ଲାହୋରରେ ଆତଙ୍କବାଦୀ ହାଫିଜ୍ ସୟିଦର ଗୁପ୍ତ ଠିକଣା ଠାବ

ନୂଆଦିଲ୍ଲୀ: ପହଲଗାମ ଆତଙ୍କବାଦୀ ଆକ୍ରମଣ ପରେ ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ଦେଖା ଦେଇଛି । ଏଥିମଧ୍ୟରେ ପାକିସ୍ତାନ ଆତଙ୍କବାଦୀଙ୍କ ସୁରକ୍ଷା ବୃଦ୍ଧି କରାଇଥିବା ଖବର ମିଳିଛି । ଲସ୍କର-ଏ-ତୋଏବା ମୁଖ୍ୟ ହାଫିଜ୍ ସୟିଦର ଗୁପ୍ତ ଠିକଣାର ପର୍ଦ୍ଦାଫାସ ହୋଇଛି। ହାଫିଜ୍ ଲାହୋରରେ ଥିବା ନିଶ୍ଚିତ ହୋଇଛି। ସୂତ୍ରରୁ ମିଳିଥିବା ସୂଚନା ଅନୁଯାୟୀ, ପାକିସ୍ତାନରେ ରହୁଥିବା ଲସ୍କର-ଏ-ତୋଏବା ମୁଖ୍ୟ ହାଫିଜ୍ ସୟିଦର ସୁରକ୍ଷା ବୃଦ୍ଧି କରାଯାଇଛି। ପାକିସ୍ତାନ ସେନା ହାଫିଜର ଘରର ସୁରକ୍ଷା ବଢ଼ାଇ ଦେଇଛି।

ସାଟେଲାଇଟ୍ ଫଟୋ ଓ ଭିଡିଓରେ ହାଫିଜ୍ ସୟିଦର ଘର ଲାହୋରରେ ବୋଲି ଜଣାପଡିଛି । ଏହି ଭିଡିଓରେ ହାଫିଜ୍ ସାମାନ୍ୟ ଲୋକଙ୍କ ଭଳି ବହୁ ଆରାମରେ ରହୁଥିବା ଦେଖିବାକୁ ମିଳିଛି ।

ଆତଙ୍କବାଦୀ ହାଫିଜ୍ ପାକିସ୍ତାନ ସରକାରଙ୍କ କଡ଼ା ସୁରକ୍ଷା ମଧ୍ୟରେ ଲାହୋରର ଜୋହର ଟାଉନରେ ରହୁଛି। କୁହାଯାଉଛି ଯେ ହାଫିଜର ସୁରକ୍ଷା ତିନୋଟି ସ୍ତରରେ କରାଯାଉଛି। ଏହା ବ୍ୟତୀତ, ହାଫିଜ୍ ର ବ୍ୟକ୍ତିଗତ ସୁରକ୍ଷା କର୍ମୀ ମଧ୍ୟ ୨୪ ଘଣ୍ଟା ସଜାଗ ରହିଛନ୍ତି।

#IndiaTodayExclusive: India Today traced the hideout of Hafiz Saeed, Lashkar-e-Taiba (LeT) chief and 26/11 attacks mastermind, in Lahore, where he is living under tight security from the Pakistani government. The real kingpin of the Pahalgam terror attack lives in a densely… pic.twitter.com/2zJaWzfDVK

— India Today Global (@ITGGlobal) April 30, 2025

ହାଫିଜ୍ ସୟିଦର ଗୁପ୍ତ ଠିକଣାର ଫଟୋ ଏବଂ ଭିଡିଓ ସାମ୍ନାକୁ ଆସିଲା ପରେ ଦେଖିବାକୁ ମିଳିଛି ଯେ, ହାଫିଜ୍ ତା’ ପରିବାର ସହିତ ଏକ କୋଠାରେ ରହୁଛି । ହାଫିଜର ବ୍ୟକ୍ତିଗତ ପାର୍କ ଏହାର ଠିକ୍ ସାମ୍ନାରେ ଅଛି।

ଘର ପରିସରର ଦ୍ୱିତୀୟ କୋଠାରେ ଏକ ମସଜିଦ୍ ଏବଂ ଏକ ମଦ୍ରାସା ଅଛି । ଏହାର ତଳେ ଏକ ବଙ୍କର ରହିଛି। ଏହି ସମ୍ପୂର୍ଣ୍ଣ କମ୍ପ୍ଲେକ୍ସ ୫୦୦୦ ବର୍ଗଫୁଟରୁ ଅଧିକ। କୁହାଯାଉଛି ଯେ ସେ ବହୁ ବର୍ଷ ଧରି ତାଙ୍କ ପରିବାର ସହିତ ଏଠାରେ ରହୁଛି ।

ମୁମ୍ବାଇ ଆକ୍ରମଣର ମାଷ୍ଟରମାଇଣ୍ଡ ହାଫିଜ୍ ସୟିଦକୁ ଜାତିସଂଘ ବିଶ୍ୱ ଆତଙ୍କବାଦୀ ଭାବେ ଘୋଷଣା କରିଛି। କାଶ୍ମୀର ଏବଂ ଭାରତର ଅନ୍ୟାନ୍ୟ ସ୍ଥାନରେ ଆତଙ୍କବାଦୀ କାର୍ଯ୍ୟକଳାପ ପଛରେ ଲସ୍କର-ଏ-ତୋଏବା ମୁଖ୍ୟ ହାଫିଜ୍ ସୟିଦର ହାତ ରହିଛି ।