ନୂଆଦିଲ୍ଲୀ: ବହୁ ପ୍ରତୀକ୍ଷିତ ଚଳଚ୍ଚିତ୍ର ‘ପିରିଅଡ୍ ଏଣ୍ଡ୍ ଅଫ୍ ସେଣ୍ଟେନ୍ସ’ ପାଇଁ ଉତ୍ତରପ୍ରଦେଶର ହାପୁର ଜିଲ୍ଲାର ସଦର ତହସିଲ ଅଞ୍ଚଳର କାଥିକେଡା ଗାଁର ବାସିନ୍ଦା ସୁମନଙ୍କୁ ଦାଦାସାହେବ ଫାଲକେ ପୁରସ୍କାର ପ୍ରଦାନ କରାଯିବା ନେଇ ଘୋଷଣା କରାଯାଇଛି। ୨୪ ନଭେମ୍ବରରେ ମୁମ୍ବାଇରେ ଆୟୋଜିତ ଏକ କାର୍ଯ୍ୟକ୍ରମରେ ତାଙ୍କୁ ଏହି ପୁରସ୍କାର ପ୍ରଦାନ କରାଯିବ।
ଆୟୋଜକ କମିଟି ସେମାନଙ୍କୁ ଏକ ଚିଠି ମାଧ୍ୟମରେ ଏହି ସୂଚନା ଦେଇଛନ୍ତି। ପରିବାର ସୂଚନା ଅନୁଯାୟୀ, ଚୟନ କମିଟିର ସଭାପତି କଲ୍ୟାଣଜୀ ସୁମନଙ୍କୁ ଏକ ଚିଠି ଲେଖିଛନ୍ତି ଏବଂ ଦାଦାସାହେବ ଫାଲକେ ପୁରସ୍କାର ବିଷୟରେ ସୁମନଙ୍କୁ ସୂଚନା ଦେଇଛନ୍ତି। ଏହା ଜାଣିବା ପରେ ତାଙ୍କ ପରିବାରରେ ଏକ ଖୁସିର ବାତାବରଣ ଖେଳିଯାଇଛି।
ଉଲ୍ଲେଖନୀୟ କଥା ହେଉଛି, ୨୦୧୦ରେ ସୁମନ ଏକ ଅନୁଷ୍ଠାନ ସହିତ ଜଡିତ ଥିଲେ। ଯାହା ସହିତ ସେ ମିଳିତ ଭାବେ ଗାଁର ମହିଳାମାନଙ୍କୁ ସାନିଟାରୀ ନାପକିନ୍ ତିଆରି କରିବାକୁ ପ୍ରେରଣା ଯୋଗାଇଥିଲେ। ଏହା ପରେ, ଏହି ମହିଳାମାନେ ଏକ ଗୋଷ୍ଠୀ ଗଠନ କରି ସାନିଟାରୀ ନାପକିନ୍ ତିଆରି କରିବା ଆରମ୍ଭ କରିଥିଲେ। ମହିଳାମାନଙ୍କର ଏହି ଗୋଷ୍ଠୀ ନାପକିନ୍ ତିଆରି କରି ସେମାନଙ୍କୁ ଏନଜିଓମାନଙ୍କୁ ଯୋଗାଇ ଦିଅନ୍ତି ଏବଂ ଏନଜିଓ ସେମାନଙ୍କୁ ଏହି କାର୍ଯ୍ୟ ପାଇଁ ଏକ ନିର୍ଦ୍ଦିଷ୍ଟ ରାଶି ପ୍ରଦାନ କରିଥାଏ। ଏହି ଏନଜିଓର ପ୍ରୟାସରେ ମହିଳାମାନଙ୍କୁ ସାନିଟାରୀ ନାପକିନ୍ ବ୍ୟବହାର କରିବାକୁ ଉତ୍ସାହିତ କରିବା ପାଇଁ ଏକ କ୍ଷୁଦ୍ର ଚଳଚ୍ଚିତ୍ର ନିର୍ମାଣ କରାଯାଇଥିଲା। ଏହି କ୍ଷୁଦ୍ର ଚଳଚ୍ଚିତ୍ରରେ ସୁମନ ମୁଖ୍ୟ ଭୂମିକାରେ ଅଭିନୟ କରିଥିଲେ। ଗତ ବର୍ଷ ଫେବୃଆରୀ ୨୫ରେ ଲସ୍ ଆଞ୍ଜେଲସରେ ଆୟୋଜିତ ଏକ କାର୍ଯ୍ୟକ୍ରମରେ ଏହି ଚଳଚ୍ଚିତ୍ରକୁ ଓସ୍କାର ପୁରସ୍କାରରେ ସମ୍ମାନିତ କରାଯାଇଥିଲା।
Comments are closed.