ହେବ କି ମଧ୍ୟବର୍ତ୍ତୀକାଳୀନ ନିର୍ବାଚନ…ନିର୍ବାଚନ ଲଢିପାରିବେ କି ମସ୍କ?, ନୂଆ ଦଳ ଘୋଷଣା ପରେ ଉଠିଲା ପ୍ରଶ୍ନ…..

ନୂଆଦିଲ୍ଲୀ: ଶିଳ୍ପପତି ତଥା କୋଟିପତି ଏବଂ ଟେସଲାର ସିଇଓ ଏଲନ ମସ୍କ ଏବେ ରାଜନୀତିରେ ପ୍ରବେଶ କରିଛନ୍ତି। ସେ ଶନିବାର ଦିନ ତାଙ୍କର ନୂତନ ଦଳ “ଆମେରିକା ପାର୍ଟି ଇନ୍ ଆମେରିକା” ଆରମ୍ଭ କରିବାର ଘୋଷଣା କରିଛନ୍ତି । ଏଲୋନ ମସ୍କ ସୋସିଆଲ ମିଡିଆ ପୁର୍ବରୁ ଏନେଇ ଏକ୍ସରେ ସଙ୍କେତ ଦେଇଥିଲେ । ଆଉ ବିଗ୍ ବିଉଟିଫିଲ୍ ବିଲ୍ ସିନେଟରେ ପାରିତ ହେବା ପରେ ଗତକାଲି ବିଧିବଦ୍ଧ ଭାବେ ନିଜର ନୂଆ ଦଳ ଘୋଷଣା କରିଛନ୍ତି ମସ୍କ ।

ତେବେ ଏବେ ଏଲନ ମସ୍କ ରାଜନୀତିରେ ପ୍ରବେଶ କରିବା ପରେ ଅନେକ ଚର୍ଚ୍ଚା ସୃଷ୍ଟି ହୋଇଛି, ଆସନ୍ତା ବର୍ଷ ଆମେରିକାରେ ମଧ୍ୟବର୍ତ୍ତୀକାଳୀନ ନିର୍ବାଚନ ହେବ କି? କ’ଣ ମସ୍କ ଆମେରିକାର ରାଷ୍ଟ୍ରପତି ପଦ ପାଇଁ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବିରୁଦ୍ଧରେ ଛିଡା ହେବେ?, ତେବେ ଏହାର ଉତ୍ତର ହେଉଛି କେବେ ବି ନୁହେଁ । ମସ୍କ ଆମେରିକାର ରାଷ୍ଟ୍ରପତି ନିର୍ବାଚନରେ ​​ପ୍ରତିଦ୍ୱନ୍ଦ୍ୱିତା କରିପାରିବେ ନାହିଁ। କାରଣ ଆମେରିକାର ସମ୍ବିଧାନ ଅନୁସାରେ, କେବଳ ସେହି ଲୋକମାନେ ରାଷ୍ଟ୍ରପତି ହୋଇପାରିବେ ଯେଉଁମାନେ ଆମେରିକାରେ ଜନ୍ମଗ୍ରହଣ କରିଛନ୍ତି। ଏଲୋନ ମସ୍କ ଦକ୍ଷିଣ ଆଫ୍ରିକାରେ ଜନ୍ମଗ୍ରହଣ କରିଥିଲେ ଏବଂ ପରେ ସେ ୨୦୦୨ ମସିହାରେ ଆମେରିକୀୟ ନାଗରିକତା ଗ୍ରହଣ କରିଥିଲେ । ଆଉ ଏହାକୁ ନେଇ ସେ ନିଜେ ସ୍ପଷ୍ଟ କରିଛନ୍ତି, ମୁଁ ଆଫ୍ରିକାରେ ଜନ୍ମଗ୍ରହଣ କରିଥିବାରୁ ରାଷ୍ଟ୍ରପତି ହୋଇପାରିବି ନାହିଁ।

କିନ୍ତୁ ହଁ ତାଙ୍କ ପାର୍ଟି ଏଥିରେ ଅଂଶଗ୍ରହଣ କରିପାରିବ । ମସ୍କ ତାଙ୍କ ପାର୍ଟି ଘୋଷଣା କରିବା ପରେ ଯେତେବେଳେ ଜଣେ ବ୍ୟବହାରକାରୀ ଏଲୋନ ମସ୍କଙ୍କୁ ପଚାରିଲେ ଯେ ସେ ୨୦୨୬ ମଧ୍ୟବର୍ତ୍ତୀକାଳୀନ ନିର୍ବାଚନ ଲଢ଼ିବେ ନା ୨୦୨୮ ରାଷ୍ଟ୍ରପତି ନିର୍ବାଚନରେ ​​ପ୍ରତିଦ୍ୱନ୍ଦ୍ୱିତା କରିବେ, ମସ୍କ ଉତ୍ତର ଦେଇଥିଲେ – “ପରବର୍ତ୍ତୀ ବର୍ଷ।” ଏହାର ଅର୍ଥ ହେଉଛି ମସ୍କଙ୍କ ଆମେରିକା ପାର୍ଟି ୨୦୨୬ ମଧ୍ୟବର୍ତ୍ତୀକାଳୀନ ନିର୍ବାଚନରେ ​​ଅଂଶଗ୍ରହଣ କରିବ। ଏହି ନିର୍ବାଚନଗୁଡ଼ିକ ନଭେମ୍ବର ୨୦୨୬ରେ ଅନୁଷ୍ଠିତ ହେବ, ଯେଉଁଥିରେ ଆମେରିକୀୟ ସଂସଦର ଅନେକ ଆସନ (ସଦନ ଏବଂ ସିନେଟ୍) ପାଇଁ ଭୋଟ୍ ନିଆଯିବ।

