ନୂଆଦିଲ୍ଲୀ: ଲୋକସଭାର ଏଥିକ୍ସ କମିଟି ଗୃହ ମନ୍ତ୍ରାଳୟକୁ ତୃଣମୂଳ କଂଗ୍ରେସ (ଟିଏମସି) ସାଂସଦ ମହୁଆ ମୈତ୍ରାଙ୍କ 5 ବର୍ଷର ବିଦେଶ ଗସ୍ତର ସବିଶେଷ ତଥ୍ୟ ଦେବାକୁ କହିପାରେ। ଆଜି ଏଥିକ୍ସ କମିଟି ବୈଠକ ବସିବା ପରେ ଏହି ସୂଚନା ମିଳିଛି। ମହୁଆ ତାଙ୍କ ବିଦେଶ ଗସ୍ତ ପାଇଁ ଲୋକସଭାକୁ ସୂଚନା ଦେବା ଏବଂ ଆବଶ୍ୟକ ଅନୁମତି ନେବା ଭଳି ସମସ୍ତ ପ୍ରକ୍ରିୟାକୁ ପାଳନ କରିଛନ୍ତି କି ନାହିଁ ସେ ସମ୍ପର୍କରେ ମଧ୍ୟ କମିଟି ସୂଚନା ମାଗୁଛି।
ବିଜେପି ସାଂସଦ ନିଶିକାନ୍ତ ଦୁବେ ସଂସଦରେ ପ୍ରଶ୍ନ ପଚାରିବା ପାଇଁ ଜଣେ ବ୍ୟବସାୟୀଙ୍କଠାରୁ ଲାଞ୍ଚ ନେଉଥିବା ଅଭିଯୋଗ ଆଣିବା ପରେ ଏହା ସାମ୍ନାକୁ ଆସିଛି। ମହୁଆ ଓ ବ୍ୟବସାୟୀ ଦର୍ଶନ ହୀରାନନ୍ଦାନୀଙ୍କ ମଧ୍ୟରେ ଲାଞ୍ଚ କାରବାରର ଠୋସ୍ ପ୍ରମାଣ ତାଙ୍କ ପାଖରେ ରହିଛି ବୋଲି ଦୁବେ ଦାବି କରିଛନ୍ତି।
ଏହି ଅଭିଯୋଗକୁ ଭିତ୍ତିହୀନ ଏବଂ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ ବୋଲି କହି ମହୁଆ ଏହାକୁ ଖଣ୍ଡନ କରିଛନ୍ତି ତାଙ୍କ ବିରୋଧରେ ଆସିଥିବା ଅଭିଯୋଗର ଉତ୍ତର ଦେବା ପାଇଁ ସେ ଅକ୍ଟୋବର 31ରେ ଏଥିକ୍ସ କମିଟି ଆଗରେ ହାଜର ହେବାକୁ ନୁର୍ଦ୍ଦେଶ ଦିଆଯାଇଛି।
ଏଥିକ୍ସ କମିଟି ଏକ ସଂସଦୀୟ ପ୍ୟାନେଲ ଯାହା ସଂସଦର ସଦସ୍ୟମାନଙ୍କ ଅନୈତିକ ଆଚରଣ ଅଭିଯୋଗର ତଦନ୍ତ ଓ ରିପୋର୍ଟ ପ୍ରଦାନ କରିଥାଏ। ଲୋକସଭାର ଆଚରଣ ବିଧି ଉଲ୍ଲଙ୍ଘନ କରିଥିବା ସାଂସଦଙ୍କ ବିରୋଧରେ ସାକ୍ଷୀଙ୍କୁ ଡକାଇ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ପାଇଁ ସୁପାରିଶ କରିବାର କ୍ଷମତା ଏହି କମିଟିର ରହିଛି।
ଗୁରୁତ୍ବପୂର୍ଣ୍ଣ କଥା ହେଉଛି, ଏଥିକ୍ସ କମିଟି ଏବେ ବି ମହୁଆଙ୍କ ବିରୋଧରେ ଆସିଥିବା ଅଭିଯୋଗର ତଦନ୍ତ କରୁଛି। ଏହି ସମୟରେ ସେ କୌଣସି ଭୁଲ୍ କାମରେ ଲିପ୍ତ ଥିବାର ପ୍ରମାଣ ମିଳିନାହିଁ।
ହେଲେ ମହୁଆଙ୍କ ବିରୋଧରେ ଏଥିକ୍ସ କମିଟିର ତଦନ୍ତର ଫଳାଫଳ ତାଙ୍କ ରାଜନୈତିକ କ୍ୟାରିୟର ଉପରେ ବିଶେଷ ପ୍ରଭାବ ପକାଇପାରେ। ଯଦି ତାଙ୍କ ବିରୋଧରେ ଆସିଥିବା ଅଭିଯୋଗରେ ସେ ଦୋଷୀ ସାବ୍ୟସ୍ତ ହୁଅନ୍ତି ତେବେ ସେ ସଂସଦରୁ ଅଯୋଗ୍ୟ ଘୋଷିତ ହୋଇପାରନ୍ତି।
Comments are closed.