Bride Kidnapped at Gunpoint: ମଝି ରାସ୍ତାରୁ ବନ୍ଧୁକ ଦେଖାଇ କନ୍ୟାଙ୍କୁ ଉଠାଇ ନେଲେ ପୂର୍ବତନ ପ୍ରେମିକ, ଥାନାରେ ପହଞ୍ଚିଲେ ବର…

ବଲାଙ୍ଗୀର: ବିବାହ ସାରି କନ୍ୟାକୁ ସାଙ୍ଗରେ ଧରି ଘର ବାହୁଡୁ ଥିଲେ ବର, ରାସ୍ତାରେ ନବ ବଧୂଙ୍କୁ ବନ୍ଧୁକ ମୁନରେ ଉଠେଇ ନେଲେ ପୂର୍ବତନ ପ୍ରେମିକ। ଏଭଳି କିଛି ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି ବଲାଙ୍ଗୀର ଜିଲ୍ଲାରୁ…ଜଣେ ନବ ବିବାହିତ ମହିଳାଙ୍କୁ ତାଙ୍କ ପୂର୍ବତନ ପ୍ରେମିକ ବନ୍ଧୁକ ମୁନରେ ଅପହରଣ କରିଥିବା ଅଭିଯୋଗ ହୋଇଛ।

ସୂଚନା ଅନୁଯାୟୀ, ବର ବିବାହ ପାଇଁ ବଲାଙ୍ଗୀର ଜିଲ୍ଲାର କାମାଖି ନଗରରୁ କଣ୍ଟାମାଲ ଅଞ୍ଚଳକୁ ବରଯାତ୍ରୀ ନେଇ ଯାଇଥିଲେ। ବିବାହ ଉତ୍ସବ ସରିବା ପରେ, ସେ କନ୍ୟା ଏବଂ ବରଯାତ୍ରୀଙ୍କ ସହିତ ତାଙ୍କ ତାଙ୍କ ଘରକୁ ଫେରୁଥିଲେ।

ହେଲେ ବର ଗାଡିଗୁଡ଼ିକ ଫେରିବା ବାଟରେ, କନ୍ୟାର ପୂର୍ବତନ ପ୍ରେମିକ, କିଛି ସହଯୋଗୀଙ୍କ ସହିତ, ମଝି ରାସ୍ତାରେ ସେହି ବର ଦଳଙ୍କୁ ଅଟକାଇଥିବା ଜଣାପଡ଼ିଛି। ଅଭିଯୁକ୍ତମାନେ ବନ୍ଧୁକ ଦେଖାଇ ବର ଏବଂ ଅନ୍ୟମାନଙ୍କୁ ଧମକାଇ କନ୍ୟାକୁ ଘଟଣାସ୍ଥଳରୁ ବଳପୂର୍ବକ ନେଇଯାଇଥିବା ଅଭିଯୋଗ ହୋଇଛି।

ପରେ ବର ଏବଂ ତାଙ୍କ ସାଥୀମାନେ ଅସହାୟ ହୋଇପଡ଼ିଥିଲେ। ଏହାପରେ ଘରକୁ ନଯାଇ ସିଧା ଥାନା ମୁହଁ ହୋଇଥିଲା ବର ଗାଡ଼ି। ବର ତରଭା ପୋଲିସ ଷ୍ଟେସନରେ ପହଞ୍ଚି ଘଟଣା ସମ୍ପର୍କରେ ଅଭିଯୋଗ କରିଥିଲେ। ପୋଲିସ ଏହି ଘଟଣାର ତଦନ୍ତ ଆରମ୍ଭ କରିଛି ଏବଂ ଅଭିଯୁକ୍ତମାନଙ୍କୁ ଖୋଜିବା ଏବଂ ମହିଳାଙ୍କୁ ଉଦ୍ଧାର କରିବାକୁ ଚେଷ୍ଟା କରୁଛି।