ଜେପି ନଡ୍ଡାଙ୍କ ବିରୋଧରେ କଂଗ୍ରେସର ଅଭିଯୋଗ, ପଛୁଆ ବର୍ଗର ଲୋକଙ୍କୁ ଭୟଭୀତ କରିବାକୁ ଚେଷ୍ଟା କରୁଛି ବିଜେପି

ନୂଆଦିଲ୍ଲୀ: କର୍ଣ୍ଣାଟକରେ କଂଗ୍ରେସ ଭାରତୀୟ ଜନତା ପାର୍ଟିର ରାଷ୍ଟ୍ରୀୟ ଅଧ୍ୟକ୍ଷ ଜେ.ପି ନଡ୍ଡା, ଆଇଟି ସେଲ୍ ମୁଖ୍ୟ ଅମିତ ମାଲଭିୟ ଏବଂ ରାଜ୍ୟ ୟୁନିଟ୍ ମୁଖ୍ୟ ବିଇ ବିଜୟେନ୍ଦ୍ରଙ୍କ ବିରୋଧରେ ଅଭିଯୋଗ କରିଛି। ଅନୁସୂଚିତ ଜାତି (ଏସସି) ଏବଂ ଅନୁସୂଚିତ ଜନଜାତି (ଏସଟି) ସମ୍ପ୍ରଦାୟର ସଦସ୍ୟଙ୍କୁ ଭୟଭୀତ କରିବା ଉଦ୍ଦେଶ୍ୟରେ ବିଜେପି ସୋସିଆଲ ମିଡିଆରେ ଏକ ଭିଡିଓ ପୋଷ୍ଟ କରିଥିବା ନେଇ ବିଜେପି ବିରୋଧରେ କଂଗ୍ରେସ ଆଭିଯୋଗ ଆଣିଛି।

କର୍ଣ୍ଣାଟକ ପ୍ରଦେଶ କଂଗ୍ରେସ କମିଟି (କେପିସିସି) ମିଡିଆ ଏବଂ ଯୋଗାଯୋଗ ବିଭାଗର ସଭାପତି ରମେଶ ବାବୁ ଏକ ଚିଠିରେ କହିଛନ୍ତି ଯେ କର୍ଣ୍ଣାଟକ ବିଜେପିର ସରକାରୀ ସୋସିଆଲ ମିଡିଆ ଆକାଉଣ୍ଟରେ ସେୟାର କରାଯାଇଥିବା ଏକ ଭିଡିଓରେ କଂଗ୍ରେସ ନେତା ରାହୁଲ ଗାନ୍ଧୀ ଏବଂ କର୍ଣ୍ଣାଟକ ମୁଖ୍ୟମନ୍ତ୍ରୀ ସିଦ୍ଧରମେୟାଙ୍କ ଆନିମେଟେଡ୍ ଚିତ୍ର ଚିତ୍ରିତ ହୋଇଛି।

କଂଗ୍ରେସ ଅଭିଯୋଗ କରିଛି ଯେ ଏହି ଭିଡିଓରେ ଏସସି, ଏସଟି ଏବଂ ଅନ୍ୟାନ୍ୟ ପଛୁଆ ଶ୍ରେଣୀ (ଓବିସି) ସଂରକ୍ଷଣ ଜାତି ଲୋକଙ୍କୁ ଟୋକେଇରେ “ଅଣ୍ଡା” ଭାବରେ ଚିତ୍ରଣ କରାଯାଇଛି। ଭିଡିଓରେ ରାହୁଲ ଗାନ୍ଧୀଙ୍କ ଏକ ଆନିମେଟେଡ୍ ଚରିତ୍ର ଦେଖାଯାଇଛି । ଏହି ଭିଡିଓ ଏସସି / ଏସଟି ସମ୍ପ୍ରଦାୟକୁ କଂଗ୍ରେସକୁ ଭୋଟ୍ ନଦେବାକୁ ଭୟଭୀତ କରିବା ଛଡା ଆଉ କିଛି ନୁହେଁ ବୋଲି କଂଗ୍ରେସ ନେତା ରେମେଶ କହିଛନ୍ତି। ଏହି ଭିଡିଓକୁ ଅନୁମୋଦନ ଦେଇଥିବାରୁ ସେ ରାଜ୍ୟ ସ୍ତରୀୟ ଗଣମାଧ୍ୟମ ମନିଟରିଂ କମିଟିକୁ ସମାଲୋଚନା କରିଛନ୍ତି ଏବଂ ଏହାର ପ୍ରସାର ବିରୋଧରେ କାର୍ଯ୍ୟାନୁଷ୍ଠାନର ଅଭାବ ଉପରେ ପ୍ରଶ୍ନ କରିଛନ୍ତି। ଏହି ପ୍ରସଙ୍ଗରେ ଉପଯୁକ୍ତ କାର୍ଯ୍ୟାନୁଷ୍ଠାନ ଆରମ୍ଭ କରିବା ଆବଶ୍ୟକ ବୋଲି ସେ କହିଛନ୍ତି।