ବିଶ୍ୱବ୍ୟାପୀ ବଢ଼ୁଛି ତମ୍ବା ଚୋରି: ଭାରତ ସମେତ ସାରା ବିଶ୍ୱ ପାଇଁ କାହିଁକି ସାଜିଛି ନୂଆ ସଙ୍କଟ?
ନୂଆଦିଲ୍ଲୀ: ବିଗତ କିଛି ବର୍ଷ ମଧ୍ୟରେ ସାରା ବିଶ୍ୱରେ ଏକ ନୂତନ ଏବଂ ଅଦ୍ଭୁତ ସଙ୍କଟ ମୁଣ୍ଡ ଟେକିଛି, ତାହା ହେଉଛି ‘ତମ୍ବା ଚୋରି’। ଆନ୍ତର୍ଜାତିକ ବଜାରରେ ତମ୍ବାର ଦର ରେକର୍ଡ ସ୍ତରରେ ପହଞ୍ଚିଥିବା ବେଳେ ଅପରାଧୀମାନଙ୍କ ପାଇଁ ଏହା ଏବେ ସୁନା ପାଲଟିଯାଇଛି। ଭାରତ ହେଉ ବା ଆମେରିକା, ବ୍ରିଟେନ୍ ଅବା ଦକ୍ଷିଣ ଆଫ୍ରିକା, ସବୁଠି ଚୋରମାନେ ରେଳ ଲାଇନ୍, ଟେଲିଫୋନ୍ କେବୁଲ୍, ବିଦ୍ୟୁତ୍ ଟ୍ରାନ୍ସଫର୍ମର ଏବଂ ସୋଲାର୍ ପ୍ୟାନେଲରୁ ତମ୍ବା ତାର ଚୋରି କରୁଛନ୍ତି। ଏହାଦ୍ୱାରା ନା କେବଳ ଭିତ୍ତିଭୂମି ନଷ୍ଟ ହେଉଛି, ବରଂ ଅର୍ଥବ୍ୟବସ୍ଥାକୁ କୋଟି କୋଟି ଟଙ୍କାର କ୍ଷତି ସହିବାକୁ ପଡ଼ୁଛି।
ବଢ଼ୁଥିବା ଚାହିଦା ଏବଂ ଆକାଶଛୁଆଁ ଦର
ବିଶ୍ୱବ୍ୟାପୀ ନବୀକରଣଯୋଗ୍ୟ ଶକ୍ତି , ଇଲେକ୍ଟ୍ରିକ୍ ଗାଡ଼ି ଏବଂ ଆର୍ଟିଫିସିଆଲ୍ ଇଣ୍ଟେଲିଜେନ୍ସ ଡାଟା ସେଣ୍ଟରଗୁଡ଼ିକର ବିକାଶ ଯୋଗୁଁ ତମ୍ବାର ବ୍ୟବହାର ବହୁଗୁଣିତ ହୋଇଛି। ଗୋଟିଏ ଇଲେକ୍ଟ୍ରିକ୍ ଗାଡ଼ିରେ ସାଧାରଣ ଗାଡ଼ି ତୁଳନାରେ ଦୁଇଗୁଣରୁ ଅଧିକ ତମ୍ବା ଲାଗୁଛି। ସେହିପରି ଏଆଇ ଏବଂ ବଡ଼ ବଡ଼ ସର୍ଭରଗୁଡ଼ିକରେ ବିଦ୍ୟୁତ୍ ଚାହିଦା ମେଣ୍ଟାଇବାକୁ ବ୍ୟାପକ ତମ୍ବା ତାରର ଆବଶ୍ୟକତା ପଡ଼ୁଛି। ଚାହିଦା ତୁଳନାରେ ଖଣିଜ ଉତ୍ପାଦନ କମ୍ ଥିବାରୁ ଏବେ ଏହାର ଦର ଆକାଶଛୁଆଁ ହୋଇଛି, ଯାହା ଚୋରମାନଙ୍କୁ ଆକୃଷ୍ଟ କରୁଛି।
ଦ୍ରୁତ ଶିଳ୍ପାୟନ କାରଣରୁ ଭାରତ ଏବଂ ଚୀନ୍ ଭଳି ବିକାଶଶୀଳ ଦେଶରେ ସ୍କ୍ରାପ୍ ମେଟାଲ୍ ବା କବାଡ଼ି ଧାତୁର ଚାହିଦା ସର୍ବାଧିକ ରହିଛି। ବିଶ୍ୱର ବିଭିନ୍ନ ପ୍ରାନ୍ତରୁ ଚୋରି ହେଉଥିବା ତମ୍ବାକୁ ସଙ୍ଗଠିତ ଗ୍ୟାଙ୍ଗମାନେ ସ୍କ୍ରାପ୍ ବଜାରରେ ବିକ୍ରି କରିଦେଉଛନ୍ତି। ଏହା ପରେ ସେଗୁଡ଼ିକୁ ତରଳା ଯାଇ ପୁନର୍ବାର ନୂଆ ଯୋଗାଣ ଶୃଙ୍ଖଳାରେ ବିକ୍ରି କରାଯାଉଛି। ତେଣୁ ଏହି ଚୋରି ଏବେ ଆଉ ସାଧାରଣ ଅପରାଧ ହୋଇ ରହିନାହିଁ, ବରଂ ଏକ ଆନ୍ତର୍ଜାତୀୟ କ୍ରାଇମ୍ ସିଣ୍ଡିକେଟ୍ର ରୂପ ନେଲାଣି।
ଭିତ୍ତିଭୂମି ଓ ସାଧାରଣ ଜନତାଙ୍କ ଉପରେ ଗମ୍ଭୀର ପ୍ରଭାବ
ଭାରତୀୟ ରେଳବାଇରେ ପ୍ରତିବର୍ଷ ତମ୍ବା ଚୋରି ଯୋଗୁଁ କୋଟି କୋଟି ଟଙ୍କାର କ୍ଷତି ଘଟୁଛି ଏବଂ ଟ୍ରେନ୍ ଚଳାଚଳ ଘଣ୍ଟା ଘଣ୍ଟା ଧରି ବାଧାପ୍ରାପ୍ତ ହେଉଛି। ସେହିପରି ଟେଲିକମ୍ କମ୍ପାନୀର ମୋବାଇଲ୍ ଟାୱାର ଓ ବିଦ୍ୟୁତ୍ ସବ୍ଷ୍ଟେସନ୍ଗୁଡ଼ିକରୁ କେବୁଲ୍ ଚୋରି କାରଣରୁ ଲୋକଙ୍କୁ ଇଣ୍ଟରନେଟ୍ ସମସ୍ୟା ଓ ବିଦ୍ୟୁତ୍ କାଟ୍ର ସମ୍ମୁଖୀନ ହେବାକୁ ପଡ଼ୁଛି। ଏହାର ସବୁଠୁ ବଡ଼ ଚିନ୍ତାର ବିଷୟ ହେଲା, ଅନେକ ସମୟରେ ଚୋରି ହୋଇଥିବା ତମ୍ବାର ମୂଲ୍ୟ ଯେତିକି ଥାଏ, ତା’ଠାରୁ ଯଥେଷ୍ଟ ଅଧିକ ଅର୍ଥ ଭାଙ୍ଗିଯାଇଥିବା ଭିତ୍ତିଭୂମି ସଜାଡ଼ିବାରେ ଖର୍ଚ୍ଚ ହୋଇଥାଏ।
କିଭଳି ରୋକାଯାଇପାରିବ ଏହି ବିଶ୍ୱସ୍ତରୀୟ ସଙ୍କଟ?
ସରକାର ଓ ପ୍ରଶାସନ ପାଇଁ ଏହାକୁ ରୋକିବା ଏକ ବଡ଼ ଚ୍ୟାଲେଞ୍ଜ ପାଲଟିଛି। ବିଶେଷଜ୍ଞଙ୍କ ମତରେ, ତମ୍ବା ଚୋରିକୁ ନିୟନ୍ତ୍ରଣ କରିବା ପାଇଁ ସ୍କ୍ରାପ୍ ମେଟାଲ୍ ବ୍ୟବସାୟରେ କଡ଼ା ନିୟମ ଆଣିବାର ଆବଶ୍ୟକତା ରହିଛି। ସ୍କ୍ରାପ୍ କିଣୁଥିବା ବ୍ୟବସାୟୀଙ୍କ ପାଇଁ ପରିଚୟ ପତ୍ର ଏବଂ ଲାଇସେନ୍ସ ବାଧ୍ୟତାମୂଳକ କରିବା ସହ ନଗଦ କାରବାର ଉପରେ କଟକଣା ଲଗାଇଲେ ଚୋରଙ୍କ ରାକେଟ୍ ଭାଙ୍ଗିପାରିବ।
