ଯାଜପୁର: ଧର୍ମଶାଳା ବ୍ଲକ ଅନ୍ତର୍ଗତ ବ୍ରଜଗିରି ପ୍ରୋଜେକ୍ଚ ହାଇସ୍କୁଲରେ ବିଜେଡି ବିଧାୟକ ପ୍ରଣବ ବଳବନ୍ତରାୟଙ୍କ ଜନ୍ମଦିନ ପାଳନର ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ଏହାକୁ ନେଇ ଚର୍ଚ୍ଚା ଜୋର ଧରିଛି। ଏହି ଭିଡିଓରେ କେକ୍ କାଟିବା ଓ ଜନ୍ମଦିନର ଗୀତର ତାଳେ ତାଳେ ଶିକ୍ଷକ ଶିକ୍ଷୟିତ୍ରୀ ଓ ଛାତ୍ରଛାତ୍ରୀମାନେ ନାଚିବା ସହ ଭାଗ ନେଇଥିଲେ।
ଏହି ଘଟଣାକୁ ନେଇ ବୁଦ୍ଧିଜୀବୀ ଓ ସାଧାରଣରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ମିଳିଥିବା ସୂଚନା ଅନୁଯାୟୀ, ଗତ ରବିବାର ଦିନ ସ୍କୁଲ ଛୁଟି ଥିବା ବେଳେ ଜନ୍ମଦିନ ଉତ୍ସବ ପାଳନ କରାଯାଇଥିଲା। ଯାଜପୁର ଜିଲ୍ଲା ବିଜେଡି ଶାଖା ପକ୍ଷରୁ ଏହି କାର୍ଯ୍ୟକ୍ରମ ଆୟୋଜନ କରାଯାଇଥିଲା। ତେବେ ପ୍ରକୃତରେ ବିଦ୍ୟାଳୟ ପରିସର ମଧ୍ୟରେ ଏଭଳି ଘଟଣା ଘଟିଛି କି ନାହିଁ ଏବଂ କେଉଁ ପରିସ୍ଥିତିରେ ଘଟିଛି ସେ ନେଇ ଅଧିକ ତଦନ୍ତ କରିବା ଆବଶ୍ୟକ ବୋଲି ଜିଲ୍ଲା ଶିକ୍ଷାଧିକାରୀ ନିକୁଞ୍ଜ ମହାନ୍ତି ପ୍ରକାଶ କରିଛନ୍ତି।
ଅଗଷ୍ଟ ୯ ତାରିଖରେ ହେବାକୁ ଯାଉଛି ଜିଲ୍ଲା ପରିଷଦ ଜୋନ୍-୧୫ ଉପ-ନିର୍ବାଚନ। ତେଣୁ ଏହି ଭିଡିଓ ବିଭିନ୍ନ ଦିଗରୁ ବିବାଦ ଘେରକୁ ଆସିଛି। ବିଜେଡି ଜିଲ୍ଲା ପରିଷଦ ସଦସ୍ୟ ଭାଗ୍ୟଧର ସେଠୀଙ୍କ ପରଲୋକ ପରେ ଏହି ଆସନଟି ଖାଲି ପଡ଼ିଛି। ଆଗକୁ ହେବାକୁ ଥିବା ଉପନିର୍ବାଚନ ପାଖେଇ ଆସୁଥିବାରୁ ଜନ୍ମଦିନ ପାଳନକୁ ନିର୍ବାଚନ ଆଚରଣ ବିଧିର ଉଲଙ୍ଘନ ବୋଲି କୁହାଯାଇପାରେ ବୋଲି ସମାଲୋଚକମାନେ ଯୁକ୍ତି ବାଢିଛନ୍ତି।
Comments are closed.