ମହାକାଶ ଜଗତ ଅତ୍ୟନ୍ତ ରୋମାଞ୍ଚକର ଅଟେ । ଯେଉଁମାନେ ଏଥିପ୍ରତି ଆଗ୍ରହୀ, ସେମାନଙ୍କ ପାଇଁ ଏହା ଏକ ସ୍ୱପ୍ନ ପରି ଲାଗିଥାଏ । ଜ୍ୟୋତିଷ୍କ, ତାରା, ମାଧ୍ୟାକର୍ଷଣ ଏବଂ ମହାକାଶରେ ମହାକାଶଚାରୀଙ୍କ ଚାଲିବା ସେମାନଙ୍କୁ ଆକର୍ଷିତ କରିଥାଏ । ସେଠାରେ ଯାହା ଘଟେ, ଏହା ଇତିହାସର ପୃଷ୍ଠାରେ ରେକର୍ଡ ହୁଏ । କିନ୍ତୁ ବର୍ତ୍ତମାନ ଏକ ଅନନ୍ୟ ଇତିହାସ ସୃଷ୍ଟି ହେବାକୁ ଯାଉଛି । ପ୍ରଥମ ଥର ପାଇଁ ଏକ ମା ଏବଂ ଝିଅ ମହାକାଶକୁ ଯାଉଛନ୍ତି । ସେମାନେ ଆସନ୍ତା ମାସରେ ଯିବେ । ଏହାର ସମସ୍ତ ପ୍ରସ୍ତୁତି ପ୍ରାୟ ଶେଷ ହୋଇଛି ।
ଭର୍ଜିନ ଗାଲାକ୍ଟିକ୍ର ଦ୍ୱିତୀୟ ବାଣିଜ୍ୟିକ ବିମାନରେ ଏମାନେ ମହାକାଶକୁ ଯାତ୍ରା କରିବେ । ଭର୍ଜିନ୍ ଗାଲାକ୍ଟିକ୍ ବିମାନରେ ମହାକାଶକୁ ଯିବାକୁ ଥିବା ତିନି ଜଣଙ୍କ ମଧ୍ୟରେ ରହିଛନ୍ତି ୧୮ ବର୍ଷୀୟା ଆନାସ୍ତାସିଆ ମେୟର । ତାଙ୍କ ମାଆ କେଶିଆ ଶାଫ ମଧ୍ୟ ତାଙ୍କ ସହ ରହିବେ । ଏମାନଙ୍କୁ ଲକିଡ୍ର ଦ୍ୱାରା ଚୟନ କରାଯାଇଛି । ତାଙ୍କ ସହ ୮୦ ବର୍ଷୀୟ ପୂର୍ବତନ ବ୍ରିଟିଶ ଅଲିମ୍ପିଆନ୍ ଜନ୍ ଗୁଡୱିନ୍ ମଧ୍ୟ ରହିବେ । ଏହି ବିମାନ ଅଗଷ୍ଟ ୧୦ ତାରିଖରେ ଯାତ୍ରା କରିବ ।
ଏକତା ୨୨ ବିମାନ ୯୦ ମିନିଟର ଯାତ୍ରା ପରେ ମହାକାଶରେ ପ୍ରବେଶ କରିବ, ଯେଉଁଠାରେ ସମସ୍ତ ତିନି ଯାତ୍ରୀ ଶୂନ୍ୟ ମାଧ୍ୟାକର୍ଷଣ ଅନୁଭବ କରିବେ । ଏଠାରୁ ସେମାନେ ପୃଥିବୀକୁ ମଧ୍ୟ ଦେଖିପାରିବେ । ଏହି ବିମାନଟି ସ୍ପେସ୍ ଫର ହ୍ୟୁମାନିଟି ପାଇଁ ଅର୍ଥ ସଂଗ୍ରହ କରିବ, ଏକ ଅଣ-ଲାଭକାରୀ ଗୋଷ୍ଠୀ ଯାହା ସାଧାରଣ ନାଗରିକଙ୍କୁ ମହାକାଶକୁ ପଠାଇବାକୁ ଚେଷ୍ଟା କରୁଛି ।
ଆନାସ୍ତାସିଆ ମେୟର କହିଛନ୍ତି ଯେ, ମୋର ସ୍ୱପ୍ନ ହେଉଛି ଜ୍ୟୋତିର୍ବିଜ୍ଞାନୀ ହେବା । ମୁଁ ପୃଥିବୀ ବାହାରେ ଜୀବନର ସମ୍ଭାବନାକୁ ଅନୁସନ୍ଧାନ କରିବାକୁ ଚାହୁଁଛି । ଆମ ସମସ୍ତଙ୍କୁ ଆମ ଜୋନରୁ ବାହାରିବା ଆବଶ୍ୟକ । ନିଜ ଉପରେ ଆତ୍ମବିଶ୍ୱାସ ବଢାଇବା ସହ ନୂତନ ଜିନିଷଗୁଡିକୁ ଜାଣିବା ଆବଶ୍ୟକ । ସେହିପରି ଆନାସ୍ତାସିଆଙ୍କ ମାଆ ଶାଫ କହିଛନ୍ତି ଯେ, ଦିନେ ମୁଁ ଆଣ୍ଟିଗୁଆରୁ ଲଣ୍ଡନ ଯାଉଥିଲି, ଏହି ସମୟରେ ଉଡ଼ାଣରେ ଭର୍ଜିନ ବିମାନର ବିଜ୍ଞାପନ ଦେଖି ଡ୍ରରେ ଯୋଗ ଦେଇଥିଲି । ମୁଁ ଏକଥା ସମ୍ପୂର୍ଣ୍ଣ ଭୁଲି ଯାଇଥିଲି । କିନ୍ତୁ କିଛି ମାସ ପରେ ମୁଁ ଭର୍ଜିନ୍ ଗାଲାକ୍ଟିକ୍ ଠାରୁ ଏକ ଇମେଲ୍ ପାଇଲି । ଯେଉଁଥିରେ ମୁଁ ଜଣେ ଫାଇନାଲିଷ୍ଟ ବୋଲି ଉଲ୍ଲେଖ ଥିଲା । ପରେ ମୋତେ ପଚରାଯାଇଥିଲା ଯେ, ଯଦି ଆପଣ ଜିତନ୍ତି, ତେବେ ଆପଣ କାହାକୁ ମହାକାଶକୁ ନେବାକୁ ଚାହିଁବେ? ମୁଁ ମୋ ଝିଅ ନାଁ କହିଥିଲି । ଏହା ମୋ ଝିଅ ଏହାକୁ ସହଜରେ ବିଶ୍ୱାସ କରିପାରିଲା ନାହିଁ । ମୁଁ ତା ସହ ଥଟ୍ଟା କରୁଛି ବୋଲି କହିଲା ।
କିଛି ସପ୍ତାହ ପରେ ରିଚାର୍ଡ ବ୍ରାନସନ୍ ଆମ ଘରକୁ ଆସି ଘୋଷଣା କଲେ ଯେ ମୋତେ ଏଥିପାଇଁ ମନୋନୀତ କରାଯାଇଛି । ମୁଁ ଏହା ଶୁଣି ବହୁତ ଖୁସି ହେଲି । ଏହି ଯାତ୍ରାକୁ ନେଇ ଆମେ ମାଆ ଝିଅ ବହୁତ ଉତ୍ସାହିତ ଅଛୁ । ମୁଁ ଅନେକ ଜିନିଷକୁ ଭୟ କରେ, ଏହା ପ୍ରକୃତରେ ଭୟ ଦୂର କରିବାର ଏକ ସୁଯୋଗ ହେବ । ୪୬ ବର୍ଷିୟ ଶାଫ୍ ଆହୁରି କହିଛନ୍ତି, ମୁଁ ପିଲାଦିନେ ମହାକାଶ ଯାତ୍ରା କରିବା ଓ ଜଣେ ମହାକାଶଚାରୀ ହେବାକୁ ସ୍ୱପ୍ନ ଦେଖିଥିଲି । କିନ୍ତୁ ସୁଯୋଗ ପାଇ ନ ଥିଲି । ଯାହା ଏବେ ପୂରଣ ହେବାକୁ ଯାଉଛି ।