ବିଶ୍ୱର ସବୁଠାରୁ ଧନୀ ବ୍ୟକ୍ତି, ଏଲୋନ୍ ମସ୍କ, ଯାହାଙ୍କ ସମ୍ପତ୍ତି ଫୋବର୍ସ ଅନୁଯାୟୀ ୪୦୫ ବିଲିୟନ ଡଲାର ବୋଲି ଆକଳନ କରାଯାଇଛି, ସେ ତାଙ୍କ ନୂତନ ଦଳ, ଆମେରିକା ପାର୍ଟିର ସବୁଠାରୁ ବଡ଼ ଦାତା ହୋଇପାରନ୍ତି । ହିନ୍ଦୁସ୍ତାନ ଟାଇମ୍ସର ଏକ ରିପୋର୍ଟ ଅନୁଯାୟୀ, ମସ୍କଙ୍କ ଆମେରିକା ପିଏସି ନାମକ ଗୋଷ୍ଠୀ ୨୦୨୪ ମସିହାରେ ଡୋନାଲ୍ଡ ଟ୍ରମ୍ପଙ୍କ ନିର୍ବାଚନରେ ​​ପ୍ରାୟ ୩୩୭ କୋଟି ଟଙ୍କା ଖର୍ଚ୍ଚ କରିସାରିଛି। ଏବେ ବିଶ୍ୱାସ କରାଯାଉଛି ଯେ ଏହି ଟଙ୍କା ମସ୍କଙ୍କ ନୂତନ ଦଳକୁ ସାହାଯ୍ୟ କରିବା ପାଇଁ ବ୍ୟବହାର କରାଯାଇପାରିବ। ତଥାପି, ୨୦୨୫ମସିହାରେ କେତେ ଟଙ୍କା ଖର୍ଚ୍ଚ ହେବ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।

ବର୍ତ୍ତମାନ, ମସ୍କଙ୍କ ବ୍ୟତୀତ ଏଲୋନ ମସ୍କଙ୍କ ନୂତନ ଦଳରେ ଅନ୍ୟ କୌଣସି ନେତାଙ୍କ ନାମ ଆନୁଷ୍ଠାନିକ ଭାବରେ ଘୋଷଣା କରାଯାଇ ନାହିଁ, କିନ୍ତୁ ସୋସିଆଲ ମିଡିଆରେ ଅନେକ ନାମକୁ ନେଇ ଚର୍ଚ୍ଚା ସୃଷ୍ଟି ହୋଇଛି । କେତେକ ବିଶ୍ୱାସ କରନ୍ତି ଯେ ଆମେରିକାର କଂଗ୍ରେସ ସଦସ୍ୟ ଥମାସ ମାସି, ଯିଏ ସମ୍ପ୍ରତି ଟ୍ରମ୍ପଙ୍କ ‘ବିଗ୍ ବିୟୁଟିଫୁଲ୍ ବିଲ୍’ ବିରୋଧରେ ଭୋଟ୍ ଦେଇଛନ୍ତି, ସେ ମସ୍କଙ୍କ ରାଜନୈତିକ ପଦକ୍ଷେପରେ ସାମିଲ ହୋଇପାରନ୍ତି। ତଥାପି, ଏହା ଏପର୍ଯ୍ୟନ୍ତ ନିଶ୍ଚିତ ହୋଇନାହିଁ। ସେହିପରି ଫରୱାର୍ଡ ପାର୍ଟିର ସହ-ପ୍ରତିଷ୍ଠାତା ଆଣ୍ଡ୍ରୁ ୟାଙ୍ଗ ମସ୍କଙ୍କ ସହିତ ସହଯୋଗ କରିବାକୁ ଇଚ୍ଛା ପ୍ରକାଶ କରିଛନ୍ତି। ୟାଙ୍ଗ ଏବଂ ମସ୍କ ଉଭୟ ବର୍ତ୍ତମାନର ଦୁଇ-ଦଳୀୟ ବ୍ୟବସ୍ଥା (ଡେମୋକ୍ରାଟ-ରିପବ୍ଲିକାନ) ପ୍ରତି ଅସନ୍ତୁଷ୍ଟ ଏବଂ ରାଜନୈତିକ ପରିବର୍ତ୍ତନର ସପକ୍ଷରେ ବିବେଚିତ।

ଟ୍ରମ୍ପଙ୍କ ଘନିଷ୍ଠ ସହଯୋଗୀ ଲୌରା ଲୁମରଙ୍କ ଅନୁଯାୟୀ, ଟକର କାର୍ଲସନ, ମାର୍ଜୋରି ଟେଲର ଗ୍ରୀନ (MTG) ଏବଂ ଥମାସ ମାସିଙ୍କ ଭଳି ଲୋକପ୍ରିୟ ନେତାମାନେ ଏଲୋନ ମସ୍କଙ୍କ ‘ଆମେରିକା ପାର୍ଟି’ର ଦାୟିତ୍ୱ ନେଇପାରିବେ। ଲୌରା ଲୁମର ଦାବି କରିଛନ୍ତି ଯେ ଏହି ତିନି ନେତା ମସ୍କଙ୍କ ନୂତନ ରାଜନୈତିକ ଦଳରେ ଯୋଗ ଦେଇ ଏହାର ନେତୃତ୍ୱ ନେଇପାରିବେ। ତଥାପି, ଏ ସମ୍ପର୍କରେ ଏଲୋନ ମସ୍କ କିମ୍ବା ଦଳ ପକ୍ଷରୁ ଏପର୍ଯ୍ୟନ୍ତ କୌଣସି ଆନୁଷ୍ଠାନିକ ଘୋଷଣା କରାଯାଇ ନାହିଁ।