କରୋନା ମୁକାବିଲା: ଗ୍ରାମାଞ୍ଚଳରେ ଖାଦ୍ୟ ବଣ୍ଟନକୁ ତ୍ୱରାନ୍ୱିତ ପାଇଁ ମୁଖ୍ୟ ଶାସନ ସଚିବଙ୍କ ନିର୍ଦ୍ଦେଶ

ଭୁୁବନେଶ୍ୱର: ରାଜ୍ୟରେ କୋଭିଡ୍‌-୧୯ ମୁକାବିଲା ଓ ପ୍ରତିଷେଧକମୂଳକ ବ୍ୟବସ୍ଥାର କାର୍ଯ୍ୟକାରିତା ନେଇ ସମୀକ୍ଷା କରିଛନ୍ତି ମୁଖ୍ୟ ଶାସନ ସଚିବ ଅସୀତ ତ୍ରିପାଠୀ । ଅନ୍ୟ ରାଜ୍ୟରେ ଫସିଥିବା ଓଡିଆ ତଥା ଲକ୍ ଡାଉନ୍‌ରେ ଓଡିଶାରେ ଫସି ରହିଥିବା ଅନ୍ୟ ରାଜ୍ୟର ଲୋକଙ୍କୁ ସହାୟତା, ରାଜ୍ୟର ବିଭିନ୍ନ ଅଞ୍ଚଳକୁ ଅତ୍ୟାବଶ୍ୟକ ସାମଗ୍ରୀ ପରିବହନ ସମ୍ପର୍କରେ ବରିଷ୍ଠ ପ୍ରଶାସନିକ ଅଧିକାରୀଙ୍କ ସହ ଆଲୋଚନା କରିଛନ୍ତି ମୁଖ୍ୟ ଶାସନ ସଚିବ ।
ଏହା ବ୍ୟତୀତ ପଞ୍ଚାୟତ ଓ ପୌରାଞ୍ଚଳରେ ରନ୍ଧାଖାଦ୍ୟ ଯୋଗାଇବା, ସାମାଜିକ ଦୂରତ୍ୱ ରକ୍ଷା, ବିଭିନ୍ନ ପ୍ରକାର ପେନସନ ଓ ସହାୟତା ପ୍ରଦାନ, ପଞ୍ଚାୟତସ୍ତରରେ ମେଡିକାଲ କ୍ୟାମ୍ପସ ବ୍ୟବସ୍ଥା, କୋଭିଡ-୧୯ କ୍ରିଟିକାଲ୍ କେୟାର ୟୁନିଟର ବିକାଶ ସହ ବିଭିନ୍ନ ସ୍ୱେଚ୍ଛାସେବୀ କିଭଳି ଲୋକଙ୍କୁ ସହାୟତା କରିପାରିବେ ସେନେଇ ବୈଠକରେ ପୁଙ୍ଖାନୁପୁଙ୍ଖ ଆଲୋଚନା ହୋଇଛି ।
ଗ୍ରାମାଞ୍ଚଳରେ ନିରାଶ୍ରୟଙ୍କୁ ରନ୍ଧାଖାଦ୍ୟ ବଣ୍ଟନ କାର୍ଯ୍ୟକ୍ରମକୁ ତ୍ୱରାନ୍ୱିତ କରିବା ସହ ଆବଶ୍ୟକତା ଥିବା ସମସ୍ତଙ୍କୁ ଖାଦ୍ୟ ଯୋଗାଇବା ପାଇଁ ନିର୍ଦ୍ଦେଶ ଦେଇଛନ୍ତି ମୁଖ୍ୟ ଶାସନ ସଚିବ । ଏହାସହ ଲକ୍ ଡାଉନ ବେଳେ ଉଭୟ ସହରାଞ୍ଚଳ ଓ ଗ୍ରାମାଞ୍ଚଳରେ ସାମାଜିକ ଦୂରତ୍ୱକୁ ଅଧିକ କଡାକଡି କରିବାକୁ ବୈଠକରେ ନିଷ୍ପତ୍ତି ହୋଇଛି । ଏହି ସମୀକ୍ଷା ବୈଠକରେ ଉନ୍ନୟନ କମିଶନର ସୁରେଶ ମହାପାତ୍ର, ଅତିରିକ୍ତ ମୁଖ୍ୟ ଶାସନ ସଚିବ, ଏସଆରସି ପ୍ରଦୀପ ଜେନାଙ୍କ ସମେତ ବିଭିନ୍ନ ବିଭାଗୀୟ ସଚିବ ଓ କୋଭିଡ୍‌-୧୯ ପାଇଁ ନିୟୋଜିତ ନୋଡାଲ୍ ଅଫିସର ଉପସ୍ଥିତ ଥିଲେ ।