ନୂଆଦିଲ୍ଲୀ: ଭାରତରେ ସଡ଼କ ସୁରକ୍ଷାକୁ ନେଇ କଡ଼ା ନିୟମ ରହିଛି। ଦୁଇ ଚକିଆ ଯାନ ବା ବାଇକ୍ ଚଳାଇବା ସମୟରେ ହେଲମେଟ୍ ପିନ୍ଧିବା ସମସ୍ତଙ୍କ ପାଇଁ ଏକାନ୍ତ ଅପରିହାର୍ଯ୍ୟ। ଏହି ନିୟମର ଉଲ୍ଲଂଘନ କଲେ ଟ୍ରାଫିକ୍ ପୋଲିସ ପକ୍ଷରୁ ମୋଟା ଅଙ୍କର ଜୋରିମାନା ଆଦାୟ କରାଯାଇଥାଏ। ତେବେ ଦେଶର ଟ୍ରାଫିକ୍ ଆଇନରେ ଗୋଟିଏ ନିର୍ଦ୍ଦିଷ୍ଟ ସମ୍ପ୍ରଦାୟ ପାଇଁ ଏହି ନିୟମରେ ବିଶେଷ ରିହାତି ପ୍ରଦାନ କରାଯାଇଛି। ସେମାନେ ହେଉଛନ୍ତି ଶିଖ୍ ସମ୍ପ୍ରଦାୟ। ଶିଖ୍ ଧର୍ମାବଲମ୍ବୀମାନେ ଯଦି ବିନା ହେଲମେଟରେ ବାଇକ୍ ଚଲାନ୍ତି, ତେବେ ପୋଲିସ ସେମାନଙ୍କର ଚାଲାଣ କାଟିପାରିବ ନାହିଁ। କିନ୍ତୁ ଏହା ପଛରେ ରହିଛି ଏକ ସ୍ୱତନ୍ତ୍ର ନିୟମ ଏବଂ ସର୍ତ୍ତ।
ମୋଟର ଯାନ ଆଇନ, ୧୯୮୮ ର ଧାରା ୧୨୯ ଅନୁଯାୟୀ, ଦେଶରେ ଦୁଇ ଚକିଆ ଯାନରେ ଯାତ୍ରା କରୁଥିବା ଚାଳକ ଏବଂ ପଛରେ ବସିଥିବା ବ୍ୟକ୍ତିଙ୍କ ପାଇଁ ବିଆଇଏସ୍ ମାନକ ଯୁକ୍ତ ହେଲମେଟ୍ ପିନ୍ଧିବା ବାଧ୍ୟତାମୂଳକ। ମାତ୍ର ଏହି ଧାରାରେ ଏକ ବ୍ୟତିକ୍ରମ ମଧ୍ୟ ସ୍ପଷ୍ଟ ଭାବରେ ଉଲ୍ଲେଖ କରାଯାଇଛି। ନିୟମ ଅନୁସାରେ, ଯଦି କୌଣସି ଶିଖ୍ ବ୍ୟକ୍ତି ସର୍ବସାଧାରଣ ସ୍ଥାନରେ ମୋଟରସାଇକେଲ୍ ଚଳାଉଛନ୍ତି କିମ୍ବା ପଛରେ ବସିଛନ୍ତି ଏବଂ ସେ ମୁଣ୍ଡରେ ପଗଡ଼ି (ଟର୍ବାନ୍) ପିନ୍ଧିଛନ୍ତି, ତେବେ ତାଙ୍କ କ୍ଷେତ୍ରରେ ହେଲମେଟ୍ ନିୟମ ଲାଗୁ ହେବ ନାହିଁ।
ଏହି କୋହଳ ପଛରେ ସବୁଠାରୁ ବଡ଼ କାରଣ ହେଉଛି ଧାର୍ମିକ ବିଶ୍ୱାସ ଓ ପରମ୍ପରା। ଶିଖ୍ ଧର୍ମରେ ପଗଡ଼ି କେବଳ ଏକ ସାଧାରଣ ବସ୍ତ୍ର ନୁହେଁ, ବରଂ ଏହା ସେମାନଙ୍କ ଧର୍ମ, ସମ୍ମାନ ଏବଂ ପରିଚୟର ଏକ ଅବିଚ୍ଛେଦ୍ୟ ଅଙ୍ଗ। ଶିଖ୍ ଗୁରୁମାନଙ୍କ ଦ୍ୱାରା ପ୍ରଣୀତ ନିୟମ ଅନୁଯାୟୀ କେଶ ନ କାଟିବା ଓ ପଗଡ଼ି ଧାରଣ କରିବା ଏକ ପବିତ୍ର ପ୍ରଥା। ଭାରତୀୟ ସମ୍ବିଧାନର ଧାରା ୨୫ ପ୍ରତ୍ୟେକ ନାଗରିକଙ୍କୁ ନିଜର ଧାର୍ମିକ ପରମ୍ପରାକୁ ଅବାଧରେ ପାଳନ କରିବାର ମୌଳିକ ଅଧିକାର ପ୍ରଦାନ କରିଛି। ସମ୍ବିଧାନର ଏହି ଅଧିକାର ଓ ସମ୍ପ୍ରଦାୟର ଧାର୍ମିକ ଭାବନାକୁ ସମ୍ମାନ ଜଣାଇ ସରକାର ହେଲମେଟ୍ ନିୟମରେ ଏହି ରିହାତି ଦେଇଛନ୍ତି। ପୁଣି ବଡ଼ ଆକାରର ପଗଡ଼ି ପିନ୍ଧିବା ପରେ ତା’ ଉପରେ ହେଲମେଟ୍ ପିନ୍ଧିବା ବ୍ୟବହାରିକ ଦୃଷ୍ଟିକୋଣରୁ ମଧ୍ୟ ଅସମ୍ଭବ।
ଏହି ରିହାତିର ଏକ ପ୍ରମୁଖ ସର୍ତ୍ତ ହେଉଛି ‘ପଗଡ଼ି’ ପିନ୍ଧିବା। ଯଦି କୌଣସି ଶିଖ୍ ବ୍ୟକ୍ତି ଗାଡ଼ି ଚଳାଇବା ସମୟରେ ମୁଣ୍ଡରେ ପଗଡ଼ି ପିନ୍ଧି ନାହାନ୍ତି, ତେବେ ତାଙ୍କୁ ସାଧାରଣ ନାଗରିକଙ୍କ ପରି ହେଲମେଟ୍ ପିନ୍ଧିବାକୁ ହିଁ ପଡ଼ିବ। ବିନା ପଗଡ଼ି ଏବଂ ବିନା ହେଲମେଟରେ ଧରାପଡ଼ିଲେ ଟ୍ରାଫିକ୍ ପୋଲିସ ନିୟମ ମୁତାବକ ତାଙ୍କର ଚାଲାଣ କାଟିପାରିବେ। ଆଇନ ସ୍ପଷ୍ଟ ଭାବରେ କହୁଛି ଯେ, ରିହାତି ବ୍ୟକ୍ତିବିଶେଷଙ୍କ ପାଇଁ ନୁହେଁ, ବରଂ ଧାର୍ମିକ ପରମ୍ପରା (ପଗଡ଼ି) କୁ ପାଳନ କରୁଥିବା ବେଳେ ହିଁ ମିଳିବ।
