ଚର୍ଚ୍ଚାରେ ମରିସସ୍ ପ୍ରଧାନମନ୍ତ୍ରୀଙ୍କ ପତ୍ନୀଙ୍କୁ ମିଳିଥିବା ଉପହାର ବାକ୍ସ, ଜାଣନ୍ତୁ ବାକ୍ସରେ କ’ଣ ରଖିଛନ୍ତି ମୋଦୀ,,

ନୂଆଦିଲ୍ଲୀ: ମରିସସ୍‌ ପ୍ରଧାନମନ୍ତ୍ରୀଙ୍କ ପତ୍ନୀଙ୍କୁ ପ୍ରଧାନମନ୍ତ୍ରୀ ମୋଦୀ ଶାଗୁଆନ କାଠର ବାକ୍ସରେ ଏକ ସୁନ୍ଦର ଉପହାର ଭେଟି ଦେଇଛନ୍ତି । ଜି-୨୦ ସମ୍ମିଳନୀକୁ ଆସିଥିବା ମରିସସ୍‌ ପ୍ରଧାନମନ୍ତ୍ରୀ ପ୍ରବୀନ୍ଦ ଜଗନ୍ନାଥଙ୍କ ପତ୍ନୀ କବିତା ଜଗନ୍ନାଥଙ୍କୁ ଗୁଜରାଟ କାରିଗରମାନଙ୍କ ଦ୍ୱାରା ପ୍ରସ୍ତୁତ ଏକ ଶାଗୁଆନ କାଠ ବାକ୍ସ ମଧ୍ୟରେ ଓଡ଼ିଶାର ଶିଳ୍ପୀଙ୍କ ଦ୍ୱାରା ପ୍ରସ୍ତୁତ ପାରମ୍ପରିକ ଇକ୍କତ ଓଢ଼ଣୀ ଉପହାର ସ୍ୱରୂପ ଦେଇଛନ୍ତି ।

ପ୍ରଧାନମନ୍ତ୍ରୀ ଭାରତ ସୌନ୍ଦର୍ଯ୍ୟ, କାରିଗରୀ ଏବଂ ସାଂସ୍କୃତିକ ଐତିହ୍ୟକୁ ଏହି ଉପହାର ମାଧ୍ୟମରେ ପରିପ୍ରକାଶ କରିଛନ୍ତି । ତେବେ ଦେଶ ବିଦେଶରେ ଭାରତୀୟ ପାରମ୍ପରିକ ପୋଷାକର ବେଶ ଚାହିଦା ଥିବା ବେଳେ ବିଦେଶୀ ବନ୍ଧୁଙ୍କୁ ଏହି ଉପହାର ଦେଇଛନ୍ତି ପ୍ରଧାନମନ୍ତ୍ରୀ । ଶାଗୁଆନ କାଠ ବାକ୍ସରେ ଏହି ପାରମ୍ପରିକ ଶାଢୀକୁ ପ୍ୟାକ୍‌ କରି ମୋଦି ମରିସସ୍‌ ପ୍ରଧାନମନ୍ତ୍ରୀଙ୍କ ପତ୍ନୀଙ୍କୁ ଭେଟି ଦେଇଥିଲେ ।

ଓଡ଼ିଶାର ଉଚ୍ଚକୋଟ୍ଟୀର ଶିଳ୍ପୀଙ୍କ ଦ୍ୱାରା ଏହି ଇକ୍କତ ଓଢ଼ଣୀ ପ୍ରସ୍ତୁତ କରାଯାଇଛି । ଏହା ହେଉଛି ଏକ ପାରମ୍ପରିକ ତୁତ ରେଷମ ବା ମଲବେରୀ ସିଲ୍କ ଓଢ଼ଣୀ ଯାହାକି ଉତ୍କୃଷ୍ଟ ଇକ୍କତ ପଦ୍ଧତି ଉପଯୋଗ କରି ବୁଣାଯାଇଛି । ଇକ୍କତ ହେଉଛି ରେଶମ କିମ୍ବା ସୂତାରେ କରାଯାଉଥିବା ଏକ ସୂକ୍ଷ୍ମ ରଙ୍ଗ ପ୍ରକ୍ରିୟା । ଏଥିରେ ସୂତାର ନିର୍ଦ୍ଦିଷ୍ଟ ଭାଗକୁ ବାନ୍ଧିବା ସହ ରଙ୍ଗ କରାଯାଇଥାଏ ଯେଉଁଥିରେ ବନ୍ଧା ହୋଇଥିବା ଭାଗକୁ ସ୍ପର୍ଶ ନକରି ବିଭିନ୍ନ ରଙ୍ଗର ଆକୃତି ଅଙ୍କା ଯାଇଥାଏ।

ଏହି ସୂତାଗୁଡ଼ିକ ପରସ୍ପର ସହ ମିଶିବା ଫଳରେ ଏକ ଉଜ୍ଜ୍ୱଳ କପଡ଼ା ତିଆରି କରନ୍ତି ଯାହାର ଗାଢ଼ ପୃଷ୍ଠଭୂମି ଉପରେ ଇଷତ୍‌ ଧଳା ଆକୃତି ସବୁ ସୃଷ୍ଟି ହୋଇଥାଏ। ଇକ୍କତ କାରିଗରୀରେ ସୂକ୍ଷ୍ମତା ଉପରେ ବିଶେଷ ଗୁରୁତ୍ୱ ଦିଆଯାଇଥାଏ।  ଦ୍ୱାଦଶ ଶତାବ୍ଦୀରେ ଓଡ଼ିଶାକୁ ସ୍ଥାନାନ୍ତରିତ ହୋଇଥିବା ଶିଳ୍ପୀଙ୍କ ଠାରୁ ଉତ୍ପତ୍ତି ହୋଇଥିବା ଇକ୍କତ କଳା ଓଡ଼ିଶା ମାଟିରେ ଅଧିକ ବିକଶିତ ଓ ସମୃଦ୍ଧ ହୋଇଛି। ଅନ୍ୟପଟେ ଇକ୍କତ ଓଢ଼ଣୀକୁ ଯେଉଁ ବାକ୍ସରେ ଦିଆଯାଇଛି ତାହାକୁ ଗୁଜରାଟର କାରିଗରମାନେ କଠିନ ଓ ଦୀର୍ଘସ୍ଥାୟୀ ଶାଗୁଆନ କାଠରେ ସୁନ୍ଦର କାରୁକାର୍ଯ୍ୟ କରି ତିଆରି କରିଛନ୍ତି।