୧୧୨ ଜଣଙ୍କ ସଂସ୍ପର୍ଶରେ ଆସିଛନ୍ତି ତୃତୀୟ କରୋନା ଆକ୍ରାନ୍ତ: ବାଗଚୀ

ଭୁବନେଶ୍ୱର: ରାଜ୍ୟର ତୃତୀୟ କରୋନା ଆକ୍ରାନ୍ତ ୧୧୨ ଜଣଙ୍କ ସଂସ୍ପର୍ଶରେ ଆସିଛନ୍ତି । ସେ ‘ସୁପର ସ୍ପ୍ରେଡର’ ପାଲଟିବାର ଆଶଙ୍କା ପ୍ରକାଶ ପାଇଛି । ଆଜି ଏନେଇ ସବିଶେଷ ସୂଚନା ଦେଇଛନ୍ତି ରାଜ୍ୟ ସରକାରଙ୍କ କୋଭିଡ-୧୯ ମୁଖପାତ୍ର ସୁବ୍ରୋତ ବାଗଚୀ ।
ତୃତୀୟ କରୋନା ସଂକ୍ରମିତ ଜଣକ ବିମାନରେ ୩୨ ଜଣଙ୍କ ସଂସ୍ପର୍ଶରେ ଆସିଥିବା ବେଳେ ଘରେ ଝିଅ, ସ୍ତ୍ରୀ, ଡ୍ରାଇଭର ଏବଂ ୩ ଜଣ ସହାୟିକାଙ୍କ ସଂସ୍ପର୍ଶରେ ଆସିଛନ୍ତି । ସେହିପରି ବ୍ୟାଙ୍କର ୪୪ଜଣ, ବିଧାନସଭାର ୭ଜଣ, କ୍ଲିନର ୨୧ ଜଣ ଏବଂ ରକ୍ତ ପରୀକ୍ଷା କରାଇଥିବା ପାଥୋଲାବରେ ୩ ଜଣଙ୍କ ସଂସ୍ପର୍ଶରେ ଆସିଥିବା ନେଇ ବାଗଚୀ ସ୍ପଷ୍ଟ କରିଛନ୍ତି ।
ତେବେ ଆକ୍ରାନ୍ତଙ୍କ ସହ ସଂସ୍ପର୍ଶରେ ଆସିଥିବା ୧୧୨ ଜଣଙ୍କ ମଧ୍ୟରୁ ୧୫ ଜଣଙ୍କ ସହ ଯୋଗାଯୋଗ ହୋଇ ପାରି ନାହିଁ । ଅନ୍ୟ ସମସ୍ତଙ୍କ ସହ ଯୋଗାଯୋଗ ହୋଇଛି । ସେମାନଙ୍କ ମଧ୍ୟରୁ ୧୧ ଜଣଙ୍କ ନମୁନା ପରୀକ୍ଷା ପାଇଁ ପଠାଯାଇଛି । ସେଥିମଧ୍ୟରୁ ଜଣଙ୍କ ରିପୋର୍ଟ ନେଗେଟିଭ ଆସିଛି । ଅନ୍ୟ ୧୦ଟି ରିପୋର୍ଟକୁ ଅପେକ୍ଷା ରହିଛି ବୋଲି ବାଗଚୀ କହିଛନ୍ତି ।
ସେପଟେ ୩ ପଜିିଟିଭ ଆକ୍ରାନ୍ତଙ୍କ ସ୍ୱାସ୍ଥ୍ୟବସ୍ଥା ଭଲ ଅଛି । ସମସ୍ତେ ଅନ୍ୟ ରୋଗୀଙ୍କ ଭଳି ହସ୍ପିଟାଲ ରନ୍ଧା ଖାଦ୍ୟ ଖାଉଛନ୍ତି ବୋଲି ସୁବ୍ରୋତ ବାଗଚୀ କହିଛନ୍ତି ।