ବ୍ରହ୍ମପୁର: ବାଇକରେ କୁମ୍ଭୀର ବୋହି ନେବା ଘଟଣାରେ ଦିଗପହଣ୍ଡିର ଡେପୁଟି ଫରେଷ୍ଟ ରେଞ୍ଜର ପ୍ରମୋଦ କୁମାର ଖଡଗରାୟଙ୍କୁ ନିଲମ୍ବିତ କରାଯାଇଛି । ଏସମ୍ପର୍କରେ ସୂଚନା ଦେଇଛନ୍ତି ବ୍ରହ୍ମପୁର ସର୍କଲର ଆଞ୍ଚଳିକ ମୁଖ୍ୟ ବନ ସଂରକ୍ଷକ (ଆରସିସିଏଫ) ପ୍ରଶାନ୍ତ କୁମାର ମିଶ୍ର ।
ବ୍ରହ୍ମପୁର ଡିଭିଜନାଲ ଫରେଷ୍ଟ ଅଫିସର (ଡିଏଫଓ) ଡିଭିଜନ ଅମ୍ଲାନ କୁମାର ନାୟକଙ୍କ କହିବାନୁଯାୟୀ, ଆରସିସିଏଫଙ୍କ ନିର୍ଦ୍ଦେଶ ଅନୁଯାୟୀ ଷ୍ଟାଣ୍ଡାର୍ଡ ଅପରେସନ୍ ପଦ୍ଧତି ଉଲ୍ଲଂଘନ ଅଭିଯୋଗରେ ଦିଗପହଣ୍ଡିର ଡେପୁଟି ଫରେଷ୍ଟ ରେଞ୍ଜରଙ୍କୁ ନିଲମ୍ବିତ କରାଯାଇଛି।
ସୋସିଆଲ ମିଡିଆରେ କୁମ୍ଭୀରକୁ ଏକ ବାଇକରେ ନେଇ ଯାଉଥିବା ଭିଡିଓ ଭାଇରାଲ ହେବା ପରେ ଦିଗପହଣ୍ଡିର ଡେପୁଟି ଫରେଷ୍ଟ ରେଞ୍ଜରଙ୍କୁ ବ୍ରହ୍ମପୁର ଡିଏଫଓଙ୍କ ପକ୍ଷରୁ କାରଣ ଦର୍ଶାଅ ନୋଟିସ ଜାରି କରାଯାଇଥିଲା। ଘଟଣାସ୍ଥଳରେ ଉପସ୍ଥିତ ଥିବା ଅନ୍ୟ ଜଙ୍ଗଲ ଅଧିକାରୀଙ୍କ ବିରୋଧରେ ବିଭାଗୀୟ କାର୍ୟ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଡିଏଫଓ କହିଛନ୍ତି।
ତେବେ ଦିଗପହଣ୍ଡିର ଡେପୁଟି ଫରେଷ୍ଟ ରେଞ୍ଜର ପ୍ରମୋଦ କୁମାର ଖଡଗରାୟ ନିଜକୁ ନିର୍ଦ୍ଦୋଷ ବୋଲି କହିଛନ୍ତି ଏବଂ ଯଦିଓ ତାଙ୍କୁ ଶନିବାର ଠାରୁ ୩ ଦିନ ମଧ୍ୟରେ ଉତ୍ତର ଦେବାକୁ ଅନୁମତି ଦିଆଯାଇଥିଲା କିନ୍ତୁ ସୋମବାର ତାଙ୍କୁ ନିଲମ୍ବିତ କରାଯାଇଛି ।
ଉଲ୍ଲେଖଯୋଗ୍ୟ, ଶନିବାର ଦିନ ଗଞ୍ଜାମ ଜିଲ୍ଲାର ଦିଗପହଣ୍ଡି ବ୍ଲକ କଇଥଖଣ୍ଡି ପଞ୍ଚାୟତ ଅନ୍ତର୍ଗତ ତାଳସିଙ୍ଗି ଗାଁର ସିମାଞ୍ଚଳ ପାଣିଗ୍ରାହୀଙ୍କ ବିଲରୁ କୁମ୍ଭୀର ଉଦ୍ଧାର କରାଯାଇଥିଲା । ପରେ ଉକ୍ତ କୁମ୍ଭୀରକୁ ବାଇକରେ ବାନ୍ଧି ବନ ବିଭାଗ କର୍ମଚାରୀ ମାନେ ଆଣୁଥିବା ଅଭିଯୋଗ ହୋଇଥିଲା ।