ନୂଆଦିଲ୍ଲୀ: ଜୁନ୍ ୧୨ ତାରିଖରେ ଅହମ୍ମଦାବାଦରେ ଘଟିଥିବା ହୃଦୟ ବିଦାରକ ବିମାନ ଦୁର୍ଘଟଣାରେ ଗୁଜରାଟର ପୂର୍ବତନ ମୁଖ୍ୟମନ୍ତ୍ରୀ ବିଜୟ ରୂପାନୀଙ୍କ ମୃତ୍ୟୁ ହୋଇଥିଲା । ଏହି ବିମାନରେ ୨୪୨ ଜଣ ଥିଲେ, ଯେଉଁଥିରୁ କେବଳ ଜଣେ ବଞ୍ଚି ଯାଇଥିଲେ । ତଥାପି, ବିଜୟ ରୂପାନୀ ପ୍ରଥମ ନେତା ନୁହଁନ୍ତି ଯିଏ ବିମାନ ଦୁର୍ଘଟଣାରେ ପ୍ରାଣ ହରାଇଛନ୍ତି । ଏହା ପୂର୍ବରୁ ବିମାନ ଦୁର୍ଘଟଣାରେ ଅନେକ ଶୀର୍ଷ ନେତା ଓ ଅଭିନେତା ପ୍ରାଣ ହରାଇଛନ୍ତି ଆସନ୍ତୁ ଜାଣିବା ସେମାନଙ୍କ ବିଷୟରେ ।
ହୋମି ଜହାଙ୍ଗୀର ଭାଭା (୧୯୬୬): ଭାରତର ପ୍ରମୁଖ ପରମାଣୁ ଭୌତିକବିଜ୍ଞାନୀ ହୋମି ଜହାଙ୍ଗୀର ଭାଭା ଜାନୁଆରୀ ୨୪, ୧୯୬୬ରେ ଏୟାର ଇଣ୍ଡିଆ ଫ୍ଲାଇଟ୍ ୧୦୧ ଦୁର୍ଘଟଣାରେ ମୃତ୍ୟୁବରଣ କରିଥିଲେ । ଜେନେଭା ଏୟାର ଟ୍ରାଫିକ୍ ନିୟନ୍ତ୍ରଣ ସହିତ ଭୁଲ ଯୋଗାଯୋଗ ଯୋଗୁଁ ବିମାନଟି ସ୍ୱିସ୍ ଆଲପ୍ସରେ ଖସି ପଡ଼ିଥିଲା ।
ସଞ୍ଜୟ ଗାନ୍ଧୀ (୧୯୮୦): କଂଗ୍ରେସ ନେତା ଏବଂ ତତ୍କାଳୀନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ପୁଅ ସଞ୍ଜୟ ଗାନ୍ଧୀଙ୍କ ମୃତ୍ୟୁ ୨୩ ଜୁନ୍ ୧୯୮୦ରେ ଏକ ବିମାନ ଦୁର୍ଘଟଣାରେ ହୋଇଥିଲା । ସଞ୍ଜୟ ସଫଦରଜଙ୍ଗ ବିମାନବନ୍ଦର ନିକଟରେ ଦିଲ୍ଲୀ ଫ୍ଲାଇଂ କ୍ଲବ୍ ବିମାନ ଉଡ଼ାଉଥିଲେ ଏବଂ ବିମାନ ଚାଳନ କରିବା ସମୟରେ ବିମାନ ଉପରୁ ନିୟନ୍ତ୍ରଣ ହରାଇଥିଲେ । ବିମାନ ଦୁର୍ଘଟଣା ଯୋଗୁଁ ସେ ପ୍ରାଣ ହରାଇଲେ ।
ମାଧବ ରାଓ ସିନ୍ଧିଆ (୨୦୦୧): ବରିଷ୍ଠ କଂଗ୍ରେସ ନେତା ମାଧବରାଓ ସିନ୍ଧିଆଙ୍କ ମୃତ୍ୟୁ ସେପ୍ଟେମ୍ବର ୩୦, ୨୦୦୧ରେ ଏକ ବିମାନ ଦୁର୍ଘଟଣାରେ ହୋଇଥିଲା । ସେ କାନପୁର ଯାଉଥିବା ଏକ ଦଶ ସିଟ୍ ବିଶିଷ୍ଟ ଘରୋଇ ବିମାନରେ ଯାତ୍ରା କରୁଥିଲେ, ଯାହାକି ଉତ୍ତର ପ୍ରଦେଶର ମୈନପୁରୀ ନିକଟରେ ଖରାପ ପାଗ ଯୋଗୁଁ ଦୁର୍ଘଟଣାଗ୍ରସ୍ତ ହୋଇଥିଲା । ସିନ୍ଧିଆ ନିଜେ ପୂର୍ବତନ ବେସାମରିକ ବିମାନ ଚଳାଚଳ ମନ୍ତ୍ରୀ ଥିଲେ ।
ଜିଏମସି ବାଲାଯୋଗୀ (୨୦୦୨): ଲୋକସଭା ବାଚସ୍ପତି ଏବଂ ତେଲୁଗୁ ଦେଶମ ପାର୍ଟି ନେତା ଜିଏମସି ବାଲାଯୋଗୀଙ୍କ ୩ ମାର୍ଚ୍ଚ, ୨୦୦୨ରେ ଏକ ହେଲିକପ୍ଟର ଦୁର୍ଘଟଣାରେ ମୃତ୍ୟୁ ହୋଇଥିଲା । ଦୁର୍ଘଟଣା ସମୟରେ, ସେ ଆନ୍ଧ୍ରପ୍ରଦେଶର ପଶ୍ଚିମ ଗୋଦାବରୀ ଜିଲ୍ଲାର ଭୀମାଭରମରୁ ଆସୁଥିବା ସମୟରେ କୃଷ୍ଣା ଜିଲ୍ଲାର କୈକାଲୁର ନିକଟରେ ତାଙ୍କ ହେଲିକପ୍ଟର ଦୁର୍ଘଟଣାଗ୍ରସ୍ତ ହୋଇ ଏକ ପୋଖରୀରେ ପଡ଼ିଯାଇଥିଲା ।
ସାଇପ୍ରିଆନ୍ ସାଙ୍ଗମା (୨୦୦୪): ମେଘାଳୟ ଗ୍ରାମୀଣ ବିକାଶ ମନ୍ତ୍ରୀ ସାଇପ୍ରିଆନ୍ ସାଙ୍ଗମା ଏବଂ ଅନ୍ୟ ନଅ ଜଣ ୨୦୦୪ ସେପ୍ଟେମ୍ବର ୨୨ ତାରିଖରେ ପବନ ହଂସ ହେଲିକପ୍ଟରରେ ଗୌହାଟିରୁ ଶିଲଂ ଯାତ୍ରା କରୁଥିଲେ । ଏହି ସମୟରେ, ତାଙ୍କ ହେଲିକପ୍ଟର ରାଜ୍ୟ ରାଜଧାନୀରୁ ମାତ୍ର ୨୦ କିଲୋମିଟର ଦୂରରେ ଥିବା ବାରାପାଣି ହ୍ରଦ ନିକଟରେ ଦୁର୍ଘଟଣାଗ୍ରସ୍ତ ହୋଇଥିଲା, ଯାହା ଫଳରେ ତାଙ୍କର ମୃତ୍ୟୁ ହୋଇଥିଲା ।
କେ ଏସ୍ ସୌମ୍ୟା (୨୦୦୪): ଦକ୍ଷିଣ ଭାରତୀୟ ଅଭିନେତ୍ରୀ କେ ଏସ୍ ସୌମ୍ୟା, ଯାହାଙ୍କୁ ସୌନ୍ଦର୍ଯ୍ୟା ନାମରେ ଜଣାଶୁଣା, ୧୭ ଏପ୍ରିଲ ୨୦୦୪ରେ ଏକ ବିମାନ ଦୁର୍ଘଟଣାରେ ମୃତ୍ୟୁବରଣ କରିଥିଲେ । ‘ସୂର୍ଯ୍ୟବଂଶମ୍’ ଅଭିନେତ୍ରୀ ଦୁର୍ଘଟଣା ସମୟରେ ତାଙ୍କ ଭାଇଙ୍କ ସହିତ ବେଙ୍ଗାଲୁରୁରୁ କରିମନଗର ଯାତ୍ରା କରୁଥିଲେ ।
ଓପି ଜିନ୍ଦଲ ଏବଂ ସୁରିନ୍ଦର ସିଂହ (୨୦୦୫): ଶିଳ୍ପପତି ଏବଂ ହରିୟାଣା ମନ୍ତ୍ରୀ ଓମ ପ୍ରକାଶ ଜିନ୍ଦଲ ଏବଂ କୃଷି ମନ୍ତ୍ରୀ ସୁରିନ୍ଦର ସିଂହ ୨୦୦୫ ମସିହାରେ ଏକ ହେଲିକପ୍ଟର ଦୁର୍ଘଟଣାରେ ମୃତ୍ୟୁବରଣ କରିଥିଲେ । ତାଙ୍କ ହେଲିକପ୍ଟର ଦିଲ୍ଲୀରୁ ଚଣ୍ଡିଗଡ଼ ଯାଉଥିବା ସମୟରେ ଉତ୍ତର ପ୍ରଦେଶର ସହାରନପୁରରେ ଦୁର୍ଘଟଣାଗ୍ରସ୍ତ ହୋଇଥିଲା ।
ୱାଇ ଏସ୍ ରେଡ୍ଡୀ (୨୦୦୯): ଆନ୍ଧ୍ର ପ୍ରଦେଶର ତତ୍କାଳୀନ ମୁଖ୍ୟମନ୍ତ୍ରୀ ୱାଇ ଏସ୍ ରାଜଶେଖର ରେଡ୍ଡୀ (୨୦୦୯), ଯିଏ କି ୱାଇଏସ୍ ଆର୍ ଭାବରେ ଜଣାଶୁଣା, ୨୦୦୯ ସେପ୍ଟେମ୍ବର ୨ ତାରିଖରେ ଏକ ହେଲିକପ୍ଟର ଦୁର୍ଘଟଣାରେ ମୃତ୍ୟୁବରଣ କରିଥିଲେ । ଖରାପ ପାଗ ଯୋଗୁଁ ଘନ ନଲାମାଲା ଜଙ୍ଗଲରେ ତାଙ୍କର ବେଲ୍ ୪୩୦ ହେଲିକପ୍ଟର ଦୁର୍ଘଟଣାଗ୍ରସ୍ତ ହେବା ଫଳରେ ଏହି ଦୁର୍ଘଟଣା ଘଟିଥିଲା ।
ଦୋର୍ଜୀ ଖାଣ୍ଡୁ (୨୦୧୧): ଅରୁଣାଚଳ ପ୍ରଦେଶର ତତ୍କାଳୀନ ମୁଖ୍ୟମନ୍ତ୍ରୀ ଦୋର୍ଜୀ ଖାଣ୍ଡୁ ଏବଂ ଅନ୍ୟ ଚାରି ଜଣଙ୍କର ମୃତ୍ୟୁ ଏପ୍ରିଲ ୩୦, ୨୦୧୧ରେ ହୋଇଥିଲା ଯେତେବେଳେ ସେମାନଙ୍କୁ ତୱାଙ୍ଗରୁ ଇଟାନଗର ନେଇ ଯାଉଥିବା ହେଲିକପ୍ଟରଟି ରାଜ୍ୟର ପଶ୍ଚିମ କାମେଙ୍ଗ ଜିଲ୍ଲାରେ ଦୁର୍ଘଟଣାଗ୍ରସ୍ତ ହୋଇଥିଲା ।
ସିଡିଏସ୍ ଜେନେରାଲ ବିପିନ୍ ରାୱତ (୨୦୨୧): ଭାରତର ପ୍ରଥମ ପ୍ରତିରକ୍ଷା ମୁଖ୍ୟ (ସିଡିଏସ୍) ଜେନେରାଲ ବିପିନ୍ ରାୱତଙ୍କ ମୃତ୍ୟୁ ଡିସେମ୍ବର ୮, ୨୦୨୧ରେ ଏକ ହେଲିକପ୍ଟର ଦୁର୍ଘଟଣାରେ ହୋଇଥିଲା । ଏହି ଘଟଣାଟି ତାମିଲନାଡୁର କୁନୁର ନିକଟରେ ଘଟିଥିଲା, ଯେତେବେଳେ ସେ ତାଙ୍କ ପତ୍ନୀ ଏବଂ ଅନ୍ୟ ୧୧ ଜଣଙ୍କ ସହିତ ସୁଲୁରରୁ ୱେଲିଂଟନ୍ ଯାତ୍ରା କରୁଥିଲେ ।
Comments are closed.