ନୂଆଗାଁ: ମୟୂରଭଞ୍ଜ ଜିଲ୍ଲା ବୈଶିଙ୍ଗା ଥାନା ଅଧୀନ ନୂଆଗାଁ ଗ୍ରାମର ଜନୈକ ବ୍ୟକ୍ତି ସପ୍ତାହେ ପୂର୍ବରୁ ପାଖ ଜଙ୍ଗଲକୁ ଛତୁ ଗୋଟାଇବାକୁ ଯାଇ ନିଖୋଜ ହୋଇଯାଇଥିଲେ। ଆଜି ଜଙ୍ଗଲ ଭିତରୁ ତାଙ୍କର ଗଳିତ ଖଣ୍ଡ ବିଖଣ୍ଡିତ ଶବ ବନବିଭାଗ ଓ ପୋଲିସ କର୍ମଚାରୀମାନେ ଉଦ୍ଧାର କରିଛନ୍ତି। ଉକ୍ତ ଜଙ୍ଗଲରେ ବୁଲୁଥିବା ଦନ୍ତାର ହାତୀ ଆକ୍ରମଣରେ ତାଙ୍କର ମୃତ୍ୟୁ ନେଇ ବନବିଭାଗ ସ୍ପଷ୍ଟ କରିଛି।
ସୂଚନା ଅନୁଯାୟୀ, ନୂଆଗାଁ ଗ୍ରାମର ସ୍ବର୍ଗତଃ ଢାଉଲ ବେହେରାଙ୍କ ପୁଅ ଅନୁରୁଦ୍ଧ ବେହେରା (୫୪) ଗତ ୨୩ ତାରିଖ ଭୋର ସକାଳୁ ଗାଁ ପାଖ ଜଙ୍ଗଲକୁ ଛତୁ ଗୋଟାଇବାକୁ ଯାଇ ଆଉ ଫେରି ନଥିଲେ। ତେବେ ଫେରିବାରେ ବିଳମ୍ବ ହେବାରୁ ପରିବାର ଲୋକେ ନିଖୋଜ ନେଇ ଥାନାରେ ଅଭିଯୋଗ କରିଥିଲେ।
କିଛିଦିନ ପୂର୍ବରୁ ଉକ୍ତ ଜଙ୍ଗଲରେ ଏକ ଗୋଠଛଡା ଝାଡ଼ଖଣ୍ଡି ଦନ୍ତା ହାତୀ ବିଚରଣ ପୂର୍ବକ ନିଜର ଉତ୍ପାତ ଜାରି ରଖିଥିଲା। ଏଥିପାଇଁ ପରିବାର ବର୍ଗ ଓ ସ୍ଥାନୀୟ ଲୋକ ଅନୁରୁଦ୍ଧଙ୍କୁ ହାତୀ ଆକ୍ରମଣ କରିଥିବା ନେଇ ସନ୍ଦେହ କରିଥିଲେ। ଖବରପାଇ ବୈଶିଙ୍ଗା ଥାନା ଅଧିକାରୀ ତପନ କୁମାର ପ୍ରଧାନ ଘଟଣାସ୍ଥଳରେ ପହଞ୍ଚି ଏହି ମୃତ୍ୟୁ ହାତୀ ଆକ୍ରମଣରୁ ହୋଇଥିବା ସ୍ପଷ୍ଟ କରିଥିଲେ।
Comments are closed.