ପୁଣି ଜେଲ ଯିବେ କି ମନୀଷ ସିସୋଦିଆ ଏବଂ ସତ୍ୟେନ୍ଦ୍ର ଜୈନ ?

ନୂଆଦିଲ୍ଲୀ: ଆମ ଆଦମୀ ପାର୍ଟି (ଆପ) ନେତା ମନୀଷ ସିସୋଦିଆ ଏବଂ ସତ୍ୟେନ୍ଦ୍ର ଜୈନଙ୍କ ସମସ୍ୟା ପୁଣି ବଢ଼ିପାରେ । ଦିଲ୍ଲୀର ଦୁର୍ନୀତି ନିବାରଣ ଶାଖା (ଏସିବି) ଏକ ଦୁର୍ନୀତି ମାମଲାରେ ଉଭୟ ନେତାଙ୍କୁ ସମନ ଜାରି କରିଛି ଏବଂ ହାଜର ହେବାକୁ ଡାକିଛି । ଜୈନଙ୍କୁ ଜୁନ୍ 6 ତାରିଖରେ ହାଜର ହେବାକୁ ନିର୍ଦ୍ଦେଶ ଥିବାବେଳେ, ସିସୋଦିଆଙ୍କୁ ଜୁନ୍ 9 ତାରିଖରେ ରିପୋର୍ଟ କରିବାକୁ କୁହାଯାଇଛି ।

ପୂର୍ବ ଆପ ସରକାର ସମୟରେ ସରକାରୀ ସ୍କୁଲରେ ଶ୍ରେଣୀଗୃହ ନିର୍ମାଣ ସହ ଜଡିତ ଦୁର୍ନୀତି ସମ୍ପର୍କରେ ଏହି ସମନ ଜାରି କରାଯାଇଛି ।

ଏପ୍ରିଲ 30 ତାରିଖରେ, ଏସିବି ଦୁଇ ରାଜନେତାଙ୍କ ବିରୁଦ୍ଧରେ ଏକ ଏଫଆଇଆର୍ ଦାୟର କରିଥିଲା, ଯେଉଁଥିରେ ସେମାନେ 12 ହଜାର 748 ଶ୍ରେଣୀଗୃହ ନିର୍ମାଣରେ ଦୁର୍ନୀତି କରିଥିବା ଅଭିଯୋଗ ହୋଇଥିଲା । ଆପର କାର୍ଯ୍ୟକାଳରେ ସିସୋଦିଆ ଅର୍ଥ ଏବଂ ଶିକ୍ଷା ବିଭାଗ ଦେଖାଶୁଣା କରୁଥିଲେ, ଯେତେବେଳେ ଜୈନ ସ୍ୱାସ୍ଥ୍ୟ, ଶିଳ୍ପ, ଶକ୍ତି, ଗୃହ ବ୍ୟାପାର, ନଗର ବିକାଶ ଏବଂ ସାର୍ବଜନୀନ ବିଭାଗ ସମ୍ଭାଳୁ ଥିଲେ ।

ଏସିବିର ମୁଖ୍ୟ ଯୁଗ୍ମ କମିଶନର ମଧୁର ବର୍ମା କହିଛନ୍ତି ଯେ, କେନ୍ଦ୍ରୀୟ ସତର୍କତା ଆୟୋଗ (ସିଭିସି)ର ମୁଖ୍ୟ ବୈଷୟିକ ପରୀକ୍ଷକଙ୍କ ରିପୋର୍ଟ ଆଧାରରେ ଏଫଆଇଆର ପଞ୍ଜିକୃତ କରାଯାଇଛି । ସେ କହିଛନ୍ତି, ‘ସିଭିସିର ମୁଖ୍ୟ ବୈଷୟିକ ପରୀକ୍ଷକଙ୍କ ରିପୋର୍ଟରେ ପ୍ରକଳ୍ପରେ ଅନେକ ଅସଙ୍ଗତି ଥିବା ଦର୍ଶାଯାଇଥିଲା ଏବଂ ପ୍ରାୟ ତିନି ବର୍ଷ ଧରି ରିପୋର୍ଟକୁ ଚାପି ଦିଆଯାଇଥିଲା।’ ଦୁର୍ନୀତି ନିବାରଣ ଆଇନର ଧାରା 17-A ଅନୁଯାୟୀ ଅନୁମତି ମିଳିବା ପରେ ମାମଲା ପଞ୍ଜିକୃତ ହୋଇଥିଲା ।