ବଜେଟ୍ ୨୦୨୪କୁ ନେଇ ବିରୋଧୀଙ୍କ ବିକ୍ଷୋଭକୁ ନିନ୍ଦନୀୟ କହି କଡ଼ା ଜବାବ ଦେଲେ ଅର୍ଥମନ୍ତ୍ରୀ

ନୂଆଦିଲ୍ଲୀ: କେନ୍ଦ୍ର ବଜେଟ୍ ୨୦୨୪ରେ ବିହାର ଓ ଆନ୍ଧ୍ରପ୍ରଦେଶକୁ ଅନ୍ୟ ରାଜ୍ୟ ତୁଳନାରେ ଅଧିକ ଅନୁଦାନ ଦିଆଯାଇଥିବା ବିରୋଧୀଙ୍କ ଅଭିଯୋଗ ଉପରେ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ପ୍ରତିକ୍ରିୟା ପ୍ରକାଶ କରିଛନ୍ତି।

ବିରୋଧୀ ଏହାକୁ ଭେଦଭାବପୂର୍ଣ୍ଣ ବୋଲି କହିଛନ୍ତି। କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ରାଜ୍ୟସଭାରେ କହିଛନ୍ତି ଯେ ବଜେଟରେ କୌଣସି ରାଜ୍ୟକୁ ଅଣଦେଖା କରାଯାଇ ନାହିଁ ଏବଂ କଂଗ୍ରେସ ନେତୃତ୍ୱାଧୀନ ବିରୋଧୀ ଜାଣିଶୁଣି ଦେଶବାସୀଙ୍କୁ ବିଭ୍ରାନ୍ତ କରିବାକୁ ଚେଷ୍ଟା କରୁଛନ୍ତି।

ବିରୋଧୀ ସାଂସଦଙ୍କ ନାରାବାଜି ଭିତରେ ସୀତାରମଣ କହିଛନ୍ତି, ପ୍ରତି ବଜେଟରେ ଦେଶର ପ୍ରତ୍ୟେକ ରାଜ୍ୟର ନାଁ ନେବାର ସୁଯୋଗ ମିଳୁନାହିଁ। ସେ ଆହୁରି ମଧ୍ୟ କହିଛନ୍ତି ଯେ ମହାରାଷ୍ଟ୍ରର ପାଲଘର ଜିଲ୍ଲାର ଏକ ସହର ବଡଭାନରେ ଏକ ବନ୍ଦର ସ୍ଥାପନ କରିବାକୁ କେନ୍ଦ୍ର କ୍ୟାବିନେଟ ନିଷ୍ପତ୍ତି ନେଇଛି, କିନ୍ତୁ ମଙ୍ଗଳବାର ବଜେଟ୍ ଅଭିଭାଷଣରେ ରାଜ୍ୟର ନାମ ଉଲ୍ଲେଖ କରାଯାଇ ନାହିଁ। ଏହାର ଅର୍ଥ କ’ଣ ମହାରାଷ୍ଟ୍ର ଅବହେଳିତ ଅନୁଭବ କରୁଛି?

ଅଭିଭାଷଣରେ ଯଦି କୌଣସି ନିର୍ଦ୍ଦିଷ୍ଟ ରାଜ୍ୟର ନାମ ରହିଛି, ତା’ର ଅର୍ଥ କ’ଣ ଭାରତ ସରକାରଙ୍କ କାର୍ଯ୍ୟକ୍ରମ ଏହି ରାଜ୍ୟଗୁଡ଼ିକୁ ଯିବ ନାହିଁ? ଆମ ରାଜ୍ୟକୁ କିଛି ଦିଆଯାଇନାହିଁ ବୋଲି ଲୋକଙ୍କୁ ଧାରଣା ଦେବା ପାଇଁ କଂଗ୍ରେସ ନେତୃତ୍ବାଧୀନ ବିରୋଧୀଙ୍କ ଏହା ଉଦ୍ଦେଶ୍ୟମୂଳକ ପ୍ରୟାସ। ଏହା ଏକ ଅପମାନଜନକ ଅଭିଯୋଗ ବୋଲି ଅର୍ଥମନ୍ତ୍ରୀ ନିର୍ମଳା ସୀତାରମଣ ରାଜ୍ୟସଭାରେ ‘ଭେଦଭାବପୂର୍ଣ୍ଣ’ ବଜେଟ୍ ବିରୋଧରେ ବିରୋଧୀଙ୍କ ପ୍ରତିବାଦ ଉପରେ କହିଛନ୍ତି।

ଅନ୍ୟପକ୍ଷରେ ରାଜ୍ୟସଭାରେ ବିରୋଧୀ ଦଳ ନେତା ମଲ୍ଲିକାର୍ଜୁନ ଖଡଗେ ବିରୋଧୀଙ୍କ ପ୍ରତ୍ୟାହାର ପୂର୍ବରୁ ‘ୟେ କୁର୍ସି ବଚନେ କେ ଲିଏ ୟେ ସବ ହୁଆ ହୈ’ ବୋଲି କହିଥିଲେ।

“ୟେ କୁର୍ସି ବଚନେ କେ ଲିଏ ୟେ ସବ ହୁଆ ହୈ । ଆମେ ଏହାକୁ ନିନ୍ଦା କରିବା ସହ ଏହାର ପ୍ରତିବାଦ କରିବୁ। ବିରୋଧୀ ମେଣ୍ଟ ଦଳମାନେ ପ୍ରତିବାଦ କରିବେ… ସନ୍ତୁଳନ ନ ରହିଲେ ବିକାଶ କେମିତି ହେବ ବୋଲି ଖଡ଼ଗେ ପ୍ରଶ୍ନ କରିଛନ୍ତି।