କେନ୍ଦ୍ରାପଡା: ସମାବେଶିତାକୁ ପ୍ରୋତ୍ସାହନ ଦେବାକୁ ଯାଇ କେନ୍ଦ୍ରାପଡ଼ା ପୌରପାଳିକା ପକ୍ଷରୁ ସହରର ଏକ ଶ୍ମଶାନର ନାମ ‘ବ୍ରାହ୍ମଣ ଶ୍ମଶାନ’ରୁ ‘ସ୍ୱର୍ଗଦ୍ୱାର’କୁ ପରିବର୍ତ୍ତନ କରାଯାଇଛି। କେବଳ ବ୍ରାହ୍ମଣମାନଙ୍କୁ ଅନ୍ତିମ ସଂସ୍କାର କରିବାକୁ ଅନୁମତି ଦେବା ପାଇଁ ଶ୍ମଶାନର ପ୍ରଥା ଉପରେ ଗଣମାଧ୍ୟମରେ ଖବର ପ୍ରକାଶ ପାଇବା ପରେ ଏହି ନିଷ୍ପତ୍ତି ନିଆଯାଇଛି।
ବହୁ ସ୍ଥାନୀୟ ଲୋକ ଓ ଦଳିତ ନେତା ଏହାକୁ ସମାଲୋଚନା କରିବା ପରେ ପୌରପାଳିକା ପକ୍ଷରୁ ମଙ୍ଗଳବାର ଏଭଳି ଏକ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଆଉ ଜାତିବିହୀନ ଶ୍ମଶାନ ଚଳାଇବା ପାଇଁ ପୌରପାଳିକା ପକ୍ଷରୁ କୁହାଯାଇଛି।
କେନ୍ଦ୍ରାପଡା ପୌରପାଳିକାର କାର୍ଯ୍ୟନିର୍ବାହୀ ଅଧିକାରୀ ପ୍ରଫୁଲ୍ଲ ଚନ୍ଦ୍ର ବିଶ୍ୱାଳ କହିଛନ୍ତି, ପୌରପାଳିକା ‘ବ୍ରାହ୍ମଣ ଶ୍ମଶାନ’ ନାମକୁ ହଟାଇ ‘ସ୍ୱର୍ଗଦ୍ୱାର’ ନାମକୁ ବଦଳାଇ ଦେଇଛି। ଏବେ ସମସ୍ତ ହିନ୍ଦୁ ଏହି ଶ୍ମଶାନରେ ନିଜ ସମ୍ପର୍କୀୟଙ୍କ ଅନ୍ତିମ ସଂସ୍କାର କରିବାର ଅଧିକାର ପାଇଛନ୍ତି। ଯଦି କେହି ଏଠାରେ ଶବ ସତ୍କାର କରିବାକୁ ବାରଣ କରନ୍ତି, ତେବେ ଆମେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବୁ। ଏହି ନିଷ୍ପତ୍ତିକୁ ଦଳିତ ନେତା ଓ କର୍ମୀମାନେ ସ୍ୱାଗତ କରିଛନ୍ତି।
ପ୍ରଶାସନ ପକ୍ଷରୁ ଶ୍ମଶାନର ନାମ ପରିବର୍ତ୍ତନ କରାଯାଇଥିବାରୁ ଏହା ଆମ ପାଇଁ ବିଜୟ ବୋଲି କହିଛନ୍ତି ଦଳିତ ନେତା ତଥା ଓଡ଼ିଶା ଦଳିତ ସମାଜର ଜିଲ୍ଲା ସଭାପତି ନଗେନ୍ଦ୍ର ଜେନା।
ଏଥିସହ ସମସ୍ତ ହିନ୍ଦୁଙ୍କୁ ଶ୍ମଶାନରେ ସେମାନଙ୍କ ସମ୍ପର୍କୀୟଙ୍କ ଅନ୍ତିମ ସଂସ୍କାର କରିବାକୁ ଅନୁମତି ଦେବାକୁ ପୌରସଂସ୍ଥାକୁ କର୍ତ୍ତୃପକ୍ଷ ନିର୍ଦ୍ଦେଶ ଦେଇଛନ୍ତି।
ଓଡ଼ିଶା ଦଳିତ ସମାଜର ଏକ ପ୍ରତିନିଧି ଦଳ ଅତିରିକ୍ତ ଜିଲ୍ଲାପାଳ (ଏଡିଏମ)ଙ୍କ ନିକଟରେ ଦାବି କରିଥିଲା ଶ୍ମଶାନରେ ଶବ ସତ୍କାର କରିବା ପାଇଁ ଜାତି ନିର୍ବିଶେଷରେ ସମସ୍ତ ହିନ୍ଦୁଙ୍କୁ ଅନୁମତି ଦେବା ଏବଂ ଏହାର ନାମ ପରିବର୍ତ୍ତନ କରିବା ପାଇଁ ଆବଶ୍ୟକ ପଦକ୍ଷେପ ନିଅନ୍ତୁ।
କର୍ତ୍ତୃପକ୍ଷଙ୍କ ଏହା ସ୍ୱାଗତଯୋଗ୍ୟ ପଦକ୍ଷେପ ବୋଲି ଦଳିତ ସମାଜର ନେତା ନିଲୁ ମହାପାତ୍ର କହିଛନ୍ତି। ଆମେ ସୁନିଶ୍ଚିତ କରିବୁ ଯେ ଶ୍ମଶାନ ସମସ୍ତ ହିନ୍ଦୁଙ୍କ ପାଇଁ ସୁଗମ ହେବ। ଶ୍ମଶାନର ନାମ ପରିବର୍ତ୍ତନ ନିଷ୍ପତ୍ତିକୁ ସମାଜରେ ସମାନତା ଓ ସମାବେଶନକୁ ପ୍ରୋତ୍ସାହିତ କରିବା ଦିଗରେ ଏକ ପଦକ୍ଷେପ ବୋଲି କୁହାଯାଉଛି।
Comments are closed.