ନୂଆଦିଲ୍ଲୀ: ପଞ୍ଜାବରେ ଡ୍ରଗ୍ସ ଜବତ ହେଲା । କିନ୍ତୁ ଗୁଜରାଟ ସରକାରକୁ ପ୍ରଶ୍ନ କଲେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ଲାଲ। ଡ୍ରଗ୍ସ ଚୋରା ଚାଲାଣ ନେଇ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଗୁଜରାଟ ସରକାରଙ୍କୁ ଟାର୍ଗେଟ କରିଛନ୍ତି। କେଜ୍ରିୱାଲ ଅଭିଯୋଗ କରି କହିଛନ୍ତି ଯେ ଗୁଜୁରାଟରୁ ପଞ୍ଜାବକୁ ଡ୍ରଗ୍ସ ଅଣାଯାଉଛି। ଶୀର୍ଷ ପଦବୀରେ ଥିବା ଲୋକଙ୍କ ସହଭାଗୀତା ହେତୁ ଡ୍ରଗ୍ସ ଚୋରା କାରବାର ବ୍ୟବସାୟ ବଢିବାରେ ଲାଗିଛି।
ପଞ୍ଜାବର ସହିଦ ଭାଗବତ ସିଂ ନଗରରେ ଏକ ଟ୍ରକରୁ ୩୮ କିଲୋଗ୍ରାମ ହିରୋଇନ ଜବତ ହୋଇଛି। ଏହି ଘଟଣାରେ ଦୁଇ ଅଭିଯୁକ୍ତଙ୍କୁ ଗିରଫ କରାଯାଇଥିଲା। ଗୁଜୁରାଟରୁ ପଞ୍ଜାବକୁ ଡ୍ରଗ୍ସ ଅଣାଯାଉଥିବା କୁହାଯାଇଥିଲା।
କେଜ୍ରିୱାଲ ଏହି ପ୍ରସଙ୍ଗରେ ଟୁଇଟ୍ କରି ଲେଖିଛନ୍ତି, ଗୁଜୁରାଟକୁ ଏତେ ପରିମାଣରେ ଡ୍ରଗ୍ସ କିଏ ଆଣିଛି? ଏହି ବ୍ୟବସାୟର ମାଲିକ କିଏ? ଶୀର୍ଷରେ ବସିଥିବା ଲୋକଙ୍କ ସହଭାଗୀତା ବିନା ଡ୍ରଗ୍ସ ବ୍ୟବସାୟ ଏତେ ବଡ଼ ପରିମାଣରେ ସମ୍ଭବ କି?’ ଏବଂ କହିଥିଲେ ଯେ ଏପରି କରାଯାଇ ଦେଶର ଯୁବକମାନଙ୍କୁ ଅନ୍ଧକାର ଭିତରକୁ ଠେଲି ଦେଉଛନ୍ତି।
ରବିବାର ଏକ ବିବୃତ୍ତିରେ ପୋଲିସ କହିଛି ଯେ ଟ୍ରକଟି ଏସବିଏସ ନଗରର ରାଜପ୍ରାସାଦ ବାଇପାସରେ ଖୋଜାଖୋଜି କରାଯାଇଥିଲା। ଏହି ସମୟରେ ଟ୍ରକର ଟୁଲ ବାକ୍ସରେ ଲୁଚି ରହିଥିବା ୩୮ କିଲୋଗ୍ରାମ ହେରୋଇନ ଜବତ କରାଯାଇଥିଲା। ପୋଲିସ ଅଧିକାରୀ କହିଛନ୍ତି ଯେ ଟ୍ରକ ଡ୍ରାଇଭର ଏବଂ ତାଙ୍କ ସହଯୋଗୀ ଖସିଯିବାକୁ ଚେଷ୍ଟା କରିଥିଲେ। କିନ୍ତୁ ପୋଲିସ କର୍ମଚାରୀମାନେ ତାଙ୍କୁ ଧରି ପକାଇଥିଲେ।
ଅଭିଯୁକ୍ତମାନେ କୁଲବିନ୍ଦର ରାମ ଏବଂ ବିଟୁ ବୋଲି ଜଣାପଡିଛି। ହିରୋଇନ୍ ଚୋରା କାରବାରରେ ସମ୍ପୃକ୍ତ ଥିବା କୁଲବିନ୍ଦର, ବିଟୁ, ରାଜେଶ କୁମାର ଏବଂ ସୋମନାଥଙ୍କୁ ପୋଲିସ ଜେରା କରିଛି।
ପୋଲିସ କହିଛି ଯେ ପ୍ରାରମ୍ଭିକ ତଦନ୍ତ ସମୟରେ କୁଲବିନ୍ଦର କହିଛନ୍ତି ଯେ ରାଜେଶ ତାଙ୍କୁ ଗୁଜୁରାଟର ଭୁଜରୁ ହିରୋଇନ ଆଣିବାକୁ କହିଛନ୍ତି। ସେ କହିଥିଲେ ଯେ ଜାନୁଆରୀରେ ସେ ଶ୍ରୀନଗରରୁ ୩୦ କିଲୋଗ୍ରାମ ହିରୋଇନ ଆଣିଥିଲେ। ପୋଲିସ କହିଛି ଯେ ଏହା ପରେ ସେ ଦିଲ୍ଲୀରୁ ଏକ କିଲୋଗ୍ରାମ ହେରୋଇନ ମଧ୍ୟ ଆଣିଥିଲେ। ପୋଲିସର ସୂଚନାନୁସାରେ, ରାଜେଶ ଏବଂ ସୋମନାଥଙ୍କୁ ଗିରଫ କରାଯାଇ ନାହିଁ। ପୋଲିସ ଆହୁରି ମଧ୍ୟ କହିଛି ଯେ ରାଜେଶ ହତ୍ୟା, ଡ୍ରଗ୍ସ ଚୋରା ଚାଲାଣ ଏବଂ ଜାଲିଆତି ଭଳି ୧୯ ଟି ଅପରାଧିକ ମାମଲାରେ ସଂପୃକ୍ତ ।
