ଏହି ସ୍ୱତନ୍ତ୍ର ଦିନରେ ଭାରତରେ ଲଞ୍ଚ୍‌ ହେବ FAU-G ଗେମ୍‌

ନୂଆଦିଲ୍ଲୀ: ଦୀର୍ଘ ସମୟ ଅପେକ୍ଷା ପରେ ଶେଷରେ ଭାରତରେ FAU-G ଗେମ୍‌ ଲଞ୍ଚ୍‌ ହେବାକୁ ଯାଉଛି। FAU-G ଖେଳ ଭାରତରେ ୨୬ ଜାନୁଆରୀ ୨୦୨୧ରେ ଅର୍ଥାତ୍ ଗଣତନ୍ତ୍ର ଦିବସରେ ଲଞ୍ଚ୍‌ ହେବ। ପ୍ରାୟ ୪ ମାସ ପୂର୍ବରୁ FAU-G ଖେଳକୁ ନେଇ ଘୋଷଣା କରାଯାଇଥିଲା। ଏହାର ପୂର୍ବ ପଞ୍ଜୀକରଣ ଗତ ବର୍ଷ ନଭେମ୍ବରରେ ଆରମ୍ଭ ହୋଇଥିଲା। ଖେଳର ପୂର୍ବ-ପଞ୍ଜୀକରଣର ୨୪ ଘଣ୍ଟା ମଧ୍ୟରେ ପ୍ରାୟ ୧୦ ଲକ୍ଷ ଲୋକ ପଞ୍ଜୀକୃତ ହୋଇଥିଲେ। ଯାହା ଏକ ସୂଚକ ଯେ ଏହା ଲଞ୍ଚ ହେବା ପୂର୍ବରୁ ବ୍ୟବହାରକାରୀଙ୍କ ମଧ୍ୟରେ ଲୋକପ୍ରିୟ ହେବା ଆରମ୍ଭ କରିଛି।

କମ୍ପାନୀ ଦ୍ୱାରା ପ୍ରକାଶିତ ଭିଡିଓରେ ଲଞ୍ଚ୍‌ ତାରିଖ ୨୬/୧ ବୋଲି ଦିଆଯାଇଛି। ଏଥିରେ ଭାରତୀୟ ସୈନିକମାନେ ଲଦାଖର LAC ରେ ୧୪,୦୦୦ ଫୁଟ ଉଚ୍ଚରେ ୩୪.୭୩୭୮ ଡିଗ୍ରୀ ଉତ୍ତରରେ ୭୮.୭୭୮୦ ଡିଗ୍ରୀ ଏବଂ ମାଇନସ୍ ୩୦ ଡିଗ୍ରୀ ଉପରେ ନିଜର ବୀରତ୍ୱ ପ୍ରଦର୍ଶନ କରୁଥିବା ଦେଖିବାକୁ ମିଳିବ। ଭିଡିଓର ପୃଷ୍ଠଭୂମିରେ ଏକ ସଙ୍ଗୀତ ମଧ୍ୟ ଶୁଣିବାକୁ ମିଳୁଛି। ଟ୍ୱିଟର ମାଧ୍ୟମରେ ଡେଭଲପର୍ସ nCore ଗେମ୍ସ ଦ୍ୱାରା FAU-G ଖେଳର ଶୁଭାରମ୍ଭ ତାରିଖ ଘୋଷଣା କରାଯାଇଥିଲା। ଏହି ଖେଳ ଗୁଗୁଲ୍ ପ୍ଲେ ଷ୍ଟୋର ବ୍ୟବହାରକାରୀଙ୍କ ପାଇଁ ଉପଲବ୍ଧ ହେବ।