ଭୁବନେଶ୍ୱର: ଆଜିକୁ ୭୪ ବର୍ଷ ବିତିଯାଇଥିଲେ ମଧ୍ୟ ଏବେବି ରହସ୍ୟ ଘେରରେ ରହିଛି ନେତାଜୀ ସୁଭାଷ ଚନ୍ଦ୍ର ବୋଷଙ୍କ ମୃତ୍ୟୁ । “ମୋତେ ରକ୍ତ ଦିଅ, ମୁଁ ତୁମକୁ ସ୍ୱାଧୀନତା ଦେବି” ଏହି ଉକ୍ତିଟିକୁ କହିଥିବା ଭାରତର ଏହି ମହାନ୍ ସ୍ୱାଧୀନତା ସଂଗ୍ରାମୀଙ୍କ ଆଜି ପୁଣ୍ୟତିଥି ।
୧୯୪୫ ମସିହା ଅଗଷ୍ଟ ମାସ ୧୮ ତାରିଖରେ ତାଇୱାନରେ ଘଟିଥିବା ଏକ ବିମାନ ଦୁର୍ଘଟଣାରେ ତାଙ୍କର ଦେହାନ୍ତ ହୋଇଥିଲା ।
ତେବେ ନେତାଜୀଙ୍କ ଏଭଳି ରହସ୍ୟଜନକ ଭାବେ ଉଭାନ୍ ହୋଇଯିବା ଘଟଣା ତଥା ତାଙ୍କ ମୃତ୍ୟୁକୁ ନେଇ ଆଜିବି ଅନେକ ଲୋକ ଭିନ୍ନଭିନ୍ନ ପ୍ରକାର ମତ ପ୍ରକାଶ କରିଥାନ୍ତି ।
On this day, in 1945, Netaji went on a flight from Taihoku Airport in Taiwan, only to disappear forever. We still do not know what happened to him. People have a right to know about the great son of the soil
— Mamata Banerjee (@MamataOfficial) August 18, 2019
ତାଙ୍କର ଏପରି ଗାଏବ ହୋଇଯିବା ଘଟଣାକୁ ମନେ ପକାଇ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଟ୍ୱିଟ୍ କରିଛନ୍ତି।
ଆଜିର ଦିନରେ ନେତାଜୀ ତାଇୱାନର ଏକ ଏୟାରପୋର୍ଟରୁ ବିମାନରେ ଉଡାଣ ଭରିଥିବା ବେଳେ ସେହିଦିନଠାରୁ ସେ କେଉଁଆଡେ ଉଭାନ ହୋଇଗଲେ । ଯାହା ଆଜି ଯାଏଁ ରହସ୍ୟ ହୋଇ ରହିଛି । ମାଟି ମା’ର ଏହି ସୁପୁତ୍ରଙ୍କ ସହ କ’ଣ ଘଟିଲା, ତାହା ଜାଣିବା ଦେଶବାସୀଙ୍କ ସମ୍ପୂର୍ଣ୍ଣ ଅଧିକାର ବୋଲି ତାଙ୍କ ଟ୍ୱିଟରେ ଉଲ୍ଲେଖ କରିଛନ୍ତି ।
ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁଯାୟୀ ନେତାଜୀଙ୍କ ନିଖୋଜ ହେବା ରହସ୍ୟ ଉନ୍ମୋଚନ ଲାଗି ୩ଟି ଯାଞ୍ଚ କମିଶନ ଗଠନ କରାଯାଇଥିଲା ।
ସୁପ୍ରିମକୋର୍ଟର ଅବସରପ୍ରାପ୍ତ ଜଜ୍ ଏମକେ ମୁଖାର୍ଜୀଙ୍କ ଅଧ୍ୟକ୍ଷତାରେ ୧୯୯୯ ମସିହାରୁ ଆରମ୍ଭ ହୋଇଥିବା ମୁଖାର୍ଜୀ କମିଶନଙ୍କ ତଦନ୍ତ ପାଖାପାଖି ୬ ବର୍ଷ ତଥା ୨୦୦୫ ଯାଏଁ ଚାଲିଥିଲା । ତାଙ୍କ ରିପୋର୍ଟନୁଯାୟୀ ନେତାଜୀଙ୍କୁ ବଞ୍ଚାଇବା ଲାଗି ଏଭଳି ଦୁର୍ଘଟଣା ରଚାଯାଇଥିଲା ।
ପରେ ୨୦୦୬ ମସିହାରେ ଏହି ରିପୋର୍ଟକୁ କଂଗ୍ରେସ ସରକାର ଖାରଜ କରିଦେଇଥିଲେ ।
ମମତା ବାନାର୍ଜୀଙ୍କ ନେତୃତ୍ୱାଧୀନ ପଶ୍ଚିମବଙ୍ଗ ସରକାର ୨୦୧୫ ମସିହାରେ ନେତାଜୀଙ୍କ ସମ୍ପର୍କିତ ପାଖାପାଖି ୬୪ଟି ଫାଇଲ୍ ଉପରୁ ପ୍ରତିବନ୍ଧକ ହଟାଇଥିଲେ ।
ସେହିପରି ପରବର୍ତ୍ତୀ ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାର ନେତାଜୀଙ୍କ ସମ୍ପର୍କିତ କିଛି ଦସ୍ତାବିଜକୁ ସାର୍ବଜନୀନ କରିଥିଲେ ।
ଉଲ୍ଲେଖଯୋଗ୍ୟ, ସୁଭାଷ ବୋଷ ତଥା ନେତାଜୀ ସୁଭାଷ ବୋଷ ଭାବରେ ପରିଚିତ ମହାନାୟକଙ୍କ ଜନ୍ମ ୧୮୯୭ ମସିହା ଜାନୁଆରୀ ୨୩ ତାରିଖରେ କଟକ ଜିଲ୍ଲାରେ ହୋଇଥିଲା ।
ଭାରତକୁ ସ୍ୱାଧୀନତା ପ୍ରଦାନ କରିବା ଦିଗରେ ତାଙ୍କର ମଧ୍ୟ ଅନନ୍ୟ ଭୂମିକା ରହିଛି । ଏପରିକି ଦ୍ୱିତୀୟ ବିଶ୍ୱଯୁଦ୍ଧ ସମୟରେ ଇଂରେଜମାନଙ୍କ ବିରୋଧରେ ଲଢେଇ କରିବା ଲାଗି ଜାପାନ ସହାୟତାରେ ସେ ‘ଆଜାଦ ହିନ୍ଦ ଫୌଜ’ ଗଠନ କରିଥିଲେ ।