ନୂଆଦିଲ୍ଲୀ: ୨୦୨୭ ଦିନିକିଆ ବିଶ୍ୱକପ୍ ପ୍ରସ୍ତୁତିକୁ ନେଇ ଭାରତୀୟ କ୍ରିକେଟ ଦଳର ପୂର୍ବତନ ଅଧିନାୟକ କିମ୍ବଦନ୍ତୀ ବ୍ୟାଟର ସୁନୀଲ ଗାଭାସ୍କର ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡକୁ ଏକ ରୋଚକ ପରାମର୍ଶ ଦେଇଛନ୍ତି । ଗାଭାସ୍କରଙ୍କ ମତରେ, ବିସିସିଆଇ ଘରୋଇ ମ୍ୟାଚ୍ଗୁଡ଼ିକରେ ବାଉଣ୍ଡ୍ରିର ଆକାର ବୃଦ୍ଧି କରିବା ଉଚିତ । ୨୦୨୭ ବିଶ୍ୱକପ୍ ଦକ୍ଷିଣ ଆଫ୍ରିକା, ଜିମ୍ବାବ୍ୱେ ଏବଂ ନାମ୍ବିଆରେ ଖେଳାଯିବ, ଯେଉଁଠାରେ ଷ୍ଟାଡିୟମ୍ଗୁଡ଼ିକର ବାଉଣ୍ଡ୍ରି ବେଶ୍ ବଡ଼ । ସେଥିପାଇଁ ସେଠାରେ ରନ୍ ସଂଗ୍ରହ କରିବାର ରଣନୀତି ଶିଖିବାକୁ ହେଲେ ଭାରତରେ ମଧ୍ୟ ବାଉଣ୍ଡ୍ରି ସାଇଜ୍ ବଢ଼ାଇବା ଜରୁରୀ । ଗାଭାସ୍କରଙ୍କ ଅନୁସାରେ, ଏହି ପଦକ୍ଷେପ ଅଷ୍ଟ୍ରେଲିଆରେ ହେବାକୁ ଥିବା ଟି୨୦ ବିଶ୍ୱକପ୍ରେ ମଧ୍ୟ ଦଳକୁ ବହୁତ ସାହାଯ୍ୟ କରିବ । ବାଉଣ୍ଡ୍ରି ବଡ଼ ହେଲେ ଖେଳାଳିମାନେ ବଡ଼ ଶଟ୍ସ ଖେଳିବା ପୂର୍ବରୁ ଦୁଇଥର ଭାବିବେ ଏବଂ ସେମାନଙ୍କର ଲମ୍ବା ଛକା ମାରିବାର ଅଭ୍ୟାସ ମଧ୍ୟ ହୋଇପାରିବ ।
ନିକଟରେ ଜିମ୍ବାବ୍ୱେ ଗସ୍ତରେ ଯାଇଥିବା ଟିମ୍ ଇଣ୍ଡିଆ ତିନୋଟି ଟି୨୦ ମ୍ୟାଚ୍ରେ ବେଶୀ ଛକା ମାରିପାରି ନଥିଲା । ସବୁଠାରୁ ଅଧିକ ୯ଟି ଛକା ବୈଭବ ସୂର୍ୟ୍ୟବଂଶୀଙ୍କ ବ୍ୟାଟ୍ରୁ ବାହାରିଥିଲା, ଯାହା ତାଙ୍କ ପ୍ରତିଭା ତୁଳନାରେ କମ୍ ଥିଲା । ଏବେ ପ୍ରଶ୍ନ ଉଠୁଛି, ବିସିସିଆଇ ସୁନୀଲ ଗାଭାସ୍କରଙ୍କ ଏହି ପରାମର୍ଶକୁ ଗ୍ରହଣ କରିବ କି ନାହିଁ ? ଗାଭାସ୍କର ଭାରତୀୟ ଦିନିକିଆ ଦଳର ବ୍ୟାଟରମାନଙ୍କୁ ପରାମର୍ଶ ଦେଇ କହିଛନ୍ତି ଯେ, ୫୦ ଓଭର ଫର୍ମାଟ୍ରେ ସଫଳତା ପାଇବା ପାଇଁ ଏକ ଅଲଗା ମାନସିକତାର ଆବଶ୍ୟକତା ରହିଛି । ବିଶ୍ୱର କୌଣସି ଦଳରେ ସବୁ ୫ ଜଣ ବୋଲର ଟପ୍-କ୍ଲାସ୍ ନଥାନ୍ତି । ସବୁବେଳେ ୧୦-୧୨ ଓଭର ଏପରି ମିଳିଥାଏ, ଯେଉଁଥିରେ ଦ୍ରୁତ ଗତିରେ ରନ୍ ସଂଗ୍ରହ କରାଯାଇପାରିବ ।