ରାଇରଙ୍ଗପୁର: ଚୂନ ପାଉଡର ଟ୍ରକ୍ ଟାଙ୍କି ଭିତରୁ ଏକ ମୃତଦେହ ଠାବ ହୋଇଛି। ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ଟାଉନ୍ ଥାନା ଅନ୍ତର୍ଗତ ରାଞ୍ଚି-ବିଜୟୱାଡା ୨୨୦ ନମ୍ବର ଜାତୀୟ ରାଜପଥର ଭାଲୁବସା ପେଟ୍ରୋଲ ଟାଙ୍କି ସମ୍ମୁଖ ନୋ ଏଣ୍ଟ୍ରି ଜୋନରେ ଏଭଳି ଘଟଣା ଘଟିଛି।
ସୂଚନା ଅନୁଯାୟୀ, ବିଆର-୨୪ ଜିବି-୩୯୫୮ ବିଶିଷ୍ଟ ଏକ ଚୂନ ପାଉଡର ଟ୍ରକ୍ ଜାମସେଦପୁର (ଟାଟା)ରୁ କଳିଙ୍ଗନଗର ଚୂନ ପାଉଡର ଗୁଣ୍ଡ ଅନଲୋଡ଼ କରି ଟାଟାନଗର ଫେରୁଥିଲା। ତେବେ ଦୁଇଦିନ ପୂର୍ବରୁ ଏହି ଗଡି ନୋ ଏଣ୍ଟ୍ରି ଜୋନରେ ରହିଥିବା ଦେଖି ସନ୍ଦେହରେ ଲୋକେ ପୋଲିସକୁ ଖବର ଦେଇଥିଲେ। ଖବର ପାଇ ପୋଲିସ ଘଟଣାସ୍ଥଳକୁ ପହଞ୍ଚି ଡ୍ରାଇଭରଙ୍କ ମୃତଦେହ ଟାଙ୍କି ଭିତରେ ପୋଡ଼ିଥିବା ଠାବ କରିଥିଲା। ଟ୍ରକଟି ବିହାର ରାଜ୍ୟର ହୋଇଥିବା ବେଳେ ମୃତକ ଡ୍ରାଇଭର ଜଣକ ବିହାର ରାଶଥାସ ଥାନା ଅନ୍ତର୍ଗତ ଢେଲାବାର ବାକୁରା ଗ୍ରାମର ଶିବ କୁମାର ସିଂ(୪୫) ବୋଲି ଜଣାପଡ଼ିଛି। ଏନେଇ ଟାଉନ୍ ଥାନାରେ କେଶ୍ ନଂ ୨୦/୨୪ରେ ଏକ ଅପମୃତ୍ୟୁ ମାମଲା ରୁଜୁ ହୋଇଛି।
ସ୍ଥାନୀୟ ଲୋକଙ୍କ ସୂଚନା ଅନୁସାରେ, ନୋ ଏଣ୍ଟ୍ରି ଜୋନରେ ଟ୍ରକ୍ ଗୁଡ଼ିକ ଘଣ୍ଟା ଘଣ୍ଟା ଧରି ଅଟକି ରହୁଥିବା ଯୋଗୁଁ ତାହା ଅସାମାଜିକ ବ୍ୟକ୍ତିଙ୍କ ଆଡ୍ଡା ପାଲଟିଛି। ନୋ ଏଣ୍ଟ୍ରି ଜୋନରେ ପ୍ରାୟ ରାତି ୧୨ଟା ପର୍ଯ୍ୟନ୍ତ ଅସମାଜିକ ବ୍ୟକ୍ତି ଦେଖିବାକୁ ମିଳୁଥିବାରୁ କେହି ଚାଳକଙ୍କୁ ହତ୍ୟା କରି ଫିଙ୍ଗି ଦେଇଥିବା ସନ୍ଦେହ କରାଯାଉଛି।
ନୋ ଏଣ୍ଟ୍ରି ଜୋନରେ ଡ୍ରାଇଭରଙ୍କ ମୃତ୍ୟୁ କିଭଳି ହେଲା ସେ ସମ୍ପର୍କରେ ଟାଉନ୍ ଥାନା ପୋଲିସ ଘଟଣାର ତଦନ୍ତ ଜାରି ରଖିଛି। ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ଶବ ହସ୍ତାନ୍ତର କରାଯାଇଛି।
Comments are closed.