ପୁରୀ: ପୁରୀ ବିମାନବନ୍ଦର ଜଙ୍ଗଲ ଜମି ମଞ୍ଜୁରୀକୁ ସ୍ଥଗିତ ରଖିଲା ପରିବେଶ ମନ୍ତ୍ରଣାଳୟର ଜଙ୍ଗଲ ପରାମର୍ଶଦାତା କମିଟି (ଏଫଏସି) । ମନ୍ତ୍ରଣାଳୟ ପକ୍ଷରୁ ଅଲିଭ୍ ରିଡଲେ କଇଁଛ , ଇରାୱାଡ୍ଡି ଡଲଫିନ୍ ଏବଂ ପ୍ରବାସୀ ପକ୍ଷୀଙ୍କ ପାଇଁ ସମ୍ଭାବ୍ୟ କ୍ଷତି ଏବଂ ଘୂର୍ଣ୍ଣିଝଡ଼ରୁ ଉପକୂଳକୁ ସୁରକ୍ଷା ଦେଉଥିବା ୧୩,୦୦୦ ଗଛ ନଷ୍ଟ ହେବାର ପ୍ରଭାବ ନେଇ ଚିନ୍ତା ପ୍ରକଟ କରାଯାଇଛି ।
ପୁରୀ ଉପକୂଳରେ ଅଲିଭ୍ ରିଡଲେ କଇଁଛ, ଇରାୱାଡ୍ଡି ଡଲଫିନ୍ ଏବଂ ଚିଲ୍କା ହ୍ରଦକୁ ଆସୁଥିବା ପ୍ରବାସୀ ପକ୍ଷୀଙ୍କ ପ୍ରବାସ ପଥ, ବିପଦ ଏବଂ ସଂରକ୍ଷଣ ଆବଶ୍ୟକତା ସମ୍ପର୍କରେ ଉଠାଯାଇଥିବା ଚିନ୍ତାକୁ ଦୃଷ୍ଟିରେ ରଖି, ରାଜ୍ୟ ଏହି ବିଷୟ ଉପରେ ଡବ୍ଲୁଆଇଆଇର ମତାମତ ଏବଂ ସୁପାରିଶ ଲୋଡିବା ଆବଶ୍ୟକ ବୋଲି ଏଫଏସି କହିଛି । ଏଫଏସି ଓଡ଼ିଶା ସରକାରଙ୍କୁ ସତର୍କତାମୂଳକ ପଦକ୍ଷେପ ଗ୍ରହଣ କରିବାକୁ ଏବଂ ଏହି ମାମଲାକୁ ଭାରତୀୟ ବନ୍ୟପ୍ରାଣୀ ପ୍ରତିଷ୍ଠାନ (ଡବ୍ଲୁଆଇଆଇ)କୁ ପଠାଇବାକୁ ଅନୁରୋଧ କରିଛି ।
ଚଳିତବର୍ଷ ମେ’ ମାସ ୫ ତାରିଖରେ ଶ୍ରୀଜଗନ୍ନାଥ ଅନ୍ତର୍ଜାତୀୟ ବିମାନବନ୍ଦରକୁ କେନ୍ଦ୍ର ବିମାନ ଚଳାଚଳ ମନ୍ତ୍ରଣାଳୟ ମଞ୍ଜୁରୀ ଦେଇଥିଲେ । ପୁରୀ ଜିଲ୍ଲାର ସିପସରୁବାଲିରେ ପ୍ରାୟ ୪୭୧ ହେକ୍ଟର ଜମିରେ ନିର୍ମାଣ କରାଯିବାର ପ୍ରସ୍ତାବ ରହିଛି । ରାଜ୍ୟ ସରକାର ଏହି ପ୍ରକଳ୍ପ ପାଇଁ ୨୭.୮୮ ହେକ୍ଟର ଜଙ୍ଗଲ ଜମି ବ୍ୟବହାର ପାଇଁ ଅନୁମୋଦନ ଲୋଡ଼ିଛନ୍ତି, ଯାହାର ମୂଲ୍ୟ ପ୍ରାୟ ୫,୬୩୧ କୋଟି ହେବ ।
ଅନ୍ୟପଟେ, କଇଁଛ ସମ୍ପର୍କରେ ମନ୍ତ୍ରଣାଳୟ ଦ୍ୱାରା ଉଠାଯାଇଥିବା ଚିନ୍ତାର ଜବାବରେ, ରାଜ୍ୟ ସରକାର କହିଛନ୍ତି ଯେ, ଏକ ସ୍ଥାନ-ନିର୍ଦ୍ଦିଷ୍ଟ ବନ୍ୟପ୍ରାଣୀ ସଂରକ୍ଷଣ ଯୋଜନା ପ୍ରସ୍ତୁତ କରାଯାଇପାରିବ, ଯେଉଁଥିରେ ବିସ୍ତୃତ ପ୍ରଶମନ ପଦକ୍ଷେପ ଅନ୍ତର୍ଭୁକ୍ତ ହେବ । ଡଲଫିନ ସମ୍ପର୍କରେ ଚିନ୍ତା ଉପରେ, ରାଜ୍ୟ ସରକାର କହିଛନ୍ତି, ଗୋପାଳପୁରରେ ଭାରତୀୟ ପ୍ରାଣୀ ସର୍ବେକ୍ଷଣର ଆଞ୍ଚଳିକ କାର୍ଯ୍ୟାଳୟ ଏନେଇ ଏକ ଅଧ୍ୟୟନ କରୁଛି । ପ୍ରକଳ୍ପର ଫ୍ଲାଏୱେ କିମ୍ବା ପ୍ରବାସୀ ପକ୍ଷୀଙ୍କ ମାର୍ଗ ଉପରେ ପ୍ରଭାବ ବିଷୟରେ ଚିନ୍ତା ପ୍ରକଟ କରି ଓଡ଼ିଶା ସରକାର କହିଛନ୍ତି ଯେ, ପୂର୍ବରୁ ଦକ୍ଷିଣ ସହରଗୁଡ଼ିକୁ ବିମାନଗୁଡ଼ିକ ପୂର୍ବରୁ ସମାନ ଆକାଶପଥରେ ଚଳାଚଳ କରୁଛି।
ଏପରି ସମସ୍ତ ବିମାନ ସାଧାରଣତଃ ଚିଲିକା ହ୍ରଦ ଉପରେ କେନ୍ଦ୍ରୀୟ ଏସୀୟ ଫ୍ଲାଏୱେ ଦେଇ ଯାଇଥାନ୍ତି । ତେଣୁ ପକ୍ଷୀଙ୍କ ସ୍ଥାନାନ୍ତରଣ ଉପରେ କୌଣସି ପ୍ରତିକୂଳ ପ୍ରଭାବ ପଡ଼ିନାହିଁ ବୋଲି ରାଜ୍ୟ ବାଣିଜ୍ୟ ଏବଂ ପରିବହନ ବିଭାଗ କହିଛି । ପ୍ରବାସୀ ପକ୍ଷୀମାନଙ୍କ ଉପରେ ପ୍ରକଳ୍ପର ସମ୍ଭାବ୍ୟ ପ୍ରଭାବ ବିଷୟରେ ମଧ୍ୟ ଜେଡଏସଆଇ ଅଧ୍ୟୟନ କରିବ ବୋଲି କୁହାଯାଇଛି ।
Comments are closed.