ଭୁବନେଶ୍ୱର: ଯୌତୁକ ଜୁଇରେ ଆଉ ଜଣେ ବଧୂ । ଯୌତୁକ ପାଇଁ ଶାଶୁ ଘର ଲୋକେ ଜଣେ ବୋହୂକୁ ମାରି ଦେଇଥିବା ଅଭିଯୋଗ ହୋଇଛି । ଘଟଣା ଘଟିଛି ରାଜଧାନୀ ଭୁବନେଶ୍ୱରରେ । ମୃତ ମହିଳାଙ୍କ ନାଁ ଝିଲି ସେଠୀ ।
ଅଭିଯୋଗ ଅନୁସାରେ, ସାମନ୍ତରାପୁରର ଚନ୍ଦନ ସେଠୀଙ୍କୁ ଝିଲି ଗତ ୩ ବର୍ଷ ତଳେ ବିବାହ କରିଥିଲେ । ବାହାଘର ପରଠାରୁ ଝିଲିଙ୍କୁ ତାଙ୍କ ଶାଶୁ ଘର ଲୋକେ ସୁନା ଚେନ୍ ଓ କାର୍ ବାପ ଘରୁ ଆଣିବାକୁ କହୁଥିଲେ । ଏନେଇ ତାଙ୍କୁ ସବୁବେଳେ ଶାରୀରିକ ଓ ମାନସିକ ନିର୍ଯାତନା ଦେଇ ଆସୁଥିଲେ ବୋଲି ଝିଲିଙ୍କ ବାପ ଘର ଲୋକ ଅଭିଯୋଗ କରିଛନ୍ତି । ଗତ ଶନିବାର ଦିନ ଝିଲିଙ୍କ ମୃତ୍ୟୁ ଘଟିଥିଲା । ଏନେଇ ତାଙ୍କ ଝିଲିଙ୍କ ଶାଶୁ ଘର ଲୋକେ ତାଙ୍କ ବାପ ଘର ଲୋକଙ୍କୁ ଜଣାଇଥିଲେ ।
ଖବରପାଇ ଝିଲିଙ୍କ ବାପଘର ଲୋକେ ପହଞ୍ଚିଥିଲେ । ଝିଲିଙ୍କୁ ତାଙ୍କ ଶାଶୁ ଘର ଲୋକେ ମାରି ଦେଇଥିବା ତାଙ୍କ ମାଆ ଅଭିଯୋଗ କରିଛନ୍ତି । ଏନେଇ ପରିବାର ଲୋକେ ଲିଙ୍ଗରାଜ ଥାନାରେ ଅଭିଯୋଗ କରିଛନ୍ତି । ପୁଲିସ୍ ଏହି ଘଟଣାରେ ଝିଲିଙ୍କ ସ୍ୱାମୀଙ୍କୁ ଅଟକ ରଖି ପୁଚରା ଉଚରା କରୁଛି ।