Chandigarh blast:ବିଜେପି କାର୍ଯ୍ୟାଳୟ ବାହାରେ ଗ୍ରେନେଡ୍ ଆକ୍ରମଣ; କେନ୍ଦ୍ରୀୟ ଏଜେନ୍ସିର ତଦନ୍ତ ଆରମ୍ଭ
ନୂଆଦିଲ୍ଲୀ: ବୁଧବାର ସନ୍ଧ୍ୟା ପ୍ରାୟ ୫ଟାରେ ଚଣ୍ଡିଗଡ଼ରେ ବିଜେପିର ପଞ୍ଜାବ କାର୍ଯ୍ୟାଳୟ ବାହାରେ ଘଟିଥିବା ଶକ୍ତିଶାଳୀ ବିସ୍ଫୋରଣ ସୁରକ୍ଷା ବ୍ୟବସ୍ଥା ଉପରେ ଗମ୍ଭୀର ପ୍ରଶ୍ନ ଉଠାଇଛି।
ପ୍ରାରମ୍ଭିକ ତଦନ୍ତରୁ ଆକ୍ରମଣରେ ଗ୍ରେନେଡ୍ ଭଳି ବିସ୍ଫୋରକ ସାମଗ୍ରୀ ବ୍ୟବହାର ହୋଇଥିବା ଜଣାପଡିଛି। ଘଟଣା ପରେ ତୁରନ୍ତ ଜାତୀୟ ତଦନ୍ତ ସଂସ୍ଥା (NIA), ଭାରତୀୟ ସେନା ଏବଂ ପଞ୍ଜାବ ପୋଲିସର ଆଣ୍ଟି-ଗ୍ୟାଙ୍ଗଷ୍ଟର ଟାସ୍କ ଫୋର୍ସ (AGTF) ସମେତ ଅନେକ କେନ୍ଦ୍ରୀୟ ଏବଂ ରାଜ୍ୟ ଏଜେନ୍ସି ତଦନ୍ତରେ ସାମିଲ ହୋଇଛନ୍ତି।
ବିସ୍ଫୋରଣ ଏତେ ଶକ୍ତିଶାଳୀ ଥିଲା ଯେ କାର୍ଯ୍ୟାଳୟ ବାହାରେ ପାର୍କିଂ ସ୍ଥାନରେ ରଖାଯାଇଥିବା ଅନେକ ଗାଡ଼ିର ଝରକା ଭାଙ୍ଗି ଯାଇଥିଲା । ବିଜେପି କାର୍ଯ୍ୟାଳୟରେ ହାତ ଗ୍ରେନେଡ୍ ଫିଙ୍ଗିବାର ଏକ ଭିଡିଓ ମଧ୍ୟ ସାମ୍ନାକୁ ଆସିଛି, ଯେଉଁଥିରେ ଦୁଇଜଣ ବ୍ୟକ୍ତି ବୋମା ଫିଙ୍ଗୁଥିବାର ଦେଖାଯାଉଛି।
ଚଣ୍ଡିଗଡ଼ ପୋଲିସ ଆଖପାଖ ଅଞ୍ଚଳର ସିସିଟିଭି ଫୁଟେଜ୍ ସ୍କାନିଂ ଆରମ୍ଭ କରିଛି। ସେମାନଙ୍କୁ ଠାବ କରିବା ପାଇଁ ଏକ ତଲାସୀ ଅଭିଯାନକୁ ଜୋରଦାର କରାଯାଇଛି।
ଏହି ମାମଲାର ପ୍ରତ୍ୟେକ ଦୃଷ୍ଟିକୋଣରୁ ତଦନ୍ତ କରାଯାଉଛି ଏବଂ NIA ସମେତ ଅନ୍ୟାନ୍ୟ ଏଜେନ୍ସିଗୁଡ଼ିକ ତଦନ୍ତରେ ଯୋଗ ଦେଇଛନ୍ତି। ଏହି ଆକ୍ରମଣ ସହରର ଏକ ଅତ୍ୟନ୍ତ ସମ୍ବେଦନଶୀଳ ଏବଂ ପ୍ରମୁଖ ସ୍ଥାନରେ ଘଟିଥିଲା, ଯେଉଁଠାରେ ଅନେକ ଗୁରୁତ୍ୱପୂର୍ଣ୍ଣ ପ୍ରତିଷ୍ଠାନ ଏବଂ ଜନଗହଳିପୂର୍ଣ୍ଣ ସ୍ଥାନ ଅବସ୍ଥିତ।