ନୂଆଦିଲ୍ଲୀ: ଡିସେମ୍ବର ୨୦୨୫ ପ୍ରାରମ୍ଭରେ ଇଣ୍ଡିଗୋ ଏୟାରଲାଇନ୍ସ ଉଡାଣ ନେଇ ଅସୁବିଧାର ସମ୍ମୁଖୀନ ହୋଇଥିଲା। ବହୁ ସଂଖ୍ୟକ ଉଡ଼ାଣ ବାତିଲ ହୋଇଥିଲା ବେଳେ ଅନେକ ବିମାନ ଘଣ୍ଟା ଘଣ୍ଟା ଧରି ବିଳମ୍ବ ହୋଇଥିଲା। ଏହା ଡିସେମ୍ବର ୩ରୁ ୫, ୨୦୨୫ ମଧ୍ୟରେ ନିର୍ଦ୍ଧାରିତ ଅନେକ ଉଡ଼ାଣକୁ ପ୍ରଭାବିତ କରିଥିଲା। ଫଳସ୍ୱରୂପ ଯାତ୍ରୀ ମାନେ ବହୁ ଅସୁବିଧାର ସମ୍ମୁଖୀନ ହୋଇଥିଲେ। ଏହି ଅବଧି ମଧ୍ୟରେ ଅସୁବିଧାର ସମ୍ମୁଖୀନ ହୋଇଥିବା ଯାତ୍ରୀ ମାନଙ୍କୁ ସେମାନଙ୍କ ଟିକେଟ ଫି ଫେରସ୍ତ କରାଯିବ ବୋଲି ବିମାନ କମ୍ପାନୀ ପକ୍ଷରୁ ଘୋଷଣା କରାଯାଇଥିଲା।
ଅପରପକ୍ଷରେ ଇଣ୍ଡିଗୋ ସ୍ୱୀକାର କରିଛି ଯେ ଏହି ତିନି ଦିନ ମଧ୍ୟରେ ଅନେକ ଯାତ୍ରୀ ଗୁରୁତ୍ୱପୂର୍ଣ୍ଣ ଅସୁବିଧାର ସମ୍ମୁଖୀନ ହୋଇଥିଲେ। ବର୍ତ୍ତମାନ ଡିସେମ୍ବର ୩ରୁ ୫, ୨୦୨୫ ମଧ୍ୟରେ ବାତିଲ ହୋଇଥିବା ଉଡ଼ାଣ ପାଇଁ ପୂର୍ଣ୍ଣ ରିଫଣ୍ଡ ପ୍ରକ୍ରିୟାକରଣ କରାଯାଇଛି। ଏହି ରିଫଣ୍ଡ ଯାତ୍ରୀମାନଙ୍କୁ ସେମାନଙ୍କର ଟିକେଟ ବୁକ୍ କରିବା ପାଇଁ ବ୍ୟବହାର କରାଯାଇଥିବା ସମାନ ପଦ୍ଧତି ଜରିଆରେ ଫେରସ୍ତ କରାଯାଇଛି। ଯଥା- କ୍ରେଡିଟ୍ କାର୍ଡ, ଡେବିଟ୍ କାର୍ଡ, UPI, କିମ୍ବା ବ୍ୟାଙ୍କ ଆକାଉଣ୍ଟ।
ଏହା ସହିତ ବିମାନ କମ୍ପାନୀ ସର୍ବାଧିକ ପ୍ରଭାବିତ ଯାତ୍ରୀମାନଙ୍କୁ ୧୦,୦୦୦ ମୂଲ୍ୟର ଏକ ଯାତ୍ରା ଭାଉଚର ପ୍ରଦାନ କରିବ। ଏହି ଭାଉଚର ଆଗାମୀ ୧୨ ମାସ ପାଇଁ ବୈଧ ହେବ ଏବଂ ଭବିଷ୍ୟତରେ ଇଣ୍ଡିଗୋ ବିମାନ ବୁକିଂ ପାଇଁ ବ୍ୟବହାର କରାଯାଇପାରିବ।
କିଏ ରିଫଣ୍ଡ ପାଇବେ ଏବଂ କିପରି?
ବିମାନ କମ୍ପାନୀ ଅନୁଯାୟୀ, ଯେଉଁ ଯାତ୍ରୀମାନେ ଇଣ୍ଡିଗୋ ସହିତ ସିଧାସଳଖ ଟିକେଟ୍ ବୁକ୍ କରିଥିଲେ, ସେମାନଙ୍କୁ ସମାନ ପେମେଣ୍ଟ ପଦ୍ଧତି ଜରିଆରେ କରି ଟଙ୍କା ଫେରସ୍ତ କରାଯାଉଛି। ଯଦି ଟିକେଟ୍ ଅନଲାଇନ୍ ଟ୍ରାଭେଲ୍ ପ୍ଲାଟଫର୍ମ କିମ୍ବା ଏଜେଣ୍ଟ ମାଧ୍ୟମରେ ବୁକ୍ କରାଯାଇଥିଲା ତେବେ ରିଫଣ୍ଡ ପ୍ରକ୍ରିୟା ମଧ୍ୟ ଆରମ୍ଭ କରାଯାଇଛି।
ଯଦି କୌଣସି ଯାତ୍ରୀଙ୍କ ସୂଚନା ସିଷ୍ଟମରେ ଅପଡେଟ୍ ହୋଇନାହିଁ। ତେବେ ସେମାନେ ଇମେଲ୍ ମାଧ୍ୟମରେ ଆମ ସହିତ ଯୋଗାଯୋଗ କରିପାରିବେ। ଇଣ୍ଡିଗୋ ଯାତ୍ରୀମାନଙ୍କୁ customer.experience@goindigo.in ରେ ଇମେଲ୍ କରିବାକୁ ପରାମର୍ଶ ଦେଉଛି।