ଭୁବନେଶ୍ବର: ଏବେ ସାଧାରଣ ଖାଉଟି ବଣ୍ଟନ ବ୍ୟବସ୍ଥାକୁ ଜଗିବ ସିସିଟିଭି । ଉଭୟ ଖଳ ପ୍ରକୃତିର ଡିଲର ଓ ହିତାଧିକାରୀଙ୍କୁ କରିବ ସାବାଡ୍ । ତେବେ ଖାଉଟି ବଣ୍ଟନ ବ୍ୟବସ୍ଥାରେ ବ୍ୟାପକ ଅଭିଯୋଗ ଆସିବା ପରେ ଏବେ ବିଭାଗ ପକ୍ଷରୁ ଦୃଢ ପଦକ୍ଷେପ ଗ୍ରହଣ କରାଯାଉଛି । ପୂର୍ବରୁ ଅତ୍ୟାଧୁନିକ ଓଜନ ମେସିନ୍ ସହ ପିଓଏସ୍ ମେସିନ୍ ସହ ସଂଯୋଗ କରାଯାଇଛି । ଯାହାକୁ ନେଇ ବିଭିନ୍ନ ସ୍ଥଳରେ ଡିଲର ଏବଂ ଖାଉଟିଙ୍କ ମଧ୍ୟରେ ଅସନ୍ତୋଷ ଦେଖାଯାଉଥିବା ବେଳେ ଏବେ ପ୍ରତ୍ୟୋକ ଡିଲର ପଏଣ୍ଟରେ ସିସିଟିଭି ଲଗାଯିବା ନେଇ ଯୋଜନା ଆରମ୍ଭ କରୁଛି ରାଜ୍ୟ ଖାଦ୍ୟ ଏବଂ ଖାଉଟି କଲ୍ୟାଣ ବିଭାଗ । ଏହି ସିସିଟିଭି କ୍ୟାମେରା ଏବହ ପ୍ରତି ଡିଲର ପଏଣ୍ଟ ଉପରେ ନଜର ରଖିବ ।
ତେବେ କହିରଖୁଛୁ, ଦୀର୍ଘ ବର୍ଷ ଧରି ପିଓଏସ୍ ମେସିନ୍ ଜନିତ ସମସ୍ୟା ଲାଗିରହିଛି । ଏହି ମେସିନ୍ ଇଣ୍ଟରନେଟ୍ ସେବା ଦ୍ବାରା ଚାଲୁଥିବା ବେଳେ ଅନେକ ସମୟରେ ଏବଂ ଅନେକ ସ୍ଥାନରେ ଇଣ୍ଟରନେଟ ସେବା ନଥିବାରୁ ହଇରାଣ ହେଉଛନ୍ତି ସାଧାରଣ ଲୋକେ । ଏତିସହିତ ଉକ୍ତ ମେସିନଟି ୫ଜି ଜମାନାରେ ୨ଜି ସ୍ପିଡରେ ଚାଲୁଛି । ତାପ ଉପରେ ପୁଣି ଏବେ ଏଡି ପିଓଏସ୍ ମେସିନକୁ ଅତ୍ୟାଧୁନିକ ଓଜନ ମେସିନ ସହ ସଂଯୋଗ କରାଯାଇଛି । ଫଳରେ ଏବେ ୩ ମାସର ଚାଉଳ ଓଜନ କରିବାରୁ ଘଣ୍ଟା ଘଣ୍ଟା ସମୟ ଲାଗୁଛି । ଆଉ ମଝିରେ ଯଦି ଇଣ୍ଟରନେଟ୍ ଚାଲିଗଲା, ତେବେ ଚାଉଲ ପାଇଁ ଦିନକର କାମ ବରବାଦ୍ ହେଉଛି । ଯାହାକୁ ନେଇ ଅନେକ ସ୍ଥଳରେ ଅସନ୍ତୋଷ ଭରିରହିଛି ।