୨୦୨୧ ବେଙ୍ଗଲ ନିର୍ବାଚନ ପରବର୍ତ୍ତୀ ହିଂସା ମାମଲାରେ CBIର ବଡ଼ ନିଷ୍ପତ୍ତି: ସୁପ୍ରିମକୋର୍ଟରୁ ପ୍ରତ୍ୟାହାର ହେଲା ପ୍ରାୟ ୨୦ଟି ଆବେଦନ
କୋଲକାତା: କେନ୍ଦ୍ରୀୟ ତଦନ୍ତ ବ୍ୟୁରୋ (CBI) ୨୦୨୧ ପଶ୍ଚିମବଙ୍ଗ ନିର୍ବାଚନ-ପରବର୍ତ୍ତୀ ହିଂସା ମାମଲାର ବିଚାର ରାଜ୍ୟ ବାହାରକୁ ସ୍ଥାନାନ୍ତର କରିବା ପାଇଁ ସୁପ୍ରିମକୋର୍ଟରେ ଦାଖଲ କରିଥିବା ପ୍ରାୟ ୨୦ଟି ଆବେଦନକୁ ପ୍ରତ୍ୟାହାର କରିନେଇଛି। ସିବିଆଇ ପକ୍ଷରୁ ସଲିସିଟର ଜେନେରାଲ ତୁଷାର ମେହେଟ୍ଟା କୋର୍ଟଙ୍କୁ ଜଣାଇଥିଲେ ଯେ “ପରିବର୍ତ୍ତିତ ପରିସ୍ଥିତି” (Changed circumstances) ଯୋଗୁଁ ସେମାନେ ଏହି ଆବେଦନଗୁଡ଼ିକୁ ପ୍ରତ୍ୟାହାର କରୁଛନ୍ତି।
ପ୍ରଧାନ ବିଚାରପତି ସୂର୍ଯ୍ୟକାନ୍ତ, ବିଚାରପତି ଜୟମାଲ୍ୟ ବାଗଚି ଏବଂ ବିଚାରପତି ଭି. ମୋହନାଙ୍କୁ ନେଇ ଗଠିତ ସୁପ୍ରିମକୋର୍ଟଙ୍କ ଏକ ଖଣ୍ଡପୀଠ ସିବିଆଇର ଏହି ଅନୁରୋଧକୁ ଗ୍ରହଣ କରି ଆବେଦନ ପ୍ରତ୍ୟାହାର ପାଇଁ ଅନୁମତି ଦେଇଛନ୍ତି। ସିବିଆଇ ପକ୍ଷରୁ ହାଜର ହୋଇ ସଲିସିଟର ଜେନେରାଲ ତୁଷାର ମେହେଟ୍ଟା କୋର୍ଟଙ୍କୁ ଜଣାଇଥିଲେ ଯେ “ରାଜ୍ୟର ପରିବର୍ତ୍ତିତ ପରିସ୍ଥିତି” ଯୋଗୁଁ ଏଜେନ୍ସି ପ୍ରାୟ ୨୦ଟି ସ୍ଥାନାନ୍ତର ଆବେଦନ ପ୍ରତ୍ୟାହାର କରିବାକୁ ଚାହୁଁଛି।
୨୦୨୩ ମସିହାରେ ସିବିଆଇ ଏହି ଆବେଦନଗୁଡ଼ିକ ଦାଖଲ କରିଥିଲା। ସେତେବେଳେ ଏଜେନ୍ସି ଅଭିଯୋଗ କରିଥିଲା ଯେ ପଶ୍ଚିମବଙ୍ଗରେ ସାକ୍ଷୀ ଏବଂ ସରକାରୀ ଓକିଲମାନଙ୍କୁ ଧମକ ଚମକ ଦିଆଯାଉଛି, ଯାହାଫଳରେ ରାଜ୍ୟରେ ନିରପେକ୍ଷ ବିଚାର ପ୍ରକ୍ରିୟା ସମ୍ଭବ ନୁହେଁ। ତେଣୁ ମାମଲାଗୁଡ଼ିକୁ ପଶ୍ଚିମବଙ୍ଗ ବାହାରକୁ ସ୍ଥାନାନ୍ତର କରିବାକୁ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲା। ୨୦୨୬ ମେ’ ମାସରେ ହୋଇଥିବା ବିଧାନସଭା ନିର୍ବାଚନ ପରେ ପଶ୍ଚିମବଙ୍ଗରେ ଶୁଭେନ୍ଦୁ ଅଧିକାରୀଙ୍କ ନେତୃତ୍ୱରେ ବିଜେପି ସରକାର ଗଠନ ହୋଇଛି, ଯାହାଫଳରେ ସିବିଆଇ ପାଇଁ ପରିସ୍ଥିତି ବଦଳିଛି। ତେଣୁ ଏହି ନିଷ୍ପତ୍ତି ପରେ ଏବେ ୨୦୨୧ ନିର୍ବାଚନ ପରବର୍ତ୍ତୀ ହିଂସା ମାମଲାର ସମସ୍ତ କୋର୍ଟ ବିଚାର ପଶ୍ଚିମବଙ୍ଗ ମଧ୍ୟରେ ହିଁ ଚାଲିବ। ସୁପ୍ରିମକୋର୍ଟଙ୍କ ଅନୁମତି ପରେ ବର୍ତ୍ତମାନ ସମସ୍ତ ମାମଲାର ବିଚାର ପଶ୍ଚିମବଙ୍ଗ ଭିତରେ ହିଁ ଜାରି ରହିବ।