କ’ଣ ସତରେ ରୁଷରୁ ତେଲ କିଣିବେନି ଭାରତୀୟ କମ୍ପାନୀ?, ଟ୍ରମ୍ପଙ୍କ ବୟାନ ପରେ ଆସିଲା ଭାରତର ପ୍ରତିକ୍ରିୟା….

ନୂଆଦିଲ୍ଲୀ: ବର୍ତ୍ତମାନ ଆମେରିକା ସହ ଶୁଳ୍କ ଟେନସନ ମଧ୍ୟରେ ଗତକାଲି ଏକ ରିପୋର୍ଟ ପ୍ରକାଶ ପାଇଛି, ଯେଉଁଥିରେ କୁହାଯାଇଛି ଯେ ଭାରତର ଅନେକ ସରକାରୀ ତୈଳ ରିଫାଇନାରୀ ରୁଷରୁ ଅଶୋଧିତ ତେଲ କିଣିବା ବନ୍ଦ କରିଦେଇଛନ୍ତି। ଭାରତର କିଛି ସରକାରୀ କମ୍ପାନୀଗୁଡ଼ିକ ଗତ ସପ୍ତାହରୁ ଅଶୋଧିତ ତେଲ ଆମଦାନୀ କରିନାହାଁନ୍ତି । ଟ୍ରମ୍ପଙ୍କ ଏହି ରିପୋର୍ଟରେ ନିଜର ମତ ପ୍ରକାଶ କରି, ଏହାକୁ ସ୍ବାଗତ କରିଛନ୍ତି । ତଥାପି, ଏନେଇ ସରକାରୀ ସ୍ତରରେ କିଛି ସ୍ପଷ୍ଟତା ନଥିଲା ।

ହେଲେ ଏବେ ସୂତ୍ରଗୁଡ଼ିକୁ ଉଦ୍ଧୃତ କରି ଏକ ସରକାରୀ ବିବୃତ୍ତି ପ୍ରକାଶ ପାଇଛି, ଯେଉଁଥିରେ ରୁଷୀୟ ତୈଳ ବନ୍ଦ କରିବାର ରିପୋର୍ଟକୁ ଭୁଲ ବୋଲି କୁହାଯାଇଛି । ସୂଚନା ଅନୁଯାୟୀ, ଦେଶର ଶକ୍ତି କ୍ରୟ ବଜାର ଶକ୍ତି ଏବଂ ଜାତୀୟ ସ୍ୱାର୍ଥ ଉପରେ ଆଧାରିତ ଏବଂ ଭାରତୀୟ ତୈଳ କମ୍ପାନୀଗୁଡ଼ିକ ରୁଷୀୟ ଆମଦାନୀ ବନ୍ଦ କରିବାର କୌଣସି ରିପୋର୍ଟ ସେମାନଙ୍କ ପାଖରେ ନାହିଁ। ଅପରପକ୍ଷେ ଏଏନଆଇ ରିପୋର୍ଟ କହିଛି, ଭାରତୀୟ ତୈଳ ବିଶୋଧନାଗାରଗୁଡ଼ିକ ରୁଷୀୟ ଯୋଗାଣକାରୀଙ୍କଠାରୁ ତେଲ ଗ୍ରହଣ କରିଆସୁଛନ୍ତି। ସେମାନଙ୍କର ଯୋଗାଣ ନିଷ୍ପତ୍ତି ମୂଲ୍ୟ, ଅଶୋଧିତ ତୈଳର ଗୁଣବତ୍ତା, ସଂରକ୍ଷଣ, ଲଜିଷ୍ଟିକ୍ସ ଏବଂ ଅନ୍ୟାନ୍ୟ ଆର୍ଥିକ କାରଣ ଉପରେ ଆଧାରିତ।

ତେବେ କହିରଖୁଛୁ, ଗତକାଲିର ରିପୋର୍ଟରେ କୁହାଯାଇଛି ଯେ ଇଣ୍ଡିଆନ୍ ଅଏଲ୍ କର୍ପୋରେସନ୍, ହିନ୍ଦୁସ୍ତାନ ପେଟ୍ରୋଲିୟମ୍ କର୍ପୋରେସନ୍, ଭାରତ ପେଟ୍ରୋଲିୟମ୍ କର୍ପୋରେସନ୍ ଏବଂ ମାଙ୍ଗାଲୋର୍ ରିଫାଇନାରୀ ପେଟ୍ରୋକେମିକାଲ୍ ଭଳି ରିଫାଇନାରୀ କମ୍ପାନୀଗୁଡ଼ିକ ଅସ୍ଥାୟୀ ଭାବରେ ରୁଷ ତେଲ କିଣିବା ବନ୍ଦ କରିଦେଇଛନ୍ତି। ବର୍ତ୍ତମାନ ଏହି କମ୍ପାନୀଗୁଡ଼ିକ ତେଲ କିଣିବା ପାଇଁ ମଧ୍ୟପ୍ରାଚ୍ୟ ଏବଂ ଆଫ୍ରିକା ଆଡକୁ ମୁହାଁଇଛନ୍ତି । କିନ୍ତୁ ଏହା ଭୁଲ୍ ଖବର ବୋଲି ଭାରତ ସରକାର ସ୍ପଷ୍ଟ କରିଥିବା ଇଣ୍ଡିଆ ଟୁଡେ ରିପୋର୍ଟରେ ପ୍ରକାଶ ପାଇଛି ।

ଯାହାକୁ ନେଇ ବି ରୁଷ ତେଲ ବନ୍ଦ କରିବା ରିପୋର୍ଟକୁ ସ୍ୱାଗତ କରିବା ସମୟରେ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି ଯେ ଭାରତ ହୁଏତ ରୁଷରୁ ଅଶୋଧିତ ତେଲ କିଣିବା ବନ୍ଦ କରିପାରେ। ସେ ଏହି ସମ୍ଭାବନାକୁ ଏକ ଭଲ ପଦକ୍ଷେପ ବୋଲି କହିଥିଲେ ।  ଯେତେବେଳେ ଟ୍ରମ୍ପଙ୍କୁ ପଚରାଗଲା ଯେ ସେ ଭାରତ ଉପରେ ଜରିମାନା ଲଗାଇବା କିମ୍ବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ କଥା ହେବା ପାଇଁ କୌଣସି ଯୋଜନା କରିଛନ୍ତି କି, ଟ୍ରମ୍ପ ଉତ୍ତର ଦେଇଥିଲେ ଯେ ମୁଁ ଶୁଣିଛି ଯେ ଭାରତ ଆଉ ରୁଷରୁ ତେଲ କିଣିବ ନାହିଁ। ମୁଁ ଏହା ଶୁଣିଛି, କିନ୍ତୁ ମୁଁ ଜାଣିନାହିଁ ଯେ ଏହା ସତ୍ୟ କି ମିଛ। ଯଦି ଏହା ସତ, ତେବେ ଏହା ଏକ ଭଲ ପଦକ୍ଷେପ ।

ସୂଚନାଯୋଗ୍ୟ, ବୁଧବାର ରାତିରେ ହଠାତ୍ ଏକ ବଡ଼ ଘୋଷଣା କରି, ଆମେରିକା ଭାରତ ଉପରେ ୨୫ ପ୍ରତିଶତ ଶୁଳ୍କ ଲଗାଇବା ବିଷୟରେ କଥା ହୋଇଥିଲା, ଯାହା ଅଗଷ୍ଟ ୧ରୁ କାର୍ଯ୍ୟକାରୀ ହେବାର ଥିଲା, କିନ୍ତୁ ଗତକାଲି ଏହାକୁ ଅଗଷ୍ଟ ୭ କୁ ସ୍ଥଗିତ ରଖାଯାଇଛି । ସେହି ସମୟରେ, ଆମେରିକା ରୁଷରୁ ତେଲ କିଣିବା ଏବଂ ପ୍ରତିରକ୍ଷା ଆମଦାନୀ ପାଇଁ ମଧ୍ୟ ଜରିମାନା ଘୋଷଣା କରିଛି । ଜରିମାନା ଲଗାଇବା ପଛରେ ଟ୍ରମ୍ପଙ୍କ ଯୁକ୍ତି ଥିଲା ଯେ ଭାରତ ରୁଷରୁ ତେଲ ଏବଂ ପ୍ରତିରକ୍ଷା ଆମଦାନୀ କରିବା ଉଚିତ୍ ନୁହେଁ, ଯାହା ଦ୍ୱାରା ଏହାର ଅର୍ଥନୀତିକୁ ସାହାଯ୍ୟ ନମିଳେ । ରୁଷ ଉପରେ ଚାପ ପକାଇ ୟୁକ୍ରେନ ସହିତ ଯୁଦ୍ଧ ସମାପ୍ତ କରାଯାଇପାରିବ ।