ନୂଆଦିଲ୍ଲୀ: ଗୋଟିଏପଟେ କରୋନାର ନୂଆ ଷ୍ଟ୍ରେନ୍ ଆତଙ୍କ ସୃଷ୍ଟି କରିଥିବା ବେଳେ ଅନ୍ୟପଟେ ଏହାର ବିସ୍ତାର ଆଣ୍ଟାର୍କଟିକା ପର୍ଯ୍ୟନ୍ତ ପହଞ୍ଚିସାରିଲାଣି। ଏପର୍ଯ୍ୟନ୍ତ ପୃଥିବୀର ଦକ୍ଷିଣ ଭାଗରେ ଥିବା ଏହି ମହାଦେଶ ମହାମାରୀରୁ ବଞ୍ଚିତ ରହିଥିଲା। ଚିଲିନ୍ ସେନା ପକ୍ଷରୁ ଏହି ସୂଚନା ଦିଆଯାଇଛି। ଚିଲିନ୍ ସୈନିକ କହିଛନ୍ତି ଯେ ଆଣ୍ଟାର୍କଟିକାରେ ଥିବା ପୋଜିସନ୍ ରିସର୍ଚ୍ଚ ଷ୍ଟେସନ୍ ବର୍ନାର୍ଡୋ ଓ’ହିଗିନ୍ସ ବେସ୍ ତଦାରଖ କରୁଥିବା କମ୍ପାନୀର ୧୦ ଜଣ କର୍ମଚାରୀ ଏବଂ ୨୬ ଜଣ ସାମରିକ କର୍ମଚାରୀ କରୋନା ସଂକ୍ରମିତ ହୋଇଥିବା ଜଣାପଡିଛି। ଏହା ପରେ ସେମାନଙ୍କୁ ସେଠାରୁ ଅଣାଯାଇ ଚିଲିନ୍ରେ ସଙ୍ଗରୋଧରେ ରଖାଯାଇଛି। ଚିଲିନ୍ ସୈନ୍ୟ ଏହି ଅନୁସନ୍ଧାନ କେନ୍ଦ୍ର ପରିଚାଳନା ଦାୟିତ୍ବରେ ଅଛନ୍ତି।
ସେନା କହିଛି ଯେ ସମସ୍ତ ଲୋକଙ୍କୁ ନଜରରେ ରଖାଯାଇଛି ଏବଂ କାହାର ଅବସ୍ଥା ଗୁରୁତର ନୁହେଁ। ଆଣ୍ଟାର୍କଟିକାର ଅଧିକାଂଶ ଅଂଶ ତୁଷାର ପର୍ବତ ଦ୍ୱାରା ଘେରି ରହିଛି, ଚାରି ପାର୍ଶ୍ୱରେ ଦକ୍ଷିଣ ମହାସାଗରରେ ଘେରି ରହିଛି। ଏଠାରେ ୩୮ ଟି ଗବେଷଣା କେନ୍ଦ୍ର ସମଗ୍ର ମହାଦେଶରେ ବ୍ୟାପିଛି, ଯେଉଁଠାରେ ଏକ ହଜାରରୁ ଅଧିକ ଲୋକ ବାସ କରନ୍ତି। ଏହାକୁ କରୋନା ସଂକ୍ରମଣରୁ ରକ୍ଷା କରିବା ପାଇଁ ଅନେକ ପଦକ୍ଷେପ ନିଆଯାଇଥିଲା। ଆଣ୍ଟାର୍କଟିକା ପୂର୍ବରୁ ପର୍ଯ୍ୟଟନକୁ ନିଷିଦ୍ଧ କରିଥିଲା ଏବଂ ଅନ୍ୟାନ୍ୟ କାର୍ଯ୍ୟକଳାପ ଉପରେ କଟକଣା ଲଗାଯାଇଥିଲା।
Comments are closed.