Sonam Wangchuk: ସୋନମ ୱାଙ୍ଗଚୁକଙ୍କ ଏନଜିଓର ଲାଇସେନ୍ସ ବାତିଲ, ବିଦେଶୀ ପାଣ୍ଠି ଉପରେ ପ୍ରତିବନ୍ଧକ

ନୂଆଦିଲ୍ଲୀ: ଲେହ-ଲଦାଖ ହିଂସାର ପ୍ରତିକ୍ରିୟାରେ ସରକାର ଗୁରୁତ୍ୱପୂର୍ଣ୍ଣ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। କେନ୍ଦ୍ର ସରକାର ସୋନମ ୱାଙ୍ଗଚୁକଙ୍କ ଏନଜିଓର ଲାଇସେନ୍ସ ରଦ୍ଦ କରିଛନ୍ତି। ଲେହ ହିଂସା ପରେ ଗୃହ ମନ୍ତ୍ରଣାଳୟ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି। କେନ୍ଦ୍ର ସରକାର FCRA ନିୟମ ଉଲ୍ଲଂଘନ କରିଥିବାରୁ SECMOLର FCRA ପଞ୍ଜିକରଣ ରଦ୍ଦ କରିଥିଲେ।

ଗୃହ ମନ୍ତ୍ରଣାଳୟର ତଦନ୍ତରେ ଅନେକ ଅନିୟମିତତା ଏବଂ ଉଲ୍ଲଂଘନ ସାମ୍ନାକୁ ଆସିଥିଲା। ସୋନମ ୱାଙ୍ଗଚୁକଙ୍କ ସଂଗଠନ ବିଦେଶୀ ଦାନ ଏବଂ ପାଣ୍ଠି ସମ୍ପର୍କରେ ସଠିକ୍ ସୂଚନା ପ୍ରଦାନ କରିବାରେ ବିଫଳ ହେବା ଏବଂ FCRA ( Foreign Contribution (Regulation) Act) ଉଲ୍ଲଂଘନ କରିବାର ଅଭିଯୋଗ ରହିଛି।

ତେବେ ସୋନମ ୱାଙ୍ଗଚୁକଙ୍କ ସମସ୍ୟା ଏବେ ବଢ଼ିପାରେ। ଇଡି ଖୁବ୍ ଶୀଘ୍ର ୱାଙ୍ଗଚୁକଙ୍କ ଏନଜିଓ SECMOL ବିରୋଧରେ FEMA ଅଧୀନରେ ତଦନ୍ତ ଆରମ୍ଭ କରିପାରନ୍ତି ।

ଅଗଷ୍ଟ ୨୦ ତାରିଖରେ ୱାଙ୍ଗଚୁକ୍‌ଙ୍କ ଏନଜିଓକୁ ଏକ ଆର୍ଥିକ ଅନିୟମିତତା ପାଇଁ ନୋଟିସ୍ ଜାରି କରାଯାଇଥିଲା, କିନ୍ତୁ ପ୍ରଦାନ କରାଯାଇଥିବା ଉତ୍ତର ସନ୍ତୋଷଜନକ ନଥିଲା । ୱାଙ୍ଗଚୁକ୍‌ଙ୍କ ବିରୁଦ୍ଧରେ ମନି ଲଣ୍ଡରିଂ ଅଭିଯୋଗ ମଧ୍ୟ ଆସିଛି।

ଲଦାଖରେ ଘଟିଥିବା ହିଂସା ପାଇଁ ଗୃହ ମନ୍ତ୍ରଣାଳୟ ସୋନମ ୱାଙ୍ଗଚୁକଙ୍କୁ ଦାୟୀ କରିଛି। ମନ୍ତ୍ରଣାଳୟ କହିଛି ଯେ ସୋନମ ୱାଙ୍ଗଚୁକ ତାଙ୍କର ଉତ୍ତେଜନାପୂର୍ଣ୍ଣ ବୟାନ ଦେଇ ଭିଡ଼କୁ ଉସୁକାଇଥିଲେ। ଅନଶନ ସମାପ୍ତ କରିବା ପାଇଁ ଅନେକ ନେତାଙ୍କ ଅପିଲ ସତ୍ତ୍ୱେ, ସୋନମ ୱାଙ୍ଗଚୁକ୍ ଅନଶନ ଜାରି ରଖିଥିଲେ।

ଏହାପରେ ସେପ୍ଟେମ୍ବର ୨୪ ତାରିଖରେ ଲେହରେ ହିଂସାତ୍ମକ ଜନତା ଏକ ରାଜନୈତିକ ଦଳ ଏବଂ ସିଇସି କାର୍ଯ୍ୟାଳୟରେ ନିଆଁ ଲଗାଇ ଦେଇଥିଲେ ଓ ପୋଲିସ ଗାଡ଼ି ପୋଡ଼ି ଦେଇଥିଲେ । ପରିସ୍ଥିତି ଆହୁରି ଖରାପ ନହେଉ ଏହାକୁ ଦେଖି ଲଦାଖ ଏବଂ କାରଗିଲରେ ବିଏନଏସର ଧାରା 163 ଲାଗୁ କରାଯାଇଛି।