ଗାନ୍ଧିନଗର: ଗୁଜୁରାଟରେ ଘଟିଛି ମର୍ମନ୍ତୁଦ ସଡ଼କ ଦୁର୍ଘଟଣା। ପରୀକ୍ଷା ଦେବାକୁ ଯାଉଥିବା ସମୟରେ ଚାଲିଯାଇଛି ୭ ପରିକ୍ଷାର୍ଥୀଙ୍କ ଜୀବନ। ଦୁଇ କାର ମଧ୍ୟରେ ମୁହାଁ ମୁହିଁ ଧକ୍କା ହେବାରୁ ଏକା ସଙ୍ଗେ ୫ ଛାତ୍ରଙ୍କ ସମେତ ଅନ୍ୟ ଗାଡିରେ ଥିବା ୨ ଜଣଙ୍କ ଜୀବନ ଯାଇଛି। ଏଭଳି ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି ଗୁଜୁରାଟର ଜୋତପୁର-ବେରାଓ୍ୱଲ ହାଇଓ୍ୱେର ଭଣ୍ଡୁରୀ ଗାଁ ନିକଟରେ।
ସୂଚନା ମୁତାବକ, ସୋମବାର ସକାଳ ପ୍ରାୟ ୮ଟାରେ ଜୋତପୁର-ବେରାଓ୍ୱଲ ହାଇଓ୍ୱେର ଭଣ୍ଡୁରୀ ଗାଁ ନିକଟରେ ଦ୍ରୁତ ଗତିରେ ଆସୁଥିବା ଦୁଇ କାର୍ ମଧ୍ୟରେ ମୁହାଁମୁହିଁ ଧକ୍କା ହୋଇଛି। ଫଳରେ ୫ ଜଣ କଲେଜ ଛାତ୍ରଙ୍କୁ ପରୀକ୍ଷା ଦେବାକୁ ନେଇ ଯାଉଥିବା ଗୋଟିଏ କାର୍ ନିୟନ୍ତ୍ରଣ ହରାଇ ଏହା ଡିଭାଇଡର୍ରେ ଧକ୍କା ଦେଇଥିଲା। ପରେ ଏହି କାର ଅପରପାର୍ଶ୍ୱରେ ଆସୁଥିବା ଆଉ ଏକ କାର୍ ସହ ମୁହାଁମୁହିଁ ଧକ୍କା ହୋଇଥିଲା।
ଏହି ଦୁର୍ଘଟଣା ଏତେ ଭୟଙ୍କର ଥିଲା ଯେ, ଉଭୟ କାର୍ ସମ୍ପୂର୍ଣ୍ଣ ଭାବରେ ନଷ୍ଟ ହୋଇଯାଇଛି। ଘଟଣାସ୍ଥଳରେ ପରୀକ୍ଷା ଦେବାକୁ ଯାଉଥିବା ୫ କଲେଜ ଛାତ୍ରଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ଏକ କାର୍ରେ ଥିବା ଦୁଇ ଜଣ ବ୍ୟକ୍ତି ପ୍ରାଣ ହରାଇଛନ୍ତି।
ଅନ୍ୟପକ୍ଷରେ ଦୁଇ କାର୍ ମଧ୍ୟରେ ଧକ୍କା ହେବା ଫଳରେ ଗ୍ୟାସ୍ ଟାଙ୍କି ଫାଟି ଯାଇବିସ୍ଫୋରଣ କାରଣରୁ ପାଖରେ ଥିବା ଏକ କୁଡିଆରେ ନିଆଁ ଲାଗି ଯାଇଥିଲା। ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି। ସେହିପରି ଅଗ୍ନିଶମ ବାହିନୀ ନିଆଁକୁ ଆୟତ୍ତ କରିଥିବାବେଳେ ଘଟଣାର ତଦନ୍ତ ଜାରି ରହିଛି।
Comments are closed.