ଟି-ଟ୍ୱେଣ୍ଟିରେ ଓପନର ଭାବେ ଟିମ୍ ଇଣ୍ଡିଆକୁ ମିଳିଲା କି ରୋହିତ ଶର୍ମାଙ୍କ ବିକଳ୍ପ?

ଭୁବନେଶ୍ୱର: ରୋହିତ ଶର୍ମା ଟି-ଟ୍ୱେଣ୍ଟିରୁ ଅବସର ନେବା ପରେ ଦଳ ପାଇଁ ଏକ ଦୁର୍ଦ୍ଦଶ ଓପନର ଆବଶ୍ୟକ ଥିଲା। କିନ୍ତୁ ଶନିବାର ବାଂଲାଦେଶ ବିପକ୍ଷରେ ଟିମ୍ ଇଣ୍ଡିଆର ଯୁବ ବ୍ୟାଟର ସଞ୍ଜୁ ସାମସନଙ୍କ ବ୍ୟାଟିଂ କିଛି ସମୟ ପାଇଁ ପ୍ରଶଂସକଙ୍କୁ ମନେ ପକାଇ ଦେଇଛି ରୋହିତଙ୍କ ଭଳି କେହି ଜଣେ କ୍ରିଜରେ ଛକା, ଚୌକା ମାରୁଛି। ଆଉ ଏହି ମ୍ୟାଚ ଯିଏ ଦେଖିଥିବ ସେ ନିଶ୍ଚିତ ଥିବେ ଯେ ଦଳର ବ୍ୟାଟର ତାରକା ଲିଷ୍ଟରେ ସାମିଲ ହେବାକୁ ଯାଉଛନ୍ତି ଏହି ଯୁବ ଖେଳାଳି। ଏହାରି ଭିତରେ କେରଳର ଏହି ବ୍ୟାଟରଙ୍କ ପ୍ରତିଭା ଆଇପିଏଲରେ ସମସ୍ତେ ଦେଖିଥିଲେ। କିନ୍ତୁ ଏକ ଅନ୍ତର୍ଜାତୀୟ ମ୍ୟାଚରେ ସୁଯୋଗ ପାଇବା ପରେ ସେ ଯେଉଁଭଳି ବ୍ୟାଟିଂ କରିଛନ୍ତି ତାହା ପ୍ରଶଂସାଯୋଗ୍ୟ।

ନିଜ କିଶୋର ବୟସରେ ସାମସନ ଜଣେ ପ୍ରତିଭାବାନ ବୋଲି ବିବେଚନା କରାଯାଉଥିଲେ ମଧ୍ୟ ତାଙ୍କ କ୍ୟାରିୟରରେ ଅନେକ ଚ୍ୟାଲେଞ୍ଜର ସମ୍ମୁଖୀନ ହୋଇଛନ୍ତି। ୨୦୧୫ରେ ପଦାର୍ପଣ କରିବା ପରେ ଟି-୨୦ ଫର୍ମାଟରେ ଭାରତର ପ୍ରତିନିଧିତ୍ୱ କରିବା ପାଇଁ ସାମସନଙ୍କୁ ଆଉ ୫ ବର୍ଷ ଅପେକ୍ଷା କରିବାକୁ ପଡ଼ିଥିଲା।

୨୦୨୨ରେ ଫେରିବା ପରେ ସାମସନ୍ ସୁଯୋଗ ଦୃଷ୍ଟିରୁ ଅପେକ୍ଷାକୃତ ଅଧିକ ନିରନ୍ତରତା ପାଇଥିଲେ। ସେହି ବର୍ଷ ତାଙ୍କ ପାଇଁ ଅନ୍ୟତମ ଶ୍ରେଷ୍ଠ ଥିଲା, ସେ ୬ଟି ମ୍ୟାଚ୍ ରେ ଗୋଟିଏ ଅର୍ଦ୍ଧଶତକ ସହ ୧୭୯ ରନ୍ କରିଥିଲେ। ତଥାପି ତାଙ୍କୁ ବିଶ୍ୱକପ୍ ପାଇଁ ସୁଯୋଗ ମିଳିନଥିଲା। ୨୦୨୩ରେ ତାଙ୍କୁ ଆଉ ୮ଟି ସୁଯୋଗ ମିଳିଥିଲେ ମଧ୍ୟ ମାତ୍ର ୧୫.୬୦ ହାରରେ ରନ୍ କରିବାକୁ ସକ୍ଷମ ହୋଇଥିଲେ। ୨୦୨୪ରେ ବାଂଲାଦେଶ ବିପକ୍ଷ ଶୃଙ୍ଖଳା ପୂର୍ବରୁ ତାଙ୍କ ପାଖରେ ୬ଟି ସୁଯୋଗ ଥିଲେ ମଧ୍ୟ କ୍ରିଜରେ ନିଜର ପ୍ରଭାବ ପକାଇବାରେ ବିଫଳ ହୋଇଥିଲେ।

ଲାଗୁଥିଲା ୨୯ ବର୍ଷୀୟ ଯୁବକଙ୍କ ପାଖରେ ସମୟ ସରିଯାଇଛି। ଗୁଆହାଟିରେ ସିରିଜର ପ୍ରଥମ ମ୍ୟାଚ୍ ପୂର୍ବରୁ ଅଧିନାୟକ ସୂର୍ଯ୍ୟକୁମାର ଯାଦବ ଯେତେବେଳେ ଅଭିଷେକ ଶର୍ମାଙ୍କ ସହ ସାମସନ୍ ଓପନିଂ କରିବେ ବୋଲି ନିଶ୍ଚିତ କରିଥିଲେ, ସେତେବେଳେ ଲାଗୁଥିଲା ଯେ ଟିମ୍ ମ୍ୟାନେଜମେଣ୍ଟ ତାଙ୍କୁ ଶେଷ ସୁଯୋଗ ଦେଉଛି, ବିଶେଷ କରି ଯେତେବେଳେ ଓପନିଂ ସ୍ଥାନ ପାଇଁ କଡ଼ା ପ୍ରତିଦ୍ୱନ୍ଦ୍ୱିତା ହୋଇଥିଲା।

ଶ୍ରୀଲଙ୍କା ବିପକ୍ଷ ୩ ମ୍ୟାଚ୍ ବିଶିଷ୍ଟ ଶୃଙ୍ଖଳାରେ ଦୁଇ ଥର ଶୂନ ରନ୍ କରି ଆଉଟ୍ ହେବା ପରେ ନିରାଶ ହୋଇ ତାଙ୍କ ଟି-୨୦ କ୍ୟାରିୟର ଶେଷ ହୋଇପାରେ ବୋଲି ନିଜେ ସାମସନ୍ ଅନୁଭବ କରିଥିଲେ। କିନ୍ତୁ ଶନିବାର ହାଇଦ୍ରାବାଦରେ ସେ ୪୭ ବଲ୍ ରୁ ୧୧୧ ରନ୍ କରି ଭାରତକୁ ୨୦ ଓଭରରେ ୨୯୭ ରନ୍ ର ବିଶାଳ ସ୍କୋରରେ ପହଞ୍ଚାଇଥିଲେ।

ସାମସନ୍ ସଂଘର୍ଷ ଏବଂ ସୁଯୋଗର ଅଭାବର ସମ୍ମୁଖୀନ ହୋଇଥିଲେ, କିନ୍ତୁ ଯେତେବେଳେ ବି ସେ ରାଜସ୍ଥାନ ରୟାଲ୍ସ ଜର୍ସି ପିନ୍ଧିଥିଲେ, ସେ ଚୟନକର୍ତ୍ତାମାନଙ୍କୁ ତାଙ୍କ ଦକ୍ଷତା ମନେ ପକାଇ ଦେଇଥିଲେ। ବଡ଼ ବଡ଼ ମ୍ୟାଚରେ ଭଲ ପ୍ରଦର୍ଶନ କରିନଥିବା ସତ୍ତ୍ୱେ ସାମସନ୍ ବାରମ୍ବାର ଚର୍ଚ୍ଚାରେ ରହିଥିଲେ।

ଅକ୍ଟୋବର ୧୨ ତାରିଖ ଶନିବାର ସାମସନ୍ ଶେଷରେ ଏକ ଜବରଦସ୍ତ ଇନିଂସ ଖେଳିଥିଲେ। ଗ୍ୱାଲିୟର ଏବଂ ଦିଲ୍ଲୀରେ ସିରିଜର ପ୍ରଥମ ଦୁଇଟି ଟି-୨୦ ମ୍ୟାଚରେ ସୁଯୋଗ ହାତଛଡ଼ା କରିବା ପରେ ଲାଗୁଥିଲା ଯେ ସିନିୟର ଖେଳାଳିଙ୍କ ପାଖରେ ଏବେ ବହୁତ କମ୍ ସମୟ ଅଛି। କିନ୍ତୁ ସାମସନ୍ ଠିକ୍ ସମୟରେ ନିଜକୁ ପ୍ରମାଣିତ କରିଥିଲେ।

ସାମସନ୍ ମାତ୍ର ୪୦ ବଲରେ ନିଜର ପ୍ରଥମ ଟି-୨୦ ଶତକ ପୂରଣ କରିଥିଲେ, ଯାହା କି ଏହି ଫର୍ମାଟରେ ଭାରତ ପାଇଁ ଦ୍ବିତୀୟ ଦ୍ରୁତତମ ଶତକ। ଶତକ ହାସଲ କରିବା ପରେ ସାମସନ୍ କିଛି ମୁହୂର୍ତ୍ତ ପାଇଁ ଭାବପ୍ରବଣ ହୋଇ ଯାଇଥିଲେ।

ଏହି ଶୃଙ୍ଖଳାରେ କ୍ରମାଗତ ୩ଟି ମ୍ୟାଚ୍ ରେ ସେ ସମାନ ସ୍ଥାନରେ ବ୍ୟାଟିଂ କରିବାର ସୁଯୋଗ ପାଇଥିଲେ। କିଛି ସପ୍ତାହ ତଳେ ଯେତେବେଳେ ସେ ବାଂଲାଦେଶ ବିପକ୍ଷ ଟି-୨୦ ଦଳରେ ସ୍ଥାନ ପାଇବେ କି ନାହିଁ ବୋଲି ଚିନ୍ତା କରୁଥିଲେ, ସେତେବେଳେ ତାଙ୍କୁ ଚୟନକର୍ତ୍ତାଙ୍କ ପକ୍ଷରୁ ଏକ ବାର୍ତ୍ତା ମିଳିଥିଲା, ଯେଉଁଥିରେ ସୂର୍ଯ୍ୟକୁମାର, କୋଚ୍ ଗୌତମ ଗମ୍ଭୀର ଏବଂ ସହକାରୀ ପ୍ରଶିକ୍ଷକ ଅଭିଷେକ ନାୟାର ସାମିଲ ଥିଲେ।

ସାମସନଙ୍କ ଆତ୍ମବିଶ୍ୱାସ ଏବଂ ଟିମ୍ ମ୍ୟାନେଜମେଣ୍ଟର ସମର୍ଥନ ବୋଧହୁଏ ତାଙ୍କ ସାମ୍ପ୍ରତିକ ସଫଳତାର ଚାବିକାଠି । ପୂର୍ବତନ କୋଚ୍ ରବି ଶାସ୍ତ୍ରୀ ମଧ୍ୟ ସାମସନଙ୍କୁ ସମର୍ଥନ ଜଣାଇ କହିଛନ୍ତି, ଯଦି ଆପଣ ତାଙ୍କ ସହ ରହିବେ, ତେବେ ସେ ଚମତ୍କାର ପ୍ରଦର୍ଶନ କରିପାରିବେ। ସାମସନଙ୍କ ପାଖରେ ଏପରି ଶଟ୍ ରହିଛି ଯାହା ବୋଲରଙ୍କ ଆତ୍ମବିଶ୍ୱାସକୁ ଭାଙ୍ଗିପାରିବ। ଏହା କେବଳ ଗୋଟିଏ ବଡ଼ ଇନିଂସ୍ ର କଥା, ଏବଂ ତା’ପରେ ସେ ଆଗକୁ ବଢ଼ିବେ। “

ହାଇଦ୍ରାବାଦରେ ଖେଳାଯାଇଥିବା ଏହି ଚମତ୍କାର ଇନିଂସ ସାମସନଙ୍କ କ୍ୟାରିଅରର ଗୋଟିଏ ବଡ଼ ମ୍ୟାଚ ବୋଲି କୁହାଯାଉଛି। ଟିମ୍ ମ୍ୟାନେଜମେଣ୍ଟର ସମର୍ଥନ ତାଙ୍କୁ ଆହୁରି ସଫଳ କରିପାରିବ । ତେବେ ଦଳରେ ବ୍ୟାଟିଂ କ୍ରମରେ ରୋହିତ ଶର୍ମାଙ୍କ ସ୍ଥାନ ଆଗାମୀ ଦିନରେ ସାମସନ ନେବେ କି ତାହା ଏବେ ଚର୍ଚ୍ଚାରେ।