ନୂଆଦିଲ୍ଲୀ: ଭାରତୀୟ କ୍ରିକେଟର ଦି ୱାଲ ଭାବେ ପରିଚିତ ରାହୁଲ ଦ୍ରାବିଡ ବିଜେପିରେ ଯୋଗ ଦେବା ନେଇ ଚର୍ଚ୍ଚା ଜୋର ଧରିଛି । ହିମାଚଳ ପ୍ରଦେଶରେ ଚଳିତ ମାସ ୧୨ରୁ ୧୫ ପର୍ଯ୍ୟନ୍ତ ବିଜେପିର ଯୁବମୋର୍ଚ୍ଚା ରାଷ୍ଟ୍ରୀୟ କାର୍ଯ୍ୟସମିତି ଆୟୋଜିତ ହେବ । ଏଥିରେ ଦ୍ରାବିଡ ଯୋଗ ଦେବେ ବୋଲି ଜଣାପଡିବା ପରେ ଏହି ଆଲୋଚନା ଜୋର ଧରିଛି । ହିମାଚଳ ଏବଂ କର୍ଣ୍ଣାଟକରେ ଯୁବ ପିଢ଼ୀଙ୍କୁ ଆକୃଷ୍ଟ କରିବା ପାଇଁ ବିଜେପି ଏହି ପଦକ୍ଷେପ ଗ୍ରହଣ କରୁଥିବା ଅନୁମାନ କରାଯାଉଛି । ତେବେ ଦ୍ରାବିଡ ଏହି କାର୍ଯ୍ୟକ୍ରମରେ ଯୋଗ ଦେବେ କି ନାହିଁ ତାହା ସ୍ପଷ୍ଟ କରି ନାହାନ୍ତି । ଧର୍ମଶାଳା ବିଜେପି ବିଧାୟକ ବିଶାଲ ନହେରିୟା ପ୍ରଥମେ ସୂଚନା ଦେଇଥିଲେ ।
ଚଳିତ ବର୍ଷ ଶେଷ ଆଡକୁ ହିମାଚଳ ପ୍ରଦେଶର ୬୮ ସିଟ ପାଇଁ ଏହା ପରେ ଆସନ୍ତା ବର୍ଷ କର୍ଣ୍ଣାଟକରେ ନିର୍ବାଚନ ହେବ । ଦ୍ରାବିଡଙ୍କ ନୂତନ ଇନିଂସ ସମ୍ପର୍କରେ ଖୁବ ଶୀଘ୍ର ସ୍ଥିତି ସ୍ପଷ୍ଟ ହୋଇଯିବ ବୋଲି ତାଙ୍କର ଜଣେ ବନ୍ଧୁ କହିଛନ୍ତି । ନହେରିଆଙ୍କ ମତରେ ଦ୍ରାବିଡଙ୍କ ସନ୍ଦେଶ ଯୁବପିଢ଼ୀଙ୍କ ପାଇଁ ସର୍ବଦା ପ୍ରେରଣା ସାଜିବ । ଏହା ଦ୍ୱାରା ବିଜେପିର ମଧ୍ୟ ଫାଇଦା ହେବ ବୋଲି ସେ କହିଛନ୍ତି । ଏହି କାର୍ଯ୍ୟକ୍ରମରେ ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡାଙ୍କ ସମେତ ଅନେକ ବରିଷ୍ଠ ନେତା ଯୋଗଦେବେ ।
Comments are closed.