କୁର୍ନୁଲ: ଆନ୍ଧ୍ରପ୍ରଦେଶର ଦେବରଗଟ୍ଟୁ ଅଞ୍ଚଳରେ ଦଶହରା କହିଲେ ବନ୍ନି ପର୍ବକୁ ବୁଝାଏ। ଏଠାରେ ପ୍ରସିଦ୍ଧ ଶିବ ଠାକୁରଙ୍କ ପ୍ରତିମାକୁ ସାଙ୍ଗରେ ନେବାକୁ ଭକ୍ତମାନେ ପରସ୍ପରର ମୁଣ୍ଡକୁ ଲାଠିରେ ଆକ୍ରମଣ କରନ୍ତି। ତେବେ ବୁଧବାର ଏହି ବନ୍ନି ଉତ୍ସବରେ ହିଂସାତ୍ମକ ସଂଘର୍ଷ ଘଟିଥିଲା ଯେଉଁଥିରେ ପ୍ରାୟ ୫୦ ଜଣ ଆହତ ହୋଇଥିଲେ ଏବଂ ଦୁଇଜଣଙ୍କ ଅବସ୍ଥା ଗୁରୁତର ଥିବା କୁହାଯାଉଛି। ଏହି ଉତ୍ସବରେ ପ୍ରାୟ ୮୦୦ ପୋଲିସ ନିୟୋଜିତ ହୋଇଥିବା ସତ୍ତ୍ୱେ ଏପରି ଘଟଣା ଘଟିଥିଲା।
ଆନ୍ଧ୍ରପ୍ରଦେଶର କୁର୍ନୁଲ ଜିଲ୍ଲାର ହୋଲାଗୁଣ୍ଡାସ୍ଥିତ ଦେବରଗଟ୍ଟୁ ଅଞ୍ଚଳରେ ଦଶହରା ଦିନ ବନ୍ନି ପର୍ବ ପାଳନ କରାଯାଏ। ଜଣେ ଦାନବ ଉପରେ ଭଗବାନ ଶିବଙ୍କ ବିଜୟକୁ ସ୍ମରଣ କରି ମାଲା ମଲେଶ୍ୱରା ମନ୍ଦିର ନିକଟରେ ଏହି ଉତ୍ସବ ପାଳନ କରାଯାଏ। ଏହି ଗାଁରେ ଦଶହରା ଅବସରରେ ଲାଠି ମାଡ଼ ମାରିବା ଏକ ପ୍ରଥା ଭାବରେ ବିବେଚନା କରାଯାଏ। ଅର୍ଥାତ୍ ପରସ୍ପରକୁ ବାଡ଼ିରେ ପିଟିବା। ସେମାନଙ୍କ ରୀତିନୀତି ଅନୁଯାୟୀ ଦୁଇ ଗୋଷ୍ଠୀର ଲୋକମାନେ ପରସ୍ପରକୁ ମୁଣ୍ଡରେ ଆଘାତ କରନ୍ତି। ଏହି ପର୍ବରେ ପ୍ରତିବର୍ଷ ଅନେକ ଲୋକ ଆହତ ହୁଅନ୍ତି। ଗତ ବର୍ଷ ମଧ୍ୟ ସରକାରଙ୍କ ନିଷେଧାଦେଶ ସତ୍ତ୍ୱେ ଆନ୍ଧ୍ରପ୍ରଦେଶ ପୋଲିସ ବହୁ ପ୍ରତିବନ୍ଧକ ମଧ୍ୟରେ ବନ୍ନି ପର୍ବ ପାଳନ କରାଯାଇଥିଲା। ଯେଉଁଥିରେ ପ୍ରାୟ ୭୦ ଜଣ ଆହତ ହୋଇଥିଲେ।
ଏହି ପରମ୍ପରା ଦଶନ୍ଧି ଧରି ଚାଲିଆସୁଛି। ଚଳିତ ବର୍ଷ ମଧ୍ୟ ବନ୍ନି ମହୋତ୍ସବ ଦଶହରା ଉପଲକ୍ଷେ ଧୁମଧାମରେ ପାଳନ କରାଯାଇଥିଲା। ଏହି ପର୍ବ ରାତି ପ୍ରାୟ ୧୨ ଟା ସମୟରେ ମାଲା ମଲେଶ୍ୱର ମନ୍ଦିରରେ ପୂଜା କରିବା ପରେ ଆରମ୍ଭ ହୋଇ ସକାଳ ପର୍ଯ୍ୟନ୍ତ ଚାଲେ। ପ୍ରତିବର୍ଷ ପରି ଚଳିତ ବର୍ଷ ବର୍ଷା ହେବା ସତ୍ତ୍ୱେ ପ୍ରାୟ ୧୧ଟି ଗାଁରୁ ହଜାର ହଜାର ଲୋକେ ଆସି ଏହି ଉତ୍ସବରେ ସାମିଲ ହୋଇଥିଲେ। ଏହି ଗାଁର ଲୋକଙ୍କୁ ଦୁଇ ଭାଗରେ ବିଭକ୍ତ କରାଯାଇଥିଲା। ତା’ପରେ ଭଗବାନଙ୍କ ପ୍ରତିମାକୁ ନିଜ ସାଙ୍ଗରେ ନେଇଯିବାକୁ ଛିନତାଇ ଆରମ୍ଭ ହେଲା। ଏହାରି ଭିତରେ ଗୋଟିଏ ଗୋଷ୍ଠୀ ଅନ୍ୟ ଗୋଷ୍ଠୀର ଲୋକଙ୍କ ଉପରେ ଲାଠି ସାହାଯ୍ୟରେ ଆକ୍ରମଣ କରିଥିଲେ।
କର୍ଣ୍ଣାଟକର ସୀମାନ୍ତର ଲୋକମାନେ ମଧ୍ୟ ଏହି ପର୍ବ ଦେଖିବାକୁ ଆସିଥିଲେ। ଲାଠି ମାଡ଼ ସମୟରେ ଉତ୍ସବ ହିଂସାତ୍ମକ ରୂପ ନେଇଥିଲା। ଏହି ଆକ୍ରମଣରେ ସମସ୍ତ ଆହତ ଏବଂ ଗୁରୁତର ଲୋକଙ୍କୁ ଡାକ୍ତରଖାନାରେ ଚିକିତ୍ସା ନିମନ୍ତେ ନିଆଯାଇଛି।