ଅନୁଗୋଳ: ଡାକ୍ତରଖାନାରେ ଭୟଙ୍କର ଅଗ୍ନିକାଣ୍ଡ । ବିଳମ୍ବିତ ରାତିରେ ସ୍ତ୍ରୀ ଓ ପ୍ରସୂତି ବିଭାଗରେ ଲାଗିଲା ନିଆଁ । ଜଳିଗଲା ବହୁ ମୂଲ୍ୟବାନ ଯନ୍ତ୍ରାଂଶ । ଏମିତି ଘଟଣା ଘଟିଛି ଅନୁଗୋଳ ଜିଲ୍ଲା ଛେଣ୍ଡିପଦା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରର ସ୍ତ୍ରୀ ଓ ପ୍ରସୂତି ବିଭାଗର ଲେବର ରୁମରେ ।
ସୂଚନା ଅନୁସାରେ, ରାତି ପ୍ରାୟ ୪ ଟା ବେଳେ ଏହି ଅଗ୍ନିକାଣ୍ଡ ହୋଇଥିଲା । ତେବେ ସୌଭାଗ୍ୟବଶତଃ ସେ ସମୟରେ ଲେବର ରୁମରେ କେହି ନ ଥିଲେ । ଫଳରେ କୌଣସି ଧନ ଜୀବନ ହାନି ହୋଇ ନାହିଁ । ନିଆଁଲାଗି ଲେବର ରୁମର ଏସି, ବିଛଣା ସମେତ ଅନ୍ୟାନ୍ୟ ଆସବାବପତ୍ର ପୋଡି ନଷ୍ଟ ହୋଇ ଯାଇଛି । ଗୁରୁତ୍ୱପୂର୍ଣ୍ଣ ଚିକିତ୍ସା ସରଞ୍ଜାମ ମଧ୍ୟ ନଷ୍ଟ ହୋଇ ଯାଇଥିବା ଦେଖିବାକୁ ମିଳିଛି ।
ବିଳମ୍ବିତ ରାତିରେ ଏପରି ଅଗ୍ନିକାଣ୍ଡ ଦେଖି ରୋଗୀ ଓ ଡାକ୍ତରଖାନା କର୍ମଚାରୀମାନେ ଭୟଭୀତ ହୋଇପଡିଥିଲେ । ଲେବର ରୁମ ନିକଟରେ ଅନ୍ୟ କୋଠରୀରେ ଥିବା ରୋଗୀ ମାନଙ୍କୁ ସେଠାରୁ ସ୍ଥାନାନ୍ତର କରାଯାଇଛି । ବିଳମ୍ବିତ ରାତିରେ ଖବର ପାଇ ଅଗ୍ନିଶମ ବିଭାଗ ଘଟଣା ସ୍ଥଳରେ ପହଞ୍ଚି ନିଆଁ କୁ ଆୟତ୍ତ କରିଥିଲା । ଅଗ୍ନିକାଣ୍ଡ କିପରି ଘଟିଲା ଜଣା ପଡିନାହିଁ । ତେବେ ସର୍ଟ ସର୍କିଟରୁ ଘଟିଥିବା ଅନୁମାନ କରାଯାଉଛି ।
Comments are closed.