ନିର୍ବାଚନୀ ଉଷ୍ମତା ବେଳେ ଭାବମୂର୍ତ୍ତି ବଞ୍ଚାଇବାକୁ ଯାଇ ନିଯୁକ୍ତି ପତ୍ର ବଣ୍ଟାଯାଉଛି କହି କେନ୍ଦ୍ରକୁ କଟାକ୍ଷ କଲା କଂଗ୍ରେସ

ନୂଆଦିଲ୍ଲୀ: କେନ୍ଦ୍ର ସରକାରଙ୍କ ରୋଜଗାର ମେଳାକୁ କଟାକ୍ଷ କରିଛି ବିରୋଧୀ କଂଗ୍ରେସ। ସୋମବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ସମାଲୋଚନା କରି କହିଛି ଯେ ‘ନିର୍ବାଚନୀ ବର୍ଷର ଉଷ୍ମତା’ ଅନୁଭବ ହେଲାଣି ତେଣୁ ନିଜର ଭାବମୂର୍ତ୍ତି ବଞ୍ଚାଇବା ପାଇଁ ରୋଜଗାର ମେଳା କରୁଛନ୍ତି ପ୍ରଧାନମନ୍ତ୍ରୀ।

ଆଜି ସକାଳେ ରୋଜଗାର ମେଳାକୁ ସମ୍ବୋଧିତ କରି ମୋଦୀ ୫୧ ହଜାରରୁ ଅଧିକ ନିଯୁକ୍ତି ପତ୍ର ବାଣ୍ଟିଥିଲେ। ଏହାପରେ କଂଗ୍ରେସ ସାଧାରଣ ସମ୍ପାଦକ ଜୟରାମ ରମେଶ ରୋଜଗାର ମେଳାକୁ ସବୁଠାରୁ ବଡ଼ ଜୁମଲା ବୋଲି କହିବା ସହ ପ୍ରଧାନମନ୍ତ୍ରୀ ପ୍ରତିବର୍ଷ ଦୁଇ କୋଟି ନିଯୁକ୍ତି ସୃଷ୍ଟି କରିବାର ପ୍ରତିଶ୍ରୁତି ପୂରଣ କରିବାରେ ବିଫଳ ହୋଇଛନ୍ତି ବୋଲି କହିଛନ୍ତି।

ବିମୁଦ୍ରୀକରଣ ଦ୍ୱାରା ଏମଏସଏମଇ କ୍ଷେତ୍ରକୁ ଧ୍ୱଂସ କରିବା ପରେ, ଏକ ଖରାପ ପରିକଳ୍ପିତ ଜିଏସଟି ଏବଂ ଅଚାନକ ଲକଡାଉନ୍ କଲେ ସରକାର। ଦୀର୍ଘ ୯ ବର୍ଷରୁ ଅଧିକ ସମୟ ଧରି ଯୁବକଙ୍କ ଆଶାକୁ ଧୋକା ଦେବା ପରେ ପ୍ରଧାନମନ୍ତ୍ରୀ ଏବେ ନିର୍ବାଚନୀ ବର୍ଷରେ ତାତି ଅନୁଭବ କରୁଛନ୍ତି। ତାଙ୍କ ଚଳଚଞ୍ଚଳ ଭାବମୂର୍ତ୍ତିକୁ ବଞ୍ଚାଇବା ପାଇଁ, ସେ ସବୁଠାରୁ ବଡ଼ ଜୁମଲା ‘ପିଏମ୍ ରୋଜଗାର ମେଳା’ ଆଣିଛନ୍ତି।

ସେ କହିଛନ୍ତି, ରୋଜଗାର ମେଳା ସରକାରୀ କ୍ଷେତ୍ରରେ ନିଯୁକ୍ତିକୁ ବ୍ୟକ୍ତିଗତ କରିଦେଉଛି, ଯେପରି ସାଧାରଣ ଚାକିରି ଅଫର ପାଇଁ ପ୍ରଧାନମନ୍ତ୍ରୀ ହିଁ ଦାୟୀ। ପିଏମ୍ ରୋଜଗାର ମେଳା ଏକ ପ୍ରହସନ ଏବଂ ଏହା ଏକ ବିଶାଳ ଅହଙ୍କାରର ଆଉ ଏକ ପ୍ରମାଣ ବୋଲି ସେ କହିଛନ୍ତି। ନିଯୁକ୍ତି ସୃଷ୍ଟି ଆର୍ଥିକ ଅଭିବୃଦ୍ଧିରୁ ହୋଇଥାଏ ଯାହା ନିବେଶ ଦ୍ୱାରା ପରିଚାଳିତ ହୋଇଥାଏ ବୋଲି କଂଗ୍ରେସ ନେତା କହିଛନ୍ତି। ପୂର୍ବରୁ ବିଭିନ୍ନ ପଦ ପଦବୀରେ ନିଯୁକ୍ତି ପାଇଁ ଖାଲି ପଡିଥିବା ପଦବୀକୁ ଏବେ ପୂରଣ କରାଯାଉଛି। ସେତେବେଳେ ବିଭିନ୍ନ କାରଣ ପାଇଁ ପଦବୀ ପୂରଣ ହୋଇପାରିନଥିଲା। ଏବେ ତାହା ପୂରଣ ହେଉଛି। କୌଣସି ନୂଆ ନିଯୁକ୍ତି ସୃଷ୍ଟି ହୋଇନାହିଁ ବୋଲି ଜୟରାମ ରମେଶ କହିଛନ୍ତି।