ୍ୟ ଯେ ବିଜେପି ସାଂସଦ ନିଶିକାନ୍ତ ଦୁବେ ମହଆଙ୍କ ବିରୋଧରେ ଅନେକ ଅଭିଯୋଗ କରିଥିଲେ । ନିଶିକାନ୍ତ କହିଥିଲେ ଯେ ମହୁଆ ବ୍ୟବସାୟୀ ହିରାନନ୍ଦାନୀଙ୍କଠାରୁ ମହଙ୍ଗା ଉପହାର ଏବଂ ଟଙ୍କା ନେଇ ଆଦାନୀ ଗ୍ରୁପ୍ ଏବଂ ପ୍ରଧାନମନ୍ତ୍ରୀ ମୋଦୀଙ୍କୁ ଟାର୍ଗେଟ କରିବାକୁ ଲୋକସଭାରେ ପ୍ରଶ୍ନ ପଚାରିଥିଲେ ।