ଲକ୍ଷ୍ନୋ: କଂଗ୍ରେସର ବରିଷ୍ଠ ନେତା ଆଚାର୍ଯ୍ୟ ପ୍ରମୋଦ କୃଷ୍ଣମଙ୍କ ବଡ ବିବୃତ୍ତି । ବିଏସପି ମୁଖ୍ୟ ମାୟାବତୀଙ୍କୁ ନେଇ ଏକ ବଡ଼ ଦାବି କରିଛନ୍ତି କୃଷ୍ଣମ । ସେ କହିଛନ୍ତି ଯେ, ବିରୋଧୀ ଦଳର ଗଠବନ୍ଧନ ‘ଇଣ୍ଡିଆ’ରେ ବହୁଜନ ସମାଜ ପାର୍ଟି (ବିଏସପି) ମୁଖ୍ୟ ମାୟାବତୀଙ୍କୁ ଅନ୍ତର୍ଭୁକ୍ତ ନକଲେ ଭାରତୀୟ ଜନତା ପାର୍ଟି (ବିଜେପି)ର ପରାଜିତ ହୋଇପାରିବ ନାହିଁ । କୃଷ୍ଣମ କହିଛନ୍ତି ଯେ, ‘ମୁଁ ଭାବୁଛି ମାୟାବତୀ ଉତ୍ତରପ୍ରଦେଶର ଜଣେ ଏପରି ନେତା ଯିଏ ୧୮ ରୁ ୨୨ ପ୍ରତିଶତ ଭୋଟ୍ ଉପରେ ପ୍ରଭାବ ପକାଇବାକୁ ସକ୍ଷମ ଅଟନ୍ତି । ଯଦି ଭଉଣୀ ମାୟାବତୀ ବିନା ‘ଇଣ୍ଡିଆ’ ଗଠବନ୍ଧନ ଗଠନ ହୁଏ, ତେବେ ଏହାକୁ ‘ମହା ଗଠବନ୍ଧନ’ ବୋଲି କହିବାର କୌଣସି ଯଥାର୍ଥତା ନାହିଁ ।
ସେ କହିଛନ୍ତି, ‘ଯଦି ଭାରତୀୟ ଜନତା ପାର୍ଟିକୁ ହରାଇବାର ଅଛି, ତେବେ ସମାଜବାଦୀ ପାର୍ଟି, ରାଷ୍ଟ୍ରୀୟ ଲୋକ ଦଳ ଏବଂ କଂଗ୍ରେସ ସହିତ ମୟାବତୀଙ୍କୁ ମଧ୍ୟ ‘ଇଣ୍ଡିଆ’ ଗଠବନ୍ଧନରେ ଯୋଗଦେବା ଉଚିତ । ଏଥିପାଇଁ ମୁଁ ତାଙ୍କୁ ନିମନ୍ତ୍ରଣ କରୁଛି । ସେ ଆହୁରି କହିଛନ୍ତି, ‘ଯଦି ଭଉଣୀ ମାୟାବତୀ ଏହି ମେଣ୍ଟକୁ ଆସନ୍ତି ନାହିଁ, ତେବେ ପିଏମ ମୋଦୀଙ୍କୁ ପରାସ୍ତ କରାଯାଇପାରିବ ନାହିଁ । ମୋର ବିଶ୍ୱାସ ଯେ ମାୟାବତୀଙ୍କୁ ସାଙ୍ଗରେ ନନେଇ ଉତ୍ତରପ୍ରଦେଶରେ ବିଜେପିକୁ ପରାସ୍ତ କରିବା ସମ୍ଭବ ନୁହେଁ ।
ଅନ୍ୟପଟେ, ଗତକାଲି ଗଠବନ୍ଧନ ‘ଇଣ୍ଡିଆ’ରେ ସାମିଲ ହେବା ନେଇ ନିଜର ମନ୍ତବ୍ୟ ରଖିଛନ୍ତି ବିଏସପି ମୁଖ୍ୟ । ଦଳର ସଭାପତି ମାୟାବତୀ ସ୍ପଷ୍ଟ ଭାବେ କହିଛନ୍ତି ଯେ, ବିଏସପି କେବଳ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବ । ବିରୋଧୀ ଦଳର ଏହା ଗଠବନ୍ଧନ ହେଉ କି ମହାଗଠବନ୍ଧନ ଯାହା ବି ହେଉ, ଲୋକସଭା ନିର୍ବାଚନ ପୂର୍ବରୁ ମଧ୍ୟ ଏହା ଭାଙ୍ଗିଯିବ । କଂଗ୍ରେସ ନେତା କୃଷ୍ଣମ ୨୦୧୯ ଲୋକସଭା ନିର୍ବାଚନରେ କଂଗ୍ରେସ ଟିକେଟରେ ଲକ୍ଷ୍ନୌରୁ ପ୍ରତିଦ୍ୱନ୍ଦ୍ୱିତା କରିଥିଲେ ମଧ୍ୟ ବିଜେପିର ବରିଷ୍ଠ ନେତା ରାଜନାଥ ସିଂଙ୍କୁ ହରାଇପାରିନଥିଲେ ।
Comments are closed.