ନୂଆଦିଲ୍ଲୀ: ଢାକାରୁ କରାଚି, ଏହି ରୁଟରେ ଆଜିଠାରୁ (ଜାନୁଆରୀ ୨୯) ସିଧା ଉଡ଼ାଣ ଆରମ୍ଭ ହୋଇଛି। ବିମାନ ବାଂଲାଦେଶ ଏୟାରଲାଇନ୍ସର ବୋଇଙ୍ଗ ୭୩୭ ବିମାନ ପ୍ରତି ସପ୍ତାହରେ ଦୁଇଥର, ବୁଧବାର ଓ ଶନିବାର ଏହି ରୁଟରେ ଉଡ଼ିବ। ପ୍ରାୟ ୧୪ ବର୍ଷ ପରେ ଏହି ସିଧା ସଂଯୋଗ ପୁନଃ ଚାଲୁ ହୋଇଛି। ୨୦୧୨ ମସିହାରେ ଏହି ଉଡ଼ାଣ ବନ୍ଦ ହୋଇଥିଲା।
ଯାତ୍ରୀମାନେ ବହୁତ ଖୁସି। ପ୍ରଥମ ଉଡ଼ାଣର ସବୁ ଟିକେଟ ବିକ୍ରି ହୋଇସାରିଛି। ଲୋକେ କହୁଛନ୍ତି – ଏବେ ଯାତ୍ରା ସହଜ ହେବ, ସମୟ ଓ ଖର୍ଚ୍ଚ କମିବ। ବ୍ୟବସାୟ, ପର୍ଯ୍ୟଟନ ଓ ଲୋକଙ୍କ ମଧ୍ୟରେ ସମ୍ପର୍କ ବଢ଼ିବ। ପାକିସ୍ତାନ ଓ ବାଂଲାଦେଶ ମଧ୍ୟରେ ରାଜନୈତିକ ଓ କୂଟନୈତିକ ସମ୍ପର୍କ ଭଲ ହେବାରେ ଏହା ଏକ ବଡ଼ ପଦକ୍ଷେପ।
କିନ୍ତୁ ଭାରତ ପାଇଁ ଏହା ଚିନ୍ତାର କାରଣ ହୋଇପାରେ। କାରଣ ଢାକା-କରାଚି ସିଧା ରୁଟ ସବୁଠାରୁ ଛୋଟ ପଥରେ ଭାରତର ଆକାଶପଥ ଦେଇ ଯାଏ। ଭାରତର ଅନୁମତି ବିନା ଏହି ଉଡ଼ାଣ ବହୁତ ଲମ୍ବା ଓ ମହଙ୍ଗା ହୋଇଯିବ – ପ୍ରାୟ ୮ ଘଣ୍ଟା ଓ ଦୁଇ ଗୁଣ ଦୂରତା। ଅନେକ ବିଶ୍ଲେଷକ କହୁଛନ୍ତି ଯେ ବାଂଲାଦେଶରେ ରାଜନୈତିକ ପରିବର୍ତ୍ତନ ପରେ ପାକିସ୍ତାନ ସହ ସମ୍ପର୍କ ବଢ଼ୁଛି। ଏହାର ସହିତ ସୁରକ୍ଷା ଓ ଗୁଇନ୍ଦା ସହଯୋଗ ବି ବଢ଼ୁଛି।
ଏହା ଭାରତର ପୂର୍ବ ସୀମାନ୍ତରେ ସୁରକ୍ଷା ପାଇଁ ବିପଦ ସୃଷ୍ଟି କରିପାରେ। କେତେକ ରିପୋର୍ଟରେ କୁହାଯାଇଛି ଯେ ପାକିସ୍ତାନର ଗୁଇନ୍ଦା ସଂସ୍ଥା ଓ ବାଂଲାଦେଶର ମଧ୍ୟରେ ସମ୍ପର୍କ ଭାରତ ବିରୋଧୀ କାର୍ଯ୍ୟକଳାପକୁ ସହଜ କରିପାରେ। ଏହି ସିଧା ଉଡ଼ାଣ ଲୋକଙ୍କ ଯାଆସ ବଢ଼ାଇବା ସହ ଅନ୍ୟ ସମ୍ଭାବ୍ୟ ବିପଦ ବି ଆଣିପାରେ। ସେହିପରି ଆତଙ୍କବାଦୀମାନେ ବାଂଲାଦେଶୀ ଭାବରେ ପଶ୍ଚିମବଙ୍ଗ ରାସ୍ତା ଦେଇ ଭାରତରେ ଅନୁପ୍ରବେଶ କରିପାରନ୍ତି। ପଶ୍ଚିମବଙ୍ଗରେ ହଜାର ହଜାର ବାଂଲାଦେଶୀ ରହୁଥିବାର ନଜିର ରହିଥିବାରୁ ଆଗାମୀ ଦିନରେ ଏହା ଭାରତ ପାଇଁ ବିପଦ ହେବ।
ତେବେ ଦକ୍ଷିଣ ଏସିଆରେ ସମ୍ପର୍କ ଦ୍ରୁତ ବଦଳୁଛି। ବାଂଲାଦେଶ ଓ ପାକିସ୍ତାନ ନିଜ ମଧ୍ୟରେ ସଂଯୋଗ ବଢ଼ାଉଛନ୍ତି, କିନ୍ତୁ ଏହାର ପ୍ରଭାବ ଭାରତ ଉପରେ ପଡ଼ିପାରେ। ସୁରକ୍ଷା ଦୃଷ୍ଟିରୁ ନୂଆ ଚ୍ୟାଲେଞ୍ଜ ଆସିପାରେ।